AP: మరో సంచలన నిర్ణయం దిశగా ఏపీ సర్కార్
ఆంధ్రప్రదేశ్లో ఇటీవల చోటుచేసుకున్న బాణసంచా పేలుళ్ల ఘటనలు రాష్ట్రవ్యాప్తంగా తీవ్ర ఆందోళనకు కారణమయ్యాయి. అనేక చోట్ల అజాగ్రత్తగా బాణసంచా నిల్వ చేయడం, భద్రతా నిబంధనలు పాటించకపోవడం వల్ల జరిగిన ప్రమాదాల్లో పలువురు ప్రాణాలు కోల్పోవడంతో పాటు అనేక మంది గాయపడిన ఘటనలు నమోదయ్యాయి. ఈ నేపథ్యంలో భవిష్యత్తులో ఇలాంటి ప్రమాదాలు పునరావృతం కాకుండా కఠిన చర్యలు తీసుకోవాలని రాష్ట్ర ప్రభుత్వం నిర్ణయించింది. బాణసంచా పేలుళ్లకు కారణమయ్యే నిర్వాహకులపై కఠిన చర్యలు తీసుకోవడంతో పాటు వారి ఆస్తులను కూడా జప్తు చేసి బాధితులకు అందించేలా చర్యలు చేపట్టేందుకు ప్రభుత్వం సిద్ధంగా ఉందని రాష్ట్ర హోంమంత్రి వంగలపూడి అనిత స్పష్టంచేశారు.
శాసనసభలో ఆంధ్రప్రదేశ్ అగ్నిమాపక సేవల చట్టానికి సవరణ బిల్లును ప్రవేశపెట్టిన సందర్భంగా ఆమె ఈ విషయాన్ని వెల్లడించారు. సభ ఆమోదం అనంతరం మాట్లాడిన హోంమంత్రి అనిత, రాష్ట్రంలో అగ్ని ప్రమాదాలను నివారించేందుకు చట్టంలో మార్పులు చేయడం అవసరమైందని పేర్కొన్నారు. ఇటీవల జరిగిన కొన్ని ప్రమాదాలు ప్రభుత్వాన్ని ఆలోచనలో పడేశాయని, ముఖ్యంగా బాణసంచా నిల్వలు, పేలుడు పదార్థాల నిర్వహణలో నిర్లక్ష్యం కారణంగా భారీ నష్టాలు జరుగుతున్నాయని ఆమె చెప్పారు. అందుకే ఇలాంటి ఘటనలను అరికట్టేందుకు ప్రభుత్వం కఠిన చర్యలు తీసుకునే దిశగా ముందుకెళ్తోందని వివరించారు. బాణసంచా పేలుళ్లకు కారణమైన నిర్వాహకులు లేదా బాధ్యులపై కేవలం కేసులు నమోదు చేయడం మాత్రమే కాకుండా, వారి ఆస్తులను కూడా జప్తు చేసే విధానాన్ని ప్రభుత్వం పరిశీలిస్తున్నట్లు ఆమె తెలిపారు. ప్రమాదాల్లో గాయపడినవారికి లేదా ప్రాణాలు కోల్పోయిన వారి కుటుంబాలకు నష్టపరిహారం అందించేందుకు ఈ ఆస్తులను వినియోగించేలా చర్యలు తీసుకునే అవకాశముందని హోంమంత్రి స్పష్టం చేశారు. ప్రజల ప్రాణాల విషయంలో ప్రభుత్వం ఎట్టి పరిస్థితుల్లోనూ రాజీ పడదని ఆమె హెచ్చరించారు. తప్పు చేసిన వారిని వదిలే ప్రసక్తే లేదన్నారు.