Crime: అక్రమ సంబంధానికి అడ్డుగా ఉందని మూడేళ్ల పాపను చంపిన దుర్మార్గుడు

నిజామాబాద్‌ జిల్లా బోధన్‌ మండలం కల్దుర్తిలో దారుణం జరిగింది. ఆకలి అని ఏడ్చినందుకు మద్యం మత్తులో ఉన్న వ్యక్తి అమ్ములు అనే మూడేళ్ల చిన్నారిని దారుణంగా హత్య చేశాడు. ఈ ఘటన ఆలస్యంగా వెలుగులోకి వచ్చింది. వివరాల్లోకి వెళితే..నిర్మల్ జిల్లాకు చెందిన ఓ మహిళ భర్తకు దూరంగా ఉంటుంది. కూలీ పని చేసుకుంటూ జీవనం కొనసాగిస్తున్న ఈమెకు మూడేళ్ల పాప ఉంది. ఈ క్రమంలోనే ఆమెకు నిజామాబాద్ జిల్లా వెల్దుర్తికి చెందిన సంజీవ్‌ అనే వ్యక్తితో పరిచయం ఏర్పడింది. పరిచయం కాస్త అక్రమ సంబంధానికి దారి తీసింది. దీంతో సదరు మహిళ ప్రియుడి గ్రామంలోనే కూతురితో కలిసి నివాసముంటుంది. ఈ నేపథ్యంలో అర్థరాత్రి పాప ఆకలితో ఏడ్చింది ఆ సమయంలో మద్యం మత్తులో ఉన్న సంజీవ్‌ చిన్నారిని కర్రతో కొట్టి, గొంతు నులిమి హత్య చేశాడు. అనంతరం మృతదేహాన్ని చెరువు గట్టు వద్ద పడేశాడు. ఈ విషయం వెలుగులోకి రావడంతో రంగంలోకి దిగిన పోలీసులు నిందితుడు సంజీవ్‌పై కేసు నమోదు చేసి దర్యాప్తు చేస్తున్నారు.