AP: ఏపీలో జనన, మరణాల నమోదుకు కొత్త నిబంధనలు

ఆంధ్రప్రదేశ్ రాష్ట్ర ప్రజలకు ప్రభుత్వం కీలక ఆదేశాలు జారీ చేసింది. రాష్ట్రంలో జననాలు, మరణాల నమోదుకు సంబంధించిన నిబంధనలను సవరించి కొత్త విధానాన్ని అమల్లోకి తీసుకువచ్చింది. వైద్యారోగ్య శాఖ విడుదల చేసిన తాజా ఉత్తర్వుల ప్రకారం, ఇకపై రాష్ట్రవ్యాప్తంగా ప్రతి జననం, మరణం తప్పనిసరిగా 21 రోజుల లోపు నమోదు చేయాలి. ప్రజలు ఈ విషయాన్ని తప్పనిసరిగా గమనించాలని అధికారులు సూచిస్తున్నారు. కొత్త నిబంధనల ప్రకారం, శిశువు పుట్టిన తేదీ లేదా వ్యక్తి మరణించిన తేదీ నుంచి 21 రోజుల లోపు సంబంధిత స్థానిక సంస్థలో నమోదు చేయాలి. ఈ గడువులో నమోదు చేస్తే ఎలాంటి అపరాధ రుసుము ఉండదు. అయితే 21 రోజుల గడువు దాటితే కొన్ని అదనపు నిబంధనలు అమల్లోకి వస్తాయి. పుట్టిన లేదా మరణించిన తేదీ నుంచి 21 నుండి 30 రోజుల మధ్యలో నమోదు చేసుకోవాలనుకుంటే రూ.25 అపరాధ రుసుము చెల్లించాల్సి ఉంటుంది. ఇది ఆలస్య రుసుముగా పరిగణించబడుతుంది. 30 రోజుల గడువు దాటితే మరింత కఠినమైన నిబంధనలు వర్తిస్తాయి. 30 రోజుల నుంచి ఒక సంవత్సరం లోపు నమోదు చేయాలంటే రూ.250 అపరాధ రుసుము చెల్లించడమే కాకుండా, జిల్లా రిజిస్ట్రార్ నుంచి ప్రత్యేక అనుమతి కూడా తీసుకోవాలి. అంటే సాధారణ ప్రక్రియ కాకుండా అధికారిక అనుమతి అవసరం అవుతుంది. ఇంకా ఒక సంవత్సరం గడువు పూర్తయ్యాక జననం లేదా మరణం నమోదు చేయాలనుకుంటే మరింత కఠినమైన విధానం అమలులో ఉంటుంది. ఏడాది దాటిన తర్వాత నమోదు చేయాలంటే తప్పనిసరిగా జిల్లా మేజిస్ట్రేట్ లేదా ఆర్డీవో (రెవెన్యూ డివిజనల్ ఆఫీసర్) నుంచి ఆదేశాలు పొందాలి. అదనంగా రూ.500 అపరాధ రుసుము చెల్లించాల్సి ఉంటుంది.

శిశువు పుట్టిన సమయంలో కొందరు తల్లిదండ్రులు వెంటనే పేరును నమోదు చేయకపోవడం సాధారణమే. ఈ విషయాన్ని కూడా ప్రభుత్వం స్పష్టంచేసింది. శిశువు జననం నమోదు సమయంలో పేరు నమోదు చేయకపోయినా, పుట్టిన తేదీ నుంచి ఒక సంవత్సరం లోపు ఉచితంగా పేరు చేర్చుకునే అవకాశం ఉంటుంది. అయితే ఏడాది దాటిన తర్వాత పేరు నమోదు చేయాలంటే రూ.250 అపరాధ రుసుము చెల్లించాల్సి ఉంటుంది. అందువల్ల తల్లిదండ్రులు గడువు లోపే పేరు నమోదు చేయడం మంచిదని సూచిస్తున్నారు. ప్రభుత్వం ఈ మార్పులు ఎందుకు తీసుకువచ్చిందంటే, జననాలు మరియు మరణాల ఖచ్చితమైన గణాంకాలు ప్రభుత్వానికి అవసరం. సంక్షేమ పథకాలు, ఆరోగ్య సేవలు, విద్యా సదుపాయాలు వంటి అంశాల ప్రణాళికలో ఈ డేటా కీలక పాత్ర పోషిస్తుంది. సమయానికి నమోదు చేయకపోతే ఆధార్, రేషన్ కార్డు, పాఠశాల ప్రవేశాలు, ఆస్తి హక్కులు వంటి అనేక సేవల్లో సమస్యలు తలెత్తే అవకాశముంది. కాబట్టి ప్రజలు మూడు వారాల గడువును తప్పనిసరిగా పాటించాలని ప్రభుత్వం కోరుతోంది. ఇదిలా ఉండగా, రాష్ట్ర ప్రభుత్వం నర్సింగ్ విద్యా ప్రవేశాలకు సంబంధించి కూడా కీలక నిర్ణయం తీసుకుంది. నాలుగేళ్ల బీఎస్సీ నర్సింగ్ కోర్సులో ప్రవేశాలకు 2026-27 విద్యా సంవత్సరంనుంచి నీట్-యూజీ (NEET-UG) పరీక్షను అర్హత పరీక్షగా పరిగణించనున్నారు. కన్వీనర్ మరియు మేనేజ్‌మెంట్ కోటాల్లో సీట్ల భర్తీకి కూడా ఈ పరీక్షలో సాధించిన అర్హతను ఆధారంగా తీసుకుంటారు.