CBN: ప్రతిపక్షాలది జాతి విద్రోహమే: చంద్రబాబు
పార్లమెంట్లో మహిళా రిజర్వేషన్ బిల్లు ఆమోదం పొందకపోవడం రాజకీయంగా తీవ్ర ప్రతిస్పందనలకు దారితీస్తోంది. ఈ నేపథ్యంలో చంద్రబాబు ప్రతిపక్షాల వైఖరిపై తీవ్రంగా స్పందించారు. మహిళలకు చట్టసభల్లో 33 శాతం ప్రాతినిధ్యం కల్పించే అవకాశాన్ని అడ్డుకోవడం దేశానికి నష్టం కలిగించేదిగా ఆయన అభివర్ణించారు. మీడియాతో మాట్లాడిన ఆయన, ఈ పరిణామాన్ని దేశ చరిత్రలో “బ్లాక్ డే”గా పేర్కొన్నారు. మహిళల సాధికారతకు దోహదపడే కీలక బిల్లును అడ్డుకోవడం ద్వారా కాంగ్రెస్ మరియు దాని మిత్రపక్షాలు తప్పు చేశాయని విమర్శించారు. మహిళల ఓట్లు అడగడానికి ఇప్పుడు ప్రతిపక్షాలకు నైతిక హక్కు లేదని ప్రశ్నించారు. ఈ నిర్ణయం వల్ల మహిళల ఆత్మగౌరవం దెబ్బతిన్నదని పేర్కొన్నారు. ఇక ఈ అంశంపై ప్రజల్లో అవగాహన కల్పిస్తామని, రాబోయే ఎన్నికల్లో దీనిని ప్రధాన అంశంగా తీసుకెళ్తామని ఆయన స్పష్టం చేశారు. మహిళలకు న్యాయం జరగాలంటే ఇలాంటి సంస్కరణలను అడ్డుకోవద్దన్నారు.
తూర్పు గోదావరి జిల్లా నిడదవోలులో ఎన్డీఏ భాగస్వామ్య పక్షాలు నిరసన ర్యాలీ చేపట్టాయి. ఈ ర్యాలీలో సీఎం చంద్రబాబు పాల్గొన్నారు. మహిళా రిజర్వేషన్ బిల్లును అడ్డుకోవడం ద్రోహమంటూ నేతలు ప్లకార్డులతో నిరసన తెలిపారు. ఈ ర్యాలీలో కూటమి నేతలు మాధవ్, కందుల దుర్గేశ్, సోము వీర్రాజు తదితరులు పాల్గొన్నారు. ఈ సందర్భంగా చంద్రబాబు మాట్లాడారు. ‘రిజర్వేషన్లు వస్తాయని మహిళలు ఆశపడ్డారు. పార్లమెంట్లో కాంగ్రెస్, మిత్ర పక్షాలు మహిళా బిల్లును అడ్డుకున్నాయి. మహిళలకు ద్రోహం చేయడం జాతి విద్రోహం. మహిళలను గౌరవించి.. అన్ని రంగాల్లో ఆదరించడం మన సంస్కృతి. సంస్కృతి, సంప్రదాయాలకు భిన్నంగా ద్రోహం చేశారు. ఇది ప్రారంభం మాత్రమే. మహిళా లోకమంతా ఏకమైంది’’ ‘‘చిన్న రాష్ట్రాలకు నష్టం జరుగుతుందని విపక్షాలు ఆరోపించాయి. దక్షిణాది, ఈశాన్య, చిన్న రాష్ట్రాలకు అన్యాయం జరగదని కేంద్రం స్పష్టత ఇచ్చింది. మహిళల రిజర్వేషన్ల కోసం మూడు దశాబ్దాలుగా పోరాడుతున్నాం. పోరాడి సాధించుకునే సమయంలో అడ్డుకోవడం క్షమించరాని నేరం. విపక్ష పార్టీలు ఎన్నికల్లో ఏ ముఖం పెట్టుకుని ఓట్లు అడుగుతాయి’’ అని చంద్రబాబు ధ్వజమెత్తారు.