Lifetime Pani Puri: రూ.99వేలకే లైఫ్టైమ్ పానీ పూరీ.. ఆఫర్ ఎక్కడంటే
మంత్లీ ప్లాన్ కూడా ఉందంట ..
వ్యాపారంలో పోటీని తట్టుకోవాలంటే వినూత్నంగా ఆలోచించడం సహా వినియోగదారులను ఆకట్టుకునే తెలివితేటలు ఉండాలి. సరిగ్గా అదే చేస్తున్నాడు మహారాష్ట్రలో ఆరెంజ్‌ సిటీగా పేరుపొందిన నాగ్‌పుర్‌కు చెందిన చిరువ్యాపారి. పానీపూరి తయారీలో, రెసిపీలో కొత్తదనం లేకున్నా వినూత్నమైన ఆఫర్లను ప్రకటించి సామాజిక మాధ్యమాల్లో వైరల్‌గా మారాడు.
మహారాష్ట్రలోని నాగ్‌పూర్‌కు చెందిన పానీపూరీ షాప్ యజమాని ఈ విచిత్రమైన ఆఫర్‌ను తీసుకువచ్చాడు. ఒక్కసారి తన వద్ద కొంత డబ్బు కడితే.. ఇక అప్పటి నుంచి జీవితాంతం ఎప్పుడు పడితే అప్పుడు.. ఎన్ని పడితే అన్ని పానీపూరీలు ఉచితంగా తినొచ్చు అనే ఆఫర్‌ను తీసుకువచ్చాడు. అయితే ఇందుకోసం పానీపూరీ లవర్స్ ముందుగా రూ.99 వేలను సింగిల్ పేమెంట్‌లో చెల్లించాలని పేర్కొన్నాడు. ఆ తర్వాత ఎన్నిసార్లు వచ్చి ఎన్ని పానీపూరీలు తిన్నా.. ఒక్క రూపాయి కూడా కట్టాల్సిన అవసరం లేదని తేల్చి చెప్పాడు.
అయితే ఈ లైఫ్‌టైం ఫ్రీ పానీపూరీ ఆఫర్ బాగానే ఉన్నా.. రూ.99 వేలు అంటేనే పానీపూరీ లవర్స్ గుండెల్లో రైళ్లు పరిగెడుతున్నాయి. అమ్మో.. అంతనా అంటూ నోరెళ్లబెడుతున్నారు. ఇక ఈ ఆఫర్ సంబంధించిన పోస్టర్‌ను కాస్తా marketing.growmatics అనే ఇన్‌స్టాగ్రామ్ పేజీలో పోస్ట్ చేయడంతో.. అది ఇప్పుడు సోషల్ మీడియాలో సెన్సేషన్‌గా మారింది. ఈ ఆఫర్ చూసిన నెటిజన్లు.. కామెంట్ల వర్షం కురిపిస్తున్నారు. అందులో కొందరు ఈ ఆఫర్‌ను సపోర్ట్ చేస్తూ.. కామెంట్లు పెడుతుండగా.. మరికొందరు మాత్రం వ్యతిరేకిస్తూ కామెంట్లు చేస్తున్నారు.
లైఫ్‌టైం ఫ్రీ అంటే.. పానీపూరీ యజమాని బతికి ఉన్నంత వరకా లేక ఆ ఆఫర్ తీసుకున్న వ్యక్తి బతికి ఉన్నంత వరకా అంటూ కామెంట్లు పెడుతున్నారు. అయితే చాలా మంది.. పబ్లిసిటీ కోసమే ఆ పానీపూరీ షాప్ ఓనర్.. ఈ ఆఫర్‌ను తీసుకువచ్చాడని అనుమానం వ్యక్తం చేస్తున్నారు. కానీ.. ఇంకొంతమంది మాత్రం ఆ పానీపూరీ యజమాని ఆఫర్‌పై సందేహాలు వ్యక్తం చేస్తున్నారు. ఇలా భారీ ధరకు ఆఫర్ అని పెట్టి.. జనాల దగ్గరి నుంచి భారీగా డబ్బులు ఒకేసారి వసూలు చేసి.. బోర్డు తిప్పేసి వెళ్తాడేమో అంటూ కామెంట్లు పెడుతున్నారు. రూ.99 వేలు అంటే ఎంత పానీపూరీ లవర్ అయినా.. అంత డబ్బులు కట్టరని ఆ షాప్ యజమానికి కూడా తెలుసు అని.. కానీ తన షాప్ గురించి అంతా మాట్లాడుకోవాలనే ఇలా చేస్తున్నాడని చెబుతున్నారు. ఆఫర్ సంగతి ఎలా ఉన్నా.. డబ్బు కాస్త ఎక్కువైనా సరే.. జీవితాంతం అన్ లిమిటెడ్ పానీపూరీ అంటేనే అందరి నోట్లో నీళ్లు ఊరుతున్నాయి.