Crude Oil : క్రూడాయిల్ మీద భారీ డిస్కౌంట్లు.. కొనుగోలు చేయమంటూ భారత్కు రష్యా ఆఫర్.
Crude Oil : ఆసియా మార్కెట్లో ఇప్పుడు రష్యా నుంచి వచ్చే ముడి చమురు గత ఏడాది కాలంలో ఎన్నడూ లేనంత భారీ తగ్గింపుతో లభిస్తోంది. డిసెంబర్ డెలివరీ కోసం రష్యా క్రూడ్ ఆయిల్ ధర బ్రెంట్ క్రూడాయిల్ ధర కంటే బ్యారెల్కు సుమారు $2 నుంచి $4 డాలర్లు తక్కువగా ఉంది. 2022లో మొదటిసారి ఆంక్షలు విధించినప్పుడు ఇచ్చిన 8డాలర్లు డిస్కౌంట్ అంత భారీగా లేకపోయినా, ఈ తగ్గింపు రష్యా చమురు ఆదాయ వనరులపై పెరుగుతున్న ఒత్తిడిని స్పష్టం చేస్తోంది. అయితే, ఇంత భారీ తగ్గింపు ఉన్నప్పటికీ, భారతదేశంలోని ప్రధాన చమురు శుద్ధి కర్మాగారాలు మాత్రం రష్యా నుంచి ఆర్డర్లు ఆపేశాయి.
ఆసియా మార్కెట్లో రష్యా ముడి చమురు ధర తగ్గడానికి ప్రధాన కారణం అమెరికా విధించిన కొత్త ఆంక్షలే. రష్యాకు చెందిన ప్రధాన చమురు కంపెనీలైన రోస్నెఫ్ట్, లుకోయిల్లపై అమెరికా కొత్తగా కఠిన ఆంక్షలు విధించింది. ఈ కంపెనీలతో లావాదేవీలు నిర్వహించే సంస్థలన్నీ నవంబర్ 21లోగా వ్యాపారాన్ని నిలిపివేయాలని అమెరికా ప్రభుత్వం డెడ్లైన్ విధించింది. ఈ ఒత్తిడి కారణంగా డిసెంబర్ డెలివరీ కోసం రష్యా క్రూడ్ ఆయిల్పై బ్రెంట్ క్రూడ్ కంటే బ్యారెల్కు సుమారు $2 నుంచి $4 డాలర్ల వరకు భారీ తగ్గింపు ఇవ్వాల్సి వస్తోంది. ఈ తగ్గింపు రష్యా చమురు ఆదాయ వనరులపై తీవ్ర ఒత్తిడిని సూచిస్తుంది.
అమెరికా విధించిన కొత్త ఆంక్షల వల్ల భారతదేశంలోని ప్రధాన చమురు శుద్ధి కర్మాగారాలు రష్యా నుంచి క్రూడ్ ఆయిల్ ఆర్డర్లను నిలిపివేశాయి. భారతదేశపు రష్యా చమురు దిగుమతుల్లో సుమారు 65% వాటాను కలిగి ఉన్న హిందుస్తాన్ పెట్రోలియం కార్పొరేషన్ లిమిటెడ్, భారత్ పెట్రోలియం కార్పొరేషన్ లిమిటెడ్, మంగళూరు రిఫైనరీ అండ్ పెట్రోకెమికల్స్ లిమిటెడ్, HPCL-మిట్టల్ ఎనర్జీ లిమిటెడ్, రిలయన్స్ ఇండస్ట్రీస్ లిమిటెడ్ వంటి సంస్థలు డిసెంబర్ డెలివరీ కోసం ఆర్డర్లను నిలిపివేశాయి.
అదేవిధంగా, చైనా ప్రభుత్వ చమురు కంపెనీలు కూడా ఈ ప్రధాన రష్యా సరఫరాదారుల నుంచి సముద్ర మార్గం ద్వారా వచ్చే చమురు కొనుగోలును తగ్గించాయి. ప్రస్తుతం ఆసియా మార్కెట్లో రష్యా చమురు విక్రయాలు రెండు పద్ధతుల్లో జరుగుతున్నాయి. పరిశ్రమ వర్గాల ప్రకారం.. ఇప్పుడు రష్యా క్రూడ్ మార్కెట్ రెండుగా చీలిపోయింది. ఒకవైపు, ఆంక్షలు ఉన్న సరఫరాదారులు లేదా ఓడల ద్వారా వచ్చే చమురుపై భారీ తగ్గింపులు ఇస్తున్నారు. మరోవైపు, ఆంక్షలు లేని సరఫరాదారులు తమ చమురును మెరుగైన ధరలకు విక్రయిస్తున్నారు. రష్యానే తన చమురును అమ్ముకోవడానికి ఇలా రెండు మార్గాలు అనుసరించాల్సిన పరిస్థితి ఏర్పడింది.
భారతదేశంలో రష్యా క్రూడ్ ఆయిల్ డిమాండ్లో వేగవంతమైన క్షీణత కనిపించింది, దీనివల్ల డిసెంబర్ నెలలో దిగుమతులు గణనీయంగా తగ్గే అవకాశం ఉంది. ఈ పరిణామాలు రష్యా ప్రభుత్వ బడ్జెట్, చమురు ఆదాయాలపై ప్రభావం చూపనున్నాయి.