Pawan Kalyan : పవన్ భద్రతకు ముప్పు.. రెక్కీ చేయించారా..?
ఏపీ డిప్యూటీ సీఎం పవన్ కళ్యాణ్ భద్రతకు ముప్పు వాటిల్లుతోందా.. అగంతకులు ఆయన మీద కుట్రలు చేస్తున్నారా అంటే అవుననే అంటున్నారు జనసైనికులు. ఈ మేరకు జనసేన పార్టీ తీవ్ర ఆందోళన చేస్తూ ఒక విషయాన్ని బయట పెట్టింది. మొన్న పవన్ కళ్యాణ్ అంబేద్కర్ కోనసీమ జిల్లాలో కొబ్బరి తోటల పరిశీలనకు వెళ్ళినప్పుడు ఒక ఘటన జరిగింది. పవన్ కళ్యాణ్ తోటలను పరిశీలిస్తున్న సమయంలో ఒక అగంతకుడు అత్యంత సమీపంలో కనిపించాడు. పవన్ కళ్యాణ్ కు చాలా దగ్గరలో అతని కదలికలు కనిపించాయి. ఇంతకీ అతను ఎవరు అనేది ఇప్పుడు జనసైనికుల్లో పెరిగిన ఆందోళన. ఎందుకంటే పవన్ కళ్యాణ్ సామాన్యమైన వ్యక్తి కాదు ఒక డిప్యూటీ సీఎం. ఆయన చుట్టూ పటిష్టమైన భద్రత ఉంటుంది అలాంటప్పుడు అంత ఈజీగా ఒక అగంతకుడు పవన్ దగ్గర దాకా ఎలా వెళ్లగలిగాడు. అతను జనసేన వ్యక్తి కాదు, అభిమాని అంతకన్నా కాదు. పోలీసులు, డిప్యూటీ సీఎం ఆఫీస్ ఆరా తీస్తే అతను రాజోలుకు చెందిన వైసిపి కార్యకర్త అని తేలింది.
సాధారణంగా ఏపీలో వైసీపీ కార్యకర్తలు కూటమినేతల కార్యక్రమాలకు అస్సలు రారు. పైగా అతని కదలికలు కూడా చాలా అనుమానాస్పదంగా కనిపిస్తున్నాయి. ఒక అభిమానిగా అత్యుత్సాహంతో దగ్గరకు వచ్చినట్లు అస్సలు లేవు. దీంతో పవన్ భద్రతపై ఇప్పుడు ఆందోళన మొదలైంది. ఎందుకంటే ఏపీలో సీఎం చంద్రబాబు నాయుడు, డిప్యూటీ సీఎం పవన్ కళ్యాణ్, మంత్రి నారా లోకేష్ సామాన్యులకు అతి దగ్గరగా వెళ్లి కలుస్తున్నారు. ప్రజల దగ్గరకు వెళ్తూ వాళ్ల సమస్యలు అడిగి తెలుసుకుంటున్నారు. అంతేగాని జగన్ లాగా పరదాలు కట్టుకొని ప్రజల్లోకి వెళ్ళట్లేదు. జగన్ సీఎంగా ఉన్నప్పుడు బయటకు వెళ్లాలంటే అతి భారీ భద్రతతో వెళ్లేవాడు. ప్రజలను కూడా దగ్గరగా కలిసేవాడు కాదు. రైతులను పరామర్శించాలన్నా సరే పొలాల మధ్య సెట్లు వేయించుకుని దూరం నుంచే రైతులతో మాట్లాడేవాడు. కానీ ఇప్పుడు కూటమి ప్రభుత్వం వచ్చాక అలాంటి పరదాలు, అతి భారీ భద్రతలు లేకుండా సాదాసీదాగా వెళుతూ ప్రజలతో మమేకమవుతున్నారు నేతలు.
ఈ రకమైన పరిస్థితులు ఏపీకి ఇప్పుడు చాలా అవసరం. నేతలకు ప్రజలకు మధ్య ఎలాంటి అడ్డుగోడలు లేవని చెప్పాల్సిన అవసరం ఉంది. అందుకే కూటమినేతలు ఎలాంటి అడ్డుగోడలు పెట్టుకోకుండా ప్రజల దగ్గరికి వెళ్తూ వాళ్ల కోసమే తాము ఉన్నాం అనే భరోసా ఇస్తున్నారు. ఇలాంటి సమయంలో పవన్ కళ్యాణ్ ను వైసీపీ నేతలు ఈ మధ్య చాలా టార్గెట్ చేస్తున్నారు. సోషల్ మీడియాలో కూడా పవన్ కళ్యాణ్ టార్గెట్ గా అత్యంత దారుణంగా పోస్టులు పెడుతున్నారు. ప్రెస్ మీట్లో కూడా పవన్ ను అవమానిస్తున్నారు. ఇప్పుడు ఏకంగా పవన్ కళ్యాణ్ చుట్టూ భద్రతపై రెక్కి చేయించారేమో అని అనుమానాలు పెరుగుతున్నాయి. కాబట్టి పవన్ కళ్యాణ్ భద్రతను మరింత పెంచాల్సిన అవసరం ఉంది అంటున్నారు జనసైనికులు.