SIR 2025: నేడు దేశవ్యాప్తంగా SIR అమలుపై ఈసీ ప్రెస్‌మీట్
సర్‌ తొలి దశలో ఈసీఐ 10-15 రాష్ర్టాల్లో ఓటర్ల జాబితాను ప్రక్షాళన చేసే అవకాశం
పలు రాష్ర్టాల్లో ఓటర్ల ప్రత్యేక సమగ్ర సవరణ(సర్‌) ఎప్పుడు నిర్వహించేది సోమవారం కేంద్ర ఎన్నికల సంఘం(ఈసీఐ) వెల్లడించే అవకాశం కనిపిస్తున్నది. సోమవారం సాయంత్రం న్యూఢిల్లీలో జరిగే మీడియా సమావేశానికి రావ్సాలిందిగా ఈసీఐ ఆదివారం మీడియా సంస్థలకు ఆహ్వానం పంపింది. సమావేశ వివరాలను ఈసీఐ పేర్కొనకపోయినప్పటికీ, త్వరలో వివిధ రాష్ర్టాల్లో సర్‌ నిర్వహణ ఎప్పుడు నిర్వహిస్తారనేది వెల్లడించే అవకాశం ఉందని మీడియా వర్గాలు భావిస్తున్నాయి.
SIR మొదటి దశ 10 నుంచి 15 రాష్ట్రాలను కవర్ చేయనున్నట్లు సమాచారం. వీటిలో 2026 లో అసెంబ్లీ ఎన్నికలు జరగనున్న రాష్ట్రాలు కూడా ఉన్నాయి. కొత్త ఓటర్లను నమోదు చేయడం, మరణించిన వారి పేర్లను, నకిలీ ఎంట్రీలను తొలగించడం, బదిలీలు వంటి ఓటర్ల జాబితాను నవీకరించడం కోసం SIR ఒక కీలకమైన ప్రక్రియగా ఉపయోగపడుతుందని అధికారులు చెబుతున్నారు. ఎన్నికల కమిషన్ ముఖ్యంగా SIR అమలును త్వరలో ఎన్నికలు జరగనున్న తమిళనాడు, పశ్చిమ బెంగాల్, కేరళ, అస్సాం, పుదుచ్చేరి వంటి రాష్ట్రాలపై దృష్టి సారించింది. ఈ రాష్ట్రాలలో 2026 లో అసెంబ్లీ ఎన్నికలు జరగనున్నాయి.
మొదటి దశకు సంబంధించిన వివరణాత్మక షెడ్యూల్‌ను ఎన్నికల సంఘం అధికారులు సోమవారం సాయంత్రం విలేకరుల సమావేశంలో విడుదల చేయనున్నారు. వచ్చే ఏడాది ఎన్నికలు జరగనున్న రాష్ట్రాల్లో మొదటి దశ ప్రారంభమవుతుందని పలు వర్గాలు తెలిపాయి. తమిళనాడులో డీఎంకె, ఎఐఎడీఎంకెలు తీవ్ర పోటీలో ఉన్నాయి. పశ్చిమ బెంగాల్‌లో బీజేపీ వ్యతిరేకంగా అధికార టీఎంసీ పోటీ పడుతున్నాయి. కేరళలో ఎల్‌డిఎఫ్-యుడిఎఫ్ పోటీ, అస్సాంలో బీజేపీ బలమైన పట్టు, పుదుచ్చేరిలో కాంగ్రెస్-డీఎంకె కూటమి పాత్ర కీలకంగా ఉన్నాయి. ఈ రాష్ట్రాల్లో ఓటరు జాబితాలో ఏవైనా లోపాలు ఉంటే అది ఎన్నికల ఫలితాలను తీవ్రంగా ప్రభావితం చేస్తుంది. కాబట్టి ఈ రాష్ట్రాల్లో SIR నమోదు సకాలంలో చేయడం చాలా ముఖ్యం.
ఇటీవల సంవత్సరాలలో ఓటరు జాబితాను మరింత బలోపేతం చేయడానికి కమిషన్ డిజిటల్ టెక్నాలజీని ఉపయోగించుకుంది. ఓటరు హెల్ప్‌లైన్ యాప్‌లు, ఆన్‌లైన్ రిజిస్ట్రేషన్, బూత్ లెవల్ ఆఫీసర్ల (BLOలు) పాత్రను పెంచింది. SIR సమయంలో, ఇంటింటికి సర్వేలు, క్లెయిమ్‌లు, అభ్యంతరాలను ప్రాసెస్ చేయడం, ఫోటో ID కార్డులను నవీకరించడం వంటి పనులు చేస్తారు. మొదటి దశ తర్వాత, దేశవ్యాప్తంగా ఏకరీతి ప్రక్రియను నిర్ధారించడానికి ఇతర రాష్ట్రాలను దశలవారీగా SIR అమలులో చేర్చనున్నారు. రాజకీయ పార్టీలు ఓటర్ల నమోదు గురించి మరింత అప్రమత్తంగా ఉన్న సమయంలో ఈ ప్రకటన రావడం సంచలనం సృష్టించింది.