NISAR: ఇస్రో-నాసా సంయుక్త నిసార్ ఉపగ్రహ ప్రయోగం నేడే!
ఇస్రో, నాసా సంయుక్తంగా రూపొందించిన 2,393 కేజీల నిసార్..;
భారత అంతరిక్ష పరిశోధన సంస్థ (ఇస్రో), అమెరికా అంతరిక్ష పరిశోధన సంస్థ (నాసా) సంయుక్తంగా అభివృద్ధి చేసిన భూ పరిశీలన ఉపగ్రహం ‘నిసార్’ను నేటి సాయంత్రం 5:40 గంటలకు శ్రీహరికోటలోని సతీష్ ధవన్ అంతరిక్ష కేంద్రం నుంచి ప్రయోగించనున్నారు. 1.5 బిలియన్ డాలర్ల విలువైన ఈ ప్రతిష్ఠాత్మక మిషన్ భూమి ఉపరితలాన్ని పరిశీలించే విధానంలో విప్లవాత్మక మార్పులు తీసుకురావడంతో పాటు సహజ విపత్తులు, పర్యావరణ మార్పులను ట్రాక్ చేయడంలో కీలక పాత్ర పోషించనుంది.
నిసార్ ప్రత్యేకతలు
నిసార్ (నాసా-ఇస్రో సింథటిక్ అపెర్చర్ రాడార్) ఒక చారిత్రాత్మక ప్రాజెక్టు. ఇది భూమిని డ్యూయల్-ఫ్రీక్వెన్సీ సింథటిక్ అపెర్చర్ రాడార్‌ను (నాసా ఎల్-బ్యాండ్, ఇస్రో ఎస్-బ్యాండ్) ఉపయోగించి మొదటిసారిగా పరిశీలించనుంది. 2,392 కిలోగ్రాముల బరువున్న ఈ ఉపగ్రహాన్ని భారత్‌కు చెందిన జీఎస్‌ఎల్‌వీ-ఎఫ్16 రాకెట్ ద్వారా అంతరిక్షంలోకి పంపనున్నారు. ఈ ఉపగ్రహం 740 కిలోమీటర్ల ఎత్తులో సూర్య అనువర్తిత కక్ష్యలోకి చేరుస్తుంది. అక్కడ ఇది ప్రతి 12 రోజులకు భూమి, మంచుతో కప్పబడిన ఉపరితలాలను 242 కిలోమీటర్ల వెడల్పుతో అధిక-రిజల్యూషన్ చిత్రాలతో స్కాన్ చేస్తుంది. ఇందుకోసం స్వీప్‌సార్ టెక్నాలజీని మొదటిసారిగా ఉపయోగిస్తున్నారు.