Kerala: మహిళను అసభ్యంగా తాకాడని వీడియో వైరల్.. పరువు పోయిందని వ్యక్తి ఆత్మహత్య

బస్సులో అసభ్యంగా ప్రవర్తించాడని ఆరోపిస్తూ ఓ యువతి వీడియో తీసింది. యువతి నిందారోపణ తట్టుకోలేక బాధితుడు ఆత్మహత్య చేసుకున్నాడు. ఈ ఘటన కేరళలో చోటుచేసుకుంది. బస్సులో దీపక్ అనే వ్యక్తి తనతో అసభ్యంగా ప్రవర్తిస్తూ తాకాడు అని వీడియో తీసి సోషల్ మీడియాలో పెట్టిన ఓ యువతి.. వీడియో వైరల్ కావడంతో అవమాన భారంతో తాను అలాంటి స్వభావం గల వాడిని కాదని ఆత్మహత్యకు పాల్పడ్డాడు దీపక్. మృతుడిని కోజికోడ్‌లోని గోవిందపురంలో నివసిస్తున్న పుతియారాకు చెందిన దీపక్ యుగా గుర్తించారు...

పోలీసుల ప్రకారం, ఆదివారం ఉదయం 7 గంటల ప్రాంతంలో, దీపక్‌ను నిద్రలేపడానికి అతని తల్లిదండ్రులు పడకగది తలుపు తట్టారు, కానీ పదేపదే ప్రయత్నించినా ఎలాంటి స్పందన రాలేదు. తరువాత వారు పొరుగువారి సహాయంతో గదిలోకి ప్రవేశించి చూడగా, అతను సీలింగ్ ఫ్యాన్‌కు ఉరి వేసుకుని కనిపించాడని పోలీసులు తెలిపారు. వెంటనే పోలీసులకు సమాచారం అందించగా, వారు ఇంటికి చేరుకుని మరణాన్ని ధృవీకరించారు. దీపక్ ఒక టెక్స్‌టైల్ సంస్థలో పనిచేస్తున్నాడని, తన పని నిమిత్తం శుక్రవారం కన్నూర్‌కు వెళ్లాడని బంధువులు తెలిపారు.

అదే రోజు, దీపక్ కూర్చున్న బస్సులో ప్రయాణిస్తున్న ఒక మహిళా ప్రయాణికురాలు, అతను తనతో అసభ్యంగా ప్రవర్తించాడని ఆరోపిస్తూ ఒక వీడియోను రికార్డ్ చేసిందని ఒక బంధువు విలేకరులకు తెలిపారు. ఈ వీడియో సోషల్ మీడియాలో విపరీతంగా ప్రచారమైందని, అది దీపక్ దృష్టికి కూడా వచ్చిందని పోలీసులు చెప్పారు. బంధువుల ప్రకారం, దీపక్ ఆ ఆరోపణను ఖండించాడు. వీడియో వెలుగులోకి వచ్చినప్పటి నుండి తీవ్ర మానసిక వేదనకు గురయ్యాడు. మెడికల్ కాలేజ్ పోలీసులు అసాధారణ మరణంగా కేసు నమోదు చేసి దర్యాప్తు ప్రారంభించారు. ప్రాథమిక విచారణలో ఇది ఆత్మహత్యగా అనుమానిస్తున్నట్లు తేలిందని, వీడియో ప్రచారానికి దారితీసిన పరిస్థితులను కూడా దర్యాప్తులో పరిశీలిస్తామని పోలీసులు తెలిపారు.