Apple : యాపిల్ నుంచి మరో ఎస్ఈ ఫోన్ .. వీ59 కోడ్ నేమ్ తో డిజైన్

యాపిల్ కంపెనీ తయారుచేసే ఎస్‌ఈ మోడల్స్ కు మంచి క్రేజ్ ఉంది. తక్కువ రేటులో కాంపాక్ట్‌ సైజ్‌లో వచ్చే స్పెషల్‌ ఎడిషన్లకు సెపరేట్‌ ఫ్యాన్‌బేస్‌ కూడా ఉంది. సాధారణంగా ఐఫోన్‌లు పెద్దమొత్తం పెట్టి కొనలేని వారికోసం ఎస్‌ఈ మోడళ్లను యాపిల్‌ తీసుకొస్తూ ఉంటుంది. 2016, 2020, 2022లో మూడు ఎస్‌ఈ మోడళ్లను యాపిల్‌ తీసుకొచ్చింది. తర్వాత ఎస్‌ఈ మోడల్‌ గురించి ఇప్పటివరకు యాపిల్‌ ఏ ప్రకటనా చేయలేదు. అయితే, తదుపరి తరం ఐఫోన్‌ ఎస్‌ఈ మోడల్‌ సిద్ధమవుతున్నట్లు తెలుస్తోంది. కొత్త ఐఫోన్ ఎస్‌ఈ మోడల్‌ను వీ59 అనే కోడ్‌ నేమ్‌తో రూపొందిస్తోందని తెలిసింది. యాపిల్‌ వచ్చే ఏడాది తీసుకురాబోయే ఐప్యాడ్‌ ఎయిర్‌ మోడళ్లతో పాటు కొత్త ఎస్‌ఈని లాంచ్‌ చేయాలని భావిస్తోంది. కొత్త ఎస్‌ఈలో 5జీని కూడా జోడించనుంది. పాతతరం హోమ్‌ బటన్‌కూ స్వస్తి పలికి.. రెగ్యులర్‌ ఐఫోన్ల మాదిరిగానే ఎడ్జ్‌-టు- ఎడ్జ్‌ స్క్రీన్‌ తీసుకురావాలనుకుంటోందని సంబంధిత వర్గాలు పేర్కొన్నాయి. ఐఫోన్‌ 16 సిరీస్‌లో తీసుకొచ్చిన యాపిల్‌ ఇంటెలిజెన్స్‌ను కూడా ఎస్‌ఈ మోడల్‌లో జోడించనున్నారని టాక్‌. గత ఎస్‌ఈ మోడల్‌ను ఐఫోన్‌ 8ను పోలిన డిజైన్‌తో తీసుకొచ్చారు. ఈసారి డిజైన్‌ ఎలా ఉండబోతున్నదీ ఆసక్తికరంగా మారింది. ఐఫోన్‌ 14ను పోలి ఉండబోతోందన్న రూమర్స్‌ వినిపిస్తున్నాయి. మరోవైపు యాపిల్ ఐప్యాడ్‌ ఎయిర్‌ మోడళ్లను జే607, జే637 కోడ్‌ నేమ్స్‌తో యాపిల్‌ రూపొందిస్తున్నట్లు సమాచారం. మ్యాజిక్‌ కీబోర్డులను, మ్యాక్‌ కంప్యూటర్‌ లైనప్‌ను సైతం యాపిల్‌ సిద్ధం చేస్తున్నట్లు తెలుస్తోంది.