India-US Trade Deal: అగ్రరాజ్యం మెడలు వంచిన భారత్..అక్షరాలా రూ.30 ట్రిలియన్ల మార్కెట్ మన సొంతం.

India-US Trade Deal: భారతదేశం, అమెరికా దేశాల మధ్య ఆర్థిక సంబంధాల్లో ఒక చారిత్రాత్మక ఘట్టం ఆవిష్కృతమైంది. ఇరు దేశాల మధ్య వాణిజ్య అడ్డంకులను తొలగిస్తూ, సుంకాలను భారీగా తగ్గిస్తూ ఒక శక్తివంతమైన ట్రేడ్ డీల్ ఫ్రేమ్‌వర్క్‎ను ప్రకటించారు. ఈ ఒప్పందం ద్వారా ఇరు దేశాల మధ్య వ్యాపార లావాదేవీలు సరికొత్త పుంతలు తొక్కనున్నాయి. ముఖ్యంగా రష్యా నుంచి చమురు దిగుమతుల విషయంలో అమెరికా పెట్టిన షరతులకు భారత్ అంగీకరించడంతో, డొనాల్డ్ ట్రంప్ సర్కార్ భారతీయ వస్తువులపై పన్నుల భారాన్ని గణనీయంగా తగ్గించింది.

భారత ఆర్థిక వ్యవస్థను మరో స్థాయికి తీసుకెళ్లేలా ఈ కొత్త వాణిజ్య ఒప్పందం కుదిరింది. ఈ ఒప్పందం ప్రకారం అమెరికా అధ్యక్షుడు డొనాల్డ్ ట్రంప్ భారతీయ వస్తువులపై ఉన్న 50 శాతం టారిఫ్‌ను కేవలం 18 శాతానికి తగ్గించారు. దీనికి ప్రతిగా భారత్ రష్యా నుంచి చమురు దిగుమతులను నిలిపివేసి అమెరికా, వెనిజులా దేశాల నుంచి చమురును కొనుగోలు చేయడానికి అంగీకరించింది. ఉక్రెయిన్ యుద్ధం నేపథ్యంలో రష్యాపై ఒత్తిడి పెంచేలా ట్రంప్ ఈ నిర్ణయం తీసుకున్నారు. శుక్రవారం ఆయన ఒక కార్యనిర్వాహక ఉత్తర్వుపై సంతకం చేయడంతో, ఈ పన్ను తగ్గింపులో సగం వెంటనే అమలులోకి వచ్చింది.

ఈ ఒప్పందంలో భాగంగా రాబోయే ఐదేళ్లలో భారత్ అమెరికా నుంచి సుమారు 500 బిలియన్ డాలర్ల విలువైన వస్తువులను కొనుగోలు చేయనుంది. ఇందులో చమురు, గ్యాస్, కోకింగ్ కోల్ వంటి ఇంధన వనరులతో పాటు విమానాలు, విమాన భాగాలు, అత్యాధునిక సాంకేతిక పరిజ్ఞానమైన ఆర్టిఫిషియల్ ఇంటెలిజెన్స్‎కి సంబంధించిన గ్రాఫిక్స్ ప్రాసెసింగ్ యూనిట్లు ఉన్నాయి. మరోవైపు అమెరికా నుంచి దిగుమతి అయ్యే పప్పుధాన్యాలు, సోయాబీన్ నూనె, గింజలు, మద్యం వంటి వ్యవసాయ, పారిశ్రామిక ఉత్పత్తులపై భారత్ కూడా సుంకాలను రద్దు చేయనుంది లేదా భారీగా తగ్గించనుంది.

భారత కేంద్ర వాణిజ్య శాఖ మంత్రి పీయూష్ గోయల్ ఈ ఒప్పందాన్ని స్వాగతించారు. దీనివల్ల భారతీయ ఎగుమతిదారులకు అక్షరాలా 30 ట్రిలియన్ డాలర్ల విలువైన అమెరికా మార్కెట్ తలుపులు తెరుచుకున్నాయని ఆయన ఆనందం వ్యక్తం చేశారు. దీనివల్ల ముఖ్యంగా మన రైతులు, మత్స్యకారులు, ఎంఎస్ఎంఈ రంగాలకు భారీ ప్రయోజనం చేకూరనుంది. వచ్చే మార్చి నెల నాటికి ఈ ఒప్పందంపై పూర్తిస్థాయిలో అధికారిక సంతకాలు జరుగుతాయని, అప్పటి నుంచి పూర్తిస్థాయి పన్ను మినహాయింపులు అమల్లోకి వస్తాయని ఆయన ధీమా వ్యక్తం చేశారు.

అయితే, కేవలం పన్నులే కాకుండా పాలనాపరమైన అడ్డంకులను తొలగించడానికి కూడా ఇరు దేశాలు అంగీకరించాయి. వైద్య పరికరాలు, వ్యవసాయ ఉత్పత్తులు మరియు కమ్యూనికేషన్ పరికరాల దిగుమతులకు సంబంధించి అంతర్జాతీయ భద్రతా ప్రమాణాలను గుర్తిస్తూ ఆరు నెలల్లోగా ఒక తుది నివేదికను రూపొందించనున్నారు. చైనా నుంచి ఎదురవుతున్న వాణిజ్య పోటీని తట్టుకోవడానికి, సరఫరా గొలుసును బలోపేతం చేయడానికి ఈ భారత్-అమెరికా బంధం అత్యంత కీలకంగా మారనుంది.