MUNCIPAL POLLS: కార్పొరేషన్‌ పోరు: నిన్నటి మిత్రులు.. నేడు శత్రువులు!

సిరుల తల్లి సింగరేణి చెంత, కొత్తగూడెం-పాల్వంచ పురపాలికలు కలిసి నగరపాలికగా (కార్పొరేషన్) రూపాంతరం చెందడంతో పారిశ్రామిక ప్రాంతంలో రాజకీయ వేడి రాజుకుంది. 60 డివిజన్లతో ఏర్పాటైన ఈ నూతన కార్పొరేషన్‌లో మేయర్ పీఠాన్ని దక్కించుకోవడం ప్రధాన పార్టీలకు ప్రతిష్ఠాత్మకంగా మారింది. మిత్రుల మధ్య ‘సై’ అంటే ‘సై’ గత అసెంబ్లీ ఎన్నికల్లో కలిసి నడిచిన కాంగ్రెస్, సీపీఐలు ఇప్పుడు ఈ ఎన్నికల్లో ముఖాముఖి తలపడుతున్నాయి. మంత్రి పొంగులేటి శ్రీనివాసరెడ్డి పర్యవేక్షణలో అధికారాన్ని చేజిక్కించుకోవాలని కాంగ్రెస్ వ్యూహాలు రచిస్తుండగా, తన కంచుకోటను కాపాడుకునేందుకు ఎమ్మెల్యే కూనంనేని సాంబశివరావు శక్తివంచన లేకుండా కృషి చేస్తున్నారు.

 పార్టీల బలాబలాలు:

కాంగ్రెస్: అధికార బలం, సంక్షేమ పథకాలు కలిసివచ్చే అంశాలు. అయితే, టికెట్ల కేటాయింపులో పాత-కొత్త నేతల మధ్య సమన్వయ లోపం సవాలుగా మారింది.

సీపీఐ: కార్మిక సంఘాల మద్దతు, టీడీపీ సానుభూతిపరుల అండ సీపీఐకి బలం. కొందరు కౌన్సిలర్లు పార్టీని వీడటం బలహీనత.

భారాస: ఎంపీ వద్దిరాజు నేతృత్వంలో గత అభివృద్ధి పనులను నమ్ముకొని బరిలోకి దిగుతోంది.

భాజపా: పట్టణ ఓటర్లపై ఆశలు పెట్టుకుంది, అయితే క్షేత్రస్థాయిలో అభ్యర్థుల కొరత వేధిస్తోంది.

సుమారు రెండు దశాబ్దాల తర్వాత ఎన్నికల ముఖం చూస్తున్న పాల్వంచ వాసులతో పాటు, కొత్తగా చేరిన సుజాతనగర్ పంచాయతీల ఓటర్లు ఎవరి వైపు మొగ్గు చూపుతారనేది ఇప్పుడు ఆసక్తికరంగా మారింది.

ఈ ఎన్నికలు కేవలం కార్పొరేషన్ అభివృద్ధి కోసమే కాకుండా, జిల్లా రాజకీయాల్లో ఆధిపత్యం ఎవరిదో తేల్చే అగ్నిపరీక్షగా మారాయి. మంత్రి పొంగులేటి వ్యూహాలు పారుతాయా లేక కూనంనేని పట్టు నిలుస్తుందా అన్నది సర్వత్రా ఉత్కంఠ రేపుతోంది. ద్వితీయ శ్రేణి నాయకత్వంలో గందరగోళం ఉన్నప్పటికీ, అభ్యర్థుల ఎంపికలో ఏ చిన్న పొరపాటు జరిగినా అది ప్రధాన పార్టీల గెలుపు గుర్రాలపై ప్రభావం చూపే అవకాశం ఉంది.