pakistan : తండ్రితో గొడవపడి పీవోకే నుంచి భారత్‌లోకి ప్రవేశించిన మహిళ!

నియంత్రణ రేఖ వెంబడి జమ్మూ కశ్మీర్‌ సరిహద్దుల్లో పూంఛ్ జిల్లా వద్ద పాకిస్థాన్ ఆక్రమిత కశ్మీర్‌కు చెందిన మహిళ అక్రమంగా ప్రవేశించింది. దీనిని గమనించిన ఆర్మీ అధికారులు ఆ మహిళను అదుపులోకి తీసుకున్నారు. అనంతరం ఆరా తీయగా పీఓకే కోట్లి జిల్లా గిమ్మా ప్రాంతానికి చెందిన షెహ్‌నాజ్ అక్తర్‌గా (35) ఆమెను గుర్తించారు. అయితే, తన తండ్రితో గొడవపడి ఇంట్లో నుంచి వచ్చేసినట్టు ఆమె వెల్లడించింది. సరిహద్దుల్లోని బాలాకోట్‌ సెక్టార్‌‌లోని డబ్బీ ప్రాంతంలో డిసెంబరు 16న మంగళవారం నాడు అనుమానాస్పదంగా తిరుగుతున్న మహిళను అరెస్టు చేసినట్లు ఆర్మీ అధికారులు తెలిపారు. విచారణలో తండ్రితో గొడవపడి.. ఇంటి నుంచి పారిపోయి వచ్చి, భారత్‌లోకి ప్రవేశించినట్లు తెలిపిందని అన్నారు.

ఆమె అనుకోకుండా భారత్‌లోకి ప్రవేశించిందా? ఉద్దేశపూర్వకంగా ఏదైనా కారణాలు ఉన్నాయా? అనే కోణంలో దర్యాప్తు చేస్తున్నట్టు చెప్పారు. విచారణ అనంతరం ఆ మహిళను పోలీసులకు అప్పగిస్తామని ఆర్మీ అధికారులు పేర్కొన్నారు. దీని వెనుక ఉగ్రవాద చర్యలు ఉన్నాయా? అనేది అనుమానిస్తున్నారు. ఎందుకుంటే ఇటీవల పాకిస్థాన్‌కు చెందిన జైషే మహమ్మద్ ఉగ్రవాద సంస్థ మహిళా విభాగం ఏర్పాటుచేసింది జీహాదీలుగా మార్చి భారత్‌లో దాడులకు ప్రయత్నిస్తున్నట్టు నిఘా నివేదికలు వచ్చాయి. ఈ సమయంలో ఆ మహిళ దేశంలోకి చొరబడటంతో అప్రమత్తమయ్యారు.

ఇక, ఆపరేషన్ సిందూర్ తర్వాత జమ్మూ కశ్మీర్ సరిహద్దుల్లో కొంత ప్రశాంతమైన పరిస్థితి ఉంది. కానీ, నియంత్రణ రేఖ వెంబడి మళ్లీ ఉగ్రవాదుల కదలికలు పెరుగుతున్నాయని నిఘా వర్గాలు హెచ్చరిస్తున్నాయి. పాక్ ప్రేరేపిత ఉగ్రమూకలు లష్కరే తొయిబా, జైషే మహమ్మద్లు సమన్వయ దాడికి సిద్ధమవుతున్నట్లు ఇంటెలిజెన్స్ వర్గాలు గుర్తించాయి. ఈ క్రమంలో సెప్టెంబర్ నుంచి చొరబాట్లు, గూఢచర్యం, సరిహద్దు లాజిస్టిక్స్ కార్యకలాపాలను ఉగ్రవాద సంస్థలు గణనీయంగా పెంచినట్టు వెలుగులోకి వచ్చింది. లష్కరే, జైషేలకు చెందిన అనేక యూనిట్లు పాక్ గూఢచారి సంస్థ ఐఎస్ఐ, పాకిస్థాన్ స్పెషల్ సర్వీసెస్ గ్రూప్ సాయంతో చొరబాటు మార్గాల ద్వారా కశ్మీర్‌లోకి ప్రవేశించాయని నివేదికల్లో వెల్లడైంది. ఉగ్రవాది షంషేర్ నేతృత్వంలో లష్కరే తొయిబా యూనిట్ డ్రోన్ల సహాయంతో ఏరియల్ సర్వే చేసి, .సరిహద్దుల్లో బలహీనంగా ఉన్న ప్రాంతాలను గుర్తించినట్టు సమాచారం.