APPLE: యాపిల్ సీవోవోగా భారత సంతతి వ్యక్తి
ప్రముఖ టెక్‌ దిగ్గజం యాపిల్ నాయకత్వ బాధ్యతల్లో కీలక మార్పులు చేసింది. యాపిల్ తదుపరి చీఫ్ ఆపరేటింగ్ ఆఫీసర్(సీవోవో)గా భారత సంతతికి చెందిన సబీహ్ ఖాన్‌ను నియమించింది. చీఫ్ ఆపరేటింగ్ ఆఫీసర్ జెఫ్ విలియమ్స్‌ కంపెనీని వీడనుండటంతో.. ఆ బాధ్యతలను ప్రస్తుత యాపిల్ సీనియర్ వైస్ ప్రెసిడెంట్ సబీహ్ ఖాన్ ఈనెల చివరలో స్వీకరించనున్నారు. ఇక డిజైనింగ్‌ టీమ్‌ బాధ్యతలను సంస్థ సీఈవో టిమ్ కుక్ స్వీకరించనున్నారు. ఈ విషయాన్ని టెక్‌ పత్రిక ది వెర్జ్‌ వెల్లడించింది.
భారత మూలాలున్న వ్యక్తికి కీలక బాధ్యతలు
జెఫ్ విలియమ్స్‌ స్థానంలో బాధ్యతలు స్వీకరించనున్న సబీహ్ ఖాన్‌కు సంస్థలో 30 ఏళ్ల అనుభవం ఉంది. గత ఆరేళ్లుగా యాపిల్ గ్లోబెల్‌ సప్లై ఛైన్‌ ఇన్‌ఛార్జిగా వ్యవహరిస్తున్నారు. ఉత్పత్తి కార్యకలాపాలనూ పర్యవేక్షిస్తున్నారు. సబీహ్ ఖాన్ భారత సంతతికి చెందినన వ్యక్తి. ఆయన ఉత్తరప్రదేశ్‌ మొరాదాబాద్‌ జిల్లాలో 1966వ సంవత్సరంలో జన్మించారు. అక్కడే ఫిఫ్త్‌ గ్రేడ్‌ వరకు చదువుకున్నారు. ఆ తర్వాత సబీహ్ ఖాన్ కుటుంబం సింగపూర్‌కు వలస వెళ్లింది. అక్కడే పాఠశాల విద్యాభ్యాసం ముగించి అమెరికాకు వెళ్లారు. టఫ్ట్స్ యూనివర్సిటీ నుంచి ఎకనామిక్స్‌, మెకానికల్‌ ఇంజినీరింగ్‌లో బ్యాచిలర్స్‌ డిగ్రీ పూర్తి చేశారు. ఆ తర్వాత రెన్సెలార్ పాలిటెక్నిక్ ఇన్‌స్టిట్యూట్ నుంచి మెకానికల్‌ ఇంజినీరింగ్‌లో మాస్టర్స్‌ పట్టా అందుకున్నారు. తర్వాత జీఈ ప్లాస్టిక్స్‌లో డెవలప్‌మెంట్‌ ఇంజినీర్‌, అకౌంట్‌ టెక్నికల్‌ లీడర్‌గా విధులు నిర్వహించారు.
యాపిల్‌లో సబీహ్ ఖాన్ ప్రస్థానం
1995లో సబీహ్ ఖాన్ ఆయన యాపిల్ ప్రొక్యూర్‌మెంట్‌ గ్రూప్‌లో పనిచేశారు. అప్పటి నుంచి యాపిల్ గ్లోబల్ సప్లై చైన్, తయారీ, సేకరణ, లాజిస్టిక్స్, ఉత్పత్తి సరఫరా వంటి కీలక విభాగాలలో పనిచేశారు. గత ఆరేళ్లుగా యాపిల్ గ్లోబల్ సప్లై చైన్‌కు నేతృత్వం వహిస్తున్నారు. 2019 నుంచి యాపిల్ కార్యకలాపాల సీనియర్ వైస్ ప్రెసిడెంట్‌గా ఉన్నారు. అధునాతన తయారీలో కొత్త సాంకేతికతలను అభివృద్ధి చేయడంలో, యునైటెడ్ స్టేట్స్‌లో యాపిల్ తయారీ విస్తరణను పర్యవేక్షించడంలో, పర్యావరణ స్థిరత్వ ప్రయత్నాలను ముందుకు తీసుకెళ్లడంలో సబీహ్ ఖాన్ కీలక పాత్ర పోషించారు. ఇక ఈనెల చివరి వారంలో చీఫ్ ఆపరేటింగ్ ఆఫీసర్‌గా సబీహ్ ఖాన్ బాధ్యతలు స్వీకరిస్తారు.
కీలక సమయంలో రంగంలోకి ఖాన్
ప్రస్తుతం యాపిల్ తన సాఫ్ట్‌వేర్‌ డిజైన్‌లో విప్లవాత్మక మార్పులు తీసుకొచ్చేందుకు వీలుగా లిక్విడ్‌ గ్లాస్‌ డిజైన్‌ను సిద్ధం చేస్తోంది. వీటిని ఐఫోన్‌, ఐపాడ్‌, మ్యాక్‌ సహా ఇతర పరికరాల్లో వాడనుంది. ‘లిక్విడ్‌ గ్లాస్‌’ డిజైన్‌తో ఇంటర్‌ఫేస్‌లో పలు మార్పులు రానున్నాయి. బటన్లు, మెనూ, యాప్‌ ఐకాన్స్‌, విడ్జెట్ల మార్పుతో స్క్రీన్‌కు కొత్త లుక్‌ రానుంది. కంపెనీ చరిత్రలో ఇది విస్తృతమైన డిజైన్‌ అప్‌డేట్‌గా యాపిల్ ఇప్పటికే ప్రకటించింది.
భారతదేశం యాపిల్ సంస్థకు ప్రధాన మార్కెట్‌గా, తయారీ కేంద్రంగా మారుతున్న క్రమంలో సబీహ్ ఖాన్ నియామకం చాలా ప్రాముఖ్యతను సంతరించుకుంది. గ్లోబల్ సప్లై చైన్, తయారీలో విస్తృతమైన అనుభవం ఉండటం యాపిల్‌కు మరింత ప్రయోజనం చేకూరుస్తుందని విశ్లేషకులు భావిస్తున్నారు. ఈ నియామకం భవిష్యత్తులో కంపెనీ వ్యూహాత్మక నిర్ణయాలపై ప్రభావం చూపుతుందని చెబుతున్నారు. సబీహ్ ఖాన్‌ను 'గొప్ప వ్యూహకర్త' అని, ఆపిల్ సప్లై చైన్‌కు కీలక రూపశిల్పి అని స్వయంగా యాపిల్ సీఈఓ టిమ్ కుక్ ప్రశంసించారు.