AP: ఆంధ్రప్రదేశ్‌ని వణికిస్తున్న చిన్న కీటకం
ఏపీని ఒక చిన్నకీటకం వణికిస్తోంది. పచ్చగా ఉంటే పల్లెలను చావుదెబ్బ కొడుతోంది. స్క్రబ్ టైఫస్ అనే నల్లిని పోలిన కీటకం.. గ్రామీణ ప్రాంతాలపై సర్జికల్ స్ట్రైక్ చేస్తోంది. స్క్రబ్ టైఫస్ జ్వరాల కేసులు రోజురోజుకీ రెట్టింపు సంఖ్యలో పెరుగుతుండటంతో.. ప్రజలు బెంబేలెత్తిపోతున్నారు. ఈ ఏడాది జనవరి 1 నుంచి నవంబర్ 26 వరకు ఏకంగా 6,678 అనుమానిత కేసులు నమోదగా.. 1,317 మందికి పాజిటివ్ వచ్చినట్లు అధికారులు నిర్ధారించారు. ఈ కేసుల సంఖ్య చూస్తే.. సమస్య తీవ్రత ఏ స్థాయిలో ఉందో అర్థమవుతోంది. రికెట్సియా కుటుంబానికి చెందిన ఓరియంటియా సుట్సుగముషి అనే బ్యాక్టీరియా వల్ల స్క్రబ్ టైఫస్ వస్తుంది. ఇది నల్లిని పోలిన చిగ్గర్ మైట్ అనే సూక్ష్మకీటకం. ఇది సోకిన వెంటనే శరీరంపై నల్లటి ఎస్కార్ మచ్చ కనిపిస్తోంది. తరువాత జ్వరం, వణుకు, తలనొప్పి, కండరాల నొప్పులు, జీర్ణ సమస్యలు అన్ని వరుసగా తలెత్తుతాయి. సకాలంలో వైద్యం అందించకపోతే.. ARDS వంటి తీవ్ర శ్వాస సమస్యలతో పాటు మెనింజైటిస్, కిడ్నీ వైఫల్యం వంటి ప్రాణాపాయ పరిస్థితులు ఎదురయ్యే ఛాన్స్ ఎక్కువగా ఉంది. చికిత్స ఆలస్యం అయ్యే కొద్దీ మరణాల రేటు 6 నుంచి 30 శాతం వరకు పెరిగే అవకాశం ఉంది.
ఇంత ప్రమాదకరమైన స్క్రబ్ టైఫస్‌ను గుర్తించడం కూడా కష్టమే. స్క్రబ్ టైఫస్ లక్షణాలు.. మలేరియా, డెంగీ, టైఫాయిడ్‌కు చాలా దగ్గరగా ఉంటాయి. అందుకే చాలామంది సరైన పరీక్షలు చేయించుకోరు. దీంతో చికిత్స ఆలస్యం అవుతుంది. ఫలితంగా ప్రమాద తీవ్రత మరింత ఎక్కువై ప్రాణాలు పోయే పరిస్థితి ఏర్పడవచ్చు. ఈ స్క్రబ్ టైఫస్ కీటకాల ప్రభావ ఆగస్టు నుంచి ఫిబ్రవరి వరకు అధికంగా ఉంటుంది. ఈ కాలంలో పొలాల్లో, తోటల్లో, పశువుల పాకల్లో పనిచేసేవారికి ఇదే సోకే ప్రమాదం ఎక్కువ. ముఖ్యంగా పిల్లలు దీని భారీన ఎక్కువగా పడుతుంటారు. దీనికి అప్రమత్తతే రక్షణగా చెప్పుకోవచ్చు. పంట పొలాలు, తడి నేలలు, పొదల్లో పని చేసేప్పుడు.. శరీరాన్ని పూర్తిగా కవర్ చేసేలా దుస్తులు ధరించడం బెటర్. కుదిరితే సాక్సులు, బూట్లు వేసుకోవడం మంచిది. అలాగే ఇంట్లో పాత మంచాలు, పరుపులు, దిండ్లు శుభ్రం చేసి వాడాలి. ముఖ్యంగా పిల్లలకు చేతులు, కాళ్లు కప్పేలా దుస్తులు వేయాలి. ఒకవేళ శరీరంపై నల్లటి మచ్చ, దద్దుర్లు కనిపిస్తే వెంటనే.. స్క్రబ్ టైఫస్ ELISA పరీక్ష చేయించుకుంటే..అన్ని విధాల శ్రేయస్కరం. స్క్రబ్ టైఫస్‌కు చికిత్స కూడా అందుబాటులోనే ఉంది. సరైన సమయంలో యాంటీబయాటిక్స్ తీసుకుంటే రోగి పూర్తిగా కోలుకోగలడు. కానీ సమస్య గుర్తించడంలో ఉండే ఆలస్యం ప్రాణాంతకం కావచ్చు. ప్రతీ ఒక్కరూ జాగ్రత్తలు పాటించడం తప్పనిసరి.