Trump-Obama: ఏలియన్లు నిజమేనన్న ఒబామా.. చాలా పెద్ద తప్పు చేశారన్న ట్రంప్

అమెరికా మాజీ అధ్యక్షుడు బరాక్ ఒబామాపై ప్రస్తుత అధ్యక్షుడు డొనాల్డ్ ట్రంప్ సంచలన ఆరోపణలు చేశారు. ఒబామా అత్యంత రహస్యమైన వర్గీకృత సమాచారాన్ని  బయటపెట్టారని ట్రంప్ ఆరోపించారు. ఏలియన్లు (గ్రహాంతరవాసులు) నిజమేనంటూ ఒబామా ఇటీవల చేసిన వ్యాఖ్యల నేపథ్యంలో ట్రంప్ ఈ విధంగా స్పందించారు.

ఎయిర్ ఫోర్స్ వన్ విమానంలో ప్రయాణిస్తున్న ట్రంప్‌ను ఫాక్స్ న్యూస్ రిపోర్టర్ ఒక ప్రశ్న అడిగారు. "బరాక్ ఒబామా ఏలియన్లు నిజమేనన్నారు. భూమిని గ్రహాంతరవాసులు సందర్శించినట్లు మీకేమైనా ఆధారాలు కనిపించాయా?" అని ప్రశ్నించారు. దీనికి ట్రంప్ బదులిస్తూ, "ఆయన వర్గీకృత సమాచారాన్ని బయటపెట్టారు. అలా చేయకూడదు. చాలా పెద్ద తప్పు చేశారు" అని అన్నారు. ఏలియన్లు నిజమా? కాదా? అని పదేపదే అడగ్గా "వాళ్లు నిజమో కాదో నాకు తెలియదు. కానీ ఆయన రహస్య సమాచారాన్ని బయటపెట్టారనే విషయం మాత్రం చెప్పగలను" అని బదులిచ్చారు.

ఇటీవల ఒక పాడ్‌కాస్ట్ ఇంటర్వ్యూలో ఒబామా మాట్లాడుతూ.. "ఏలియన్లు నిజమే, కానీ నేను వారిని చూడలేదు. వారిని ఏరియా 51లో దాచిపెట్టలేదు" అని సరదాగా వ్యాఖ్యానించారు. అయితే, తన వ్యాఖ్యలపై దుమారం రేగడంతో ఒబామా సోషల్ మీడియా ద్వారా వివరణ ఇచ్చారు. "ఈ విశ్వం చాలా పెద్దది. గణాంకాల ప్రకారం ఎక్కడో ఒకచోట జీవం ఉండే అవకాశం ఉంది. కానీ, సౌర వ్యవస్థల మధ్య దూరం చాలా ఎక్కువ. నా అధ్యక్ష పదవీకాలంలో ఏలియన్లు మనల్ని సంప్రదించినట్లు ఎలాంటి ఆధారాలు చూడలేదు" అని స్పష్టం చేశారు.

గతంలో కూడా ట్రంప్ పలుమార్లు ఏలియన్లు, యూఎఫ్‌వోల గురించి మాట్లాడారు. వాటిపై తనకు పెద్దగా నమ్మకం లేదని, అయితే ఏదైనా సాధ్యమేనని ఆయన వ్యాఖ్యానించిన విషయం తెలిసిందే.