Nicolas Maduro: అప్పటి స‌వాలే వెనిజులా అధ్యక్షుడి కొంప‌ముంచిందా? అన్నంత పని చేసి చూపించిన అమెరికా అధ్యక్షుడు..

వెనిజులాలో నాటకీయ పరిణామాల మధ్య ఆ దేశ అధ్యక్షుడు నికోలస్ మదురోను అమెరికా స్పెషల్ ఫోర్సెస్ అరెస్ట్ చేశాయి. శనివారం అర్ధరాత్రి రాజధాని కరాకస్‌లోని ఆయన నివాసంపై దాడి చేసి, మదురోతో పాటు ఆయన భార్య సిలియా ఫ్లోరెస్‌ను అదుపులోకి తీసుకున్నాయి. అనంతరం వారిని డ్రగ్ ట్రాఫికింగ్, అక్రమ ఆయుధాల కేసుల విచారణ నిమిత్తం ప్రత్యేక నౌకలో న్యూయార్క్ నగరానికి తరలించారు. ప్రస్తుతం వారిని బ్రూక్లిన్‌లోని మెట్రోపాలిటన్ డిటెన్షన్ సెంటర్‌లో ఉంచారు.

కొన్ని నెలల క్రితం తన అరెస్టుకు దారితీసే సమాచారంపై అమెరికా రివార్డును పెంచడంతో మదురో తీవ్రంగా స్పందించారు. "దమ్ముంటే అధ్యక్ష భవనానికి వచ్చి నన్ను పట్టుకోండి. నేను ఇక్కడే ఎదురుచూస్తా. ఆలస్యం చేయ‌కండి పిరికిపందల్లారా" అంటూ ఆగస్టులో అమెరికా అధ్యక్షుడు డొనాల్డ్ ట్రంప్‌కు సవాల్ విసిరారు. ఈ నేపథ్యంలో మదురో సవాల్ విసురుతున్న పాత వీడియోలు, అమెరికా దాడి ఫుటేజ్‌ను కలిపి వైట్‌హౌస్ ఆదివారం ఒక వీడియోను విడుదల చేసి ఎగతాళి చేసింది.

"ఆపరేషన్ అబ్సొల్యూట్ రిజాల్వ్" పేరుతో అమెరికా ఈ దాడిని చేపట్టింది. ఇందుకోసం అత్యంత నిపుణులైన కమాండోలతో కూడిన డెల్టా ఫోర్స్ దళాలను రంగంలోకి దించింది. మదురోను పట్టుకోవడానికి కేవలం 30 నిమిషాల సమయం పట్టినట్లు అధికారులు తెలిపారు. దాడి సమయంలో తన నివాసంలోని స్టీల్-రీఇన్‌ఫోర్స్డ్ సేఫ్ రూమ్‌లోకి పారిపోయేందుకు ప్రయత్నిస్తుండగా మదురోను పట్టుకున్నట్లు సమాచారం.

ఈ ఆపరేషన్ కోసం అమెరికా గూఢచారులు ఆగస్టు నుంచి మదురో కదలికలపై రహస్యంగా నిఘా పెట్టారు. ఆయన ప్రయాణాలు, నివాసం, ఆహారం వంటి ప్రతి అంశాన్ని నిశితంగా గమనించినట్లు జాయింట్ చీఫ్స్ ఛైర్మన్ జనరల్ డాన్ కెయిన్ తెలిపారు. మదురో నివసిస్తున్న ఇంటికి నమూనాను నిర్మించి, నెలల తరబడి ఈ ఆపరేషన్ కోసం రిహార్సల్స్ చేసినట్లు ట్రంప్ స్వయంగా వెల్లడించారు. ఈ ఆపరేషన్‌ను తాను ఒక టీవీ షో చూసినట్లుగా లైవ్‌లో వీక్షించానని ఆయన పేర్కొన్నారు.

మదురో, ఆయన భార్యపై నార్కో-టెర్రరిజం, అమెరికాలోకి టన్నుల కొద్దీ కొకైన్ స్మగ్లింగ్ చేయడం, అక్రమ ఆయుధాలు కలిగి ఉండటం వంటి తీవ్రమైన ఆరోపణలు నమోదు చేశారు. అయితే, ఈ ఆరోపణలను మదురో ఖండించారు. ప్రపంచంలోనే అతిపెద్ద చమురు నిల్వలు వెనిజులాలో ఉన్నందునే, తనను గద్దె దించడానికి అమెరికా కుట్ర పన్నుతోందని ఆయన ప్రత్యారోపణలు చేశారు.