Vedamurti Devavrat: ప్రధాని ప్రశంసలందుకున్న 19 ఏళ్ల వేద పండితుడు.. ఎవరీ దేవవ్రత్..

భారతీయ సంస్కృతికి వేల సంవత్సరాల చరిత్ర ఉంది. వేదాలు, పురాణాలు, జీవన విధానాలను వివరించే అనేక గ్రంథాలు ఉన్నాయి. ఆధునిక సమాజంలోనూ ఆ సంప్రదాయ మూలాలను మర్చిపోకుండా వాటికి తగిన గౌరవాన్ని కలిపిస్తున్నారు దేవవ్రత్ లాంటి యువకులు. దేవవ్రత్ ఒక 19ఏళ్ల భారతీయ యువకుడు. అత్యంత పవిత్రమైన సంస్కృత గ్రంథాలలో ఒకటైన శుక్ల యజుర్వేదం నుండి ఒక అద్భుతమైన ఘనతను సాధించాడు. ప్రధానమంత్రి నరేంద్ర మోడీ చేత ప్రశంసలు అందుకున్నాడు.

వారణాసికి చెందిన ఈ యువ వేద పండితుడు దేవవ్రత్ మహేష్ రేఖే, శుక్ల యజుర్వేదం నుండి అత్యంత సవాలుతో కూడిన పారాయణంలో ఒకటైన దండక్రమ పారాయణం విజయవంతంగా పూర్తి చేశాడు. దీనిని వాజసనేయి సంహిత అని కూడా పిలుస్తారు. ఇది నాలుగు వేదాలలో ఒకటైన యజుర్వేదంలోని రెండు ప్రధాన శాఖలలో ఒకటి. రేఖే తన అరుదైన సాధనకు దేశవ్యాప్తంగా అపారమైన ప్రశంసలను పొందుతున్నాడు.

ఎవరీ దేవవ్రత్?

ఈ యువ పండితుడు తన తండ్రి మరియు గురువు అయిన వేదబ్రహ్మశ్రీ మహేష్ చంద్రకాంత్ రేఖేతో వేద సంప్రదాయం పట్ల లోతైన భక్తిని పంచుకుంటాడు.ఆయన అత్యున్నత వేద శాస్త్రవేత్తలలో ఒకరు. శుక్ల యజుర్వేద మధ్యందిన శాఖ యొక్క ప్రధాన పరీక్షకుడు. తండ్రి అడుగు జాడల్లో నడిచిన ఈ యువకుడు సంవత్సరాల తరబడి కఠినమైన శిక్షణను పొందాడు. తండ్రీకొడుకులు పురాతన హిందూ సంప్రదాయానికి తిరిగి జీవం పోస్తున్నారు.

కొంతమంది మాత్రమే వేదాలను అనుసరించి తమ జీవిత విధానాలను మార్చుకుంటారు. రేఖే శుక్ల యజుర్వేదంలోని మధ్యందినీ శాఖలోని 2000 మంత్రాలతో కూడిన దండక్రమ పారాయణాన్ని 50 రోజుల్లో విరామం లేకుండా పూర్తి చేశాడు. ఈ పారాయణంలో వివిధ వేద శ్లోకాలు మరియు పవిత్ర పదాలు ఉన్నాయి. వీటిని అతను పూర్తి క్రమశిక్షణతో దోషరహితంగా పఠించాడు.

ప్రధాని మోదీ ప్రశంశలు.. 

ప్రధాని మోదీ X ద్వారా దేవవ్రత్ ను ప్రశంసించారు. “19 ఏళ్ల వేదమూర్తి దేవవ్రత మహేష్ రేఖేని రాబోయే తరాలు గుర్తుంచుకుంటాయి! భారతీయ సంస్కృతి పట్ల మక్కువ ఉన్న ప్రతి వ్యక్తి శుక్ల యజుర్వేదంలోని మధ్యందిని శాఖలోని 2000 మంత్రాలతో కూడిన దండక్రమ పారాయణాన్ని 50 రోజుల్లో ఎటువంటి అంతరాయం లేకుండా పూర్తి చేసినందుకు అతడి పట్ల గర్వంగా ఉంది. ఇందులో అనేక వేద శ్లోకాలు, పవిత్ర పదాలు ఉన్నాయి. ఆయన మన గురు పరంపరలోని అత్యుత్తమమైన వాటిని మూర్తీభవించారు” అని పోస్ట్ లో ప్రధాని పేర్కొన్నారు.