Karnataka: ఊహాగానాలన్నీ ఉత్తవే.. బ్రేక్ ఫాస్ట్ ద్వారా బ్రేక్ చేసిన నేతలు..

కర్ణాటక కాంగ్రెస్ సంక్షోభం, నాయకత్వంలో మార్పులు, ఎప్పుడూ వార్తల్లో నిలిచే అంశాలు.. కొన్ని రోజుల గడబిడ తరువాత అదిష్టానం వారిని బుజ్జగించడం మళ్లీ ఇష్యూని పక్కన పెట్టడం ఇవన్నీ సదా మామూలే.. డికే శివకుమార్‌తో బ్రేక్ ఫాస్ట్ సమావేశం ఏర్పాటు చేసి అన్ని విషయాలు చర్చించుకుని మా మధ్య ఎటువంటి మనస్పర్థలు లేవు అని బయటకి చెప్పారు ఇరువురు నేతలు. నాయకత్వంలో మార్పు లేదు అని కుండబద్దలు కొట్టారు. ఇదీ చూద్దాం ఎన్ని రోజులో అని అనుకుంటున్నారు ఇతర నేతలు.

కర్ణాటక ముఖ్యమంత్రి సిద్ధరామయ్య, ఉప ముఖ్యమంత్రి డీకే శివకుమార్ శనివారం రాష్ట్రంలో కాంగ్రెస్ పార్టీ నాయకత్వంలో మార్పుపై ఉన్న ఊహాగానాలకు ముగింపు పలికి, ఐక్యతను నొక్కి చెప్పారు.

శుక్రవారం కాంగ్రెస్ హైకమాండ్ వారిని కలిసి వారి విభేదాలను పరిష్కరించుకోవాలని కోరిన తర్వాత ఇద్దరు నాయకులు ఈరోజు అల్పాహారం సమయంలో సమావేశమయ్యారు. సమావేశం తర్వాత విలేకరులతో మాట్లాడిన ఇరువురు నేతలు కర్ణాటక కాంగ్రెస్ యూనిట్‌లో చీలిక ఉందనే ఊహాగానాలకు చెక్ పెట్టే ప్రయత్నం చేశారు. తాము కలిసి ప్రతిపక్షాన్ని ఎదుర్కొంటామని, తిరిగి అధికారంలోకి వస్తామని చెప్పారు.

నెల రోజులుగా నెలకొన్న గందరగోళాన్ని తొలగించడమే ఈరోజు సమావేశం ఉద్దేశమని ముఖ్యమంత్రి అన్నారు. ఈ సమావేశంలో 2028 అసెంబ్లీ ఎన్నికలు, రాబోయే స్థానిక సంస్థల ఎన్నికలకు సంబంధించిన సన్నాహాలను సమీక్షించామని, ఇది తన పార్టీకి చాలా ముఖ్యమైనదని ఆయన అభివర్ణించారు. 2023లో పార్టీని అధికారంలోకి తీసుకురావడానికి తాము కలిసి పనిచేసినట్లే, ఇప్పుడు కూడా అదే స్ఫూర్తితో ముందుకు సాగాలని నిర్ణయించుకున్నామని ఆయన నొక్కి చెప్పారు.

కాంగ్రెస్ హైకమాండ్ ఆదేశాలను పాటిస్తుంటామని, పార్టీలో అంతర్గత కలహాలు లేవని చెప్పారు. నవంబర్ 20న సిద్ధరామయ్య ప్రభుత్వం సగం పదవీకాలం పూర్తి చేసుకున్న సందర్భంగా కర్ణాటకలో నాయకత్వ మార్పు జరుగుతుందనే ఊహాగానాలకు ప్రస్తుతానికి తెర దించారు.