Gallantry Awards: 1,090 మందికి కేంద్ర పతకాలు.. ప్రకటించిన హోం శాఖ

స్వాతంత్ర్య దినోత్సవాన్ని పురస్కరించుకుని దేశవ్యాప్తంగా వివిధ విభాగాల్లో పనిచేస్తున్న సిబ్బందికి అందించే శౌర్య, సేవా పతకాల జాబితాను కేంద్ర హోం మంత్రిత్వ శాఖ శుక్రవారం ప్రకటించింది. ఈ ఏడాది మొత్తం 1,090 మంది సిబ్బందిని ఈ పురస్కారాలకు ఎంపిక చేశారు. విధి నిర్వహణలో అసమాన ధైర్యసాహసాలు ప్రదర్శించిన వారికి అందించే శౌర్య పతకాలలో అత్యధికం జమ్మూకశ్మీర్‌ సిబ్బందికే దక్కడం విశేషం.

ఈ ఏడాది ప్రకటించిన మొత్తం 1,090 పతకాలలో 233 శౌర్య పతకాలు, 99 రాష్ట్రపతి విశిష్ట సేవా పతకాలు, 758 ప్రశంసనీయ సేవా పతకాలు ఉన్నాయి. దేశ శాంతిభద్రతల పరిరక్షణలో కీలక పాత్ర పోషించే పోలీసు శాఖకు అత్యధిక పతకాలు లభించాయి. పోలీసు విభాగంలో 226 మందికి శౌర్య పతకాలు, 89 మందికి రాష్ట్రపతి విశిష్ట సేవా పతకాలు, 635 మందికి ప్రశంసనీయ సేవా పతకాలు ప్రకటించారు. శౌర్య పతకాలు పొందిన వారిలో జమ్మూకశ్మీర్‌ తర్వాత సెంట్రల్ రిజర్వ్ పోలీస్ ఫోర్స్ (సీఆర్‌పీఎఫ్), సరిహద్దు భద్రతా దళం (బీఎస్‌ఎఫ్) సిబ్బంది తర్వాతి స్థానాల్లో ఉన్నారు.

ఇతర విభాగాలైన ఫైర్ సర్వీసెస్‌లో 6 శౌర్య పతకాలు, 5 రాష్ట్రపతి విశిష్ట సేవా పతకాలు, 51 ప్రశంసనీయ సేవా పతకాలు సహా మొత్తం 62 పురస్కారాలు ప్రకటించారు. హోంగార్డు, సివిల్ డిఫెన్స్ విభాగంలో ఒక శౌర్య పతకం, 3 రాష్ట్రపతి విశిష్ట సేవా పతకాలు, 41 ప్రశంసనీయ సేవా పతకాలు ఉన్నాయి. కరెక్షనల్ సర్వీసెస్ (జైళ్ల శాఖ)లో ఇద్దరికి రాష్ట్రపతి విశిష్ట సేవా పతకాలు, 31 మందికి ప్రశంసనీయ సేవా పతకాలు అందించనున్నారు.

వివిధ రాష్ట్రాలు, కేంద్ర పాలిత ప్రాంతాలు, కేంద్ర సాయుధ బలగాలలో పనిచేస్తూ దేశ భద్రత, శాంతిభద్రతల కోసం విశేష కృషి చేసిన వారి సేవలకు గుర్తింపుగా ఏటా ప్రభుత్వం ఈ పతకాలను ప్రకటిస్తుంది. స్వాతంత్ర్య దినోత్సవ వేడుకల్లో భాగంగా ఈ పతకాలను సిబ్బందికి అందజేస్తారు.