BMW : బిఎమ్డబ్ల్యూ ఎలక్ట్రిక్ కార్ల జోరు.. లగ్జరీ ఈవీ మార్కెట్లో 80% వాటా.. సంపన్నుల ఫేవరెట్ ఇదే.
BMW : లగ్జరీ కార్ల ప్రపంచంలో ఇప్పుడు ఎలక్ట్రిక్ వాహనాల హవా నడుస్తోంది. ముఖ్యంగా సంపన్నుల మనసు గెలుచుకోవడంలో జర్మన్ కార్ల దిగ్గజం BMW దూసుకుపోతోంది. 2026 ప్రారంభంలోనే ఈ కంపెనీ ఎలక్ట్రిక్ కార్ల మార్కెట్లో అడుగుపెట్టడమే కాకుండా, తిరుగులేని ఆధిపత్యాన్ని ప్రదర్శిస్తోంది. కేవలం మూడు నెలల్లోనే కంపెనీ అమ్మకాలు 83 శాతం వృద్ధి చెందడం ఇప్పుడు అందరినీ ఆశ్చర్యపరుస్తోంది. 2026 సంవత్సరం బీఎండబ్ల్యూ పాలిట అద్భుతమైన సంవత్సరంగా మొదలైంది. లగ్జరీ కార్ల మార్కెట్లో పోటీ ఎన్ని ఉన్నా, ఎలక్ట్రిక్ వెహికల్ విభాగంలో ఈ కంపెనీ బలమైన ముద్ర వేసింది. జనవరి నుంచి మార్చి 2026 మధ్య కాలంలో కంపెనీ మొత్తం 1,185 ఎలక్ట్రిక్ వాహనాలను విక్రయించింది. గతేడాదితో పోలిస్తే ఇది 83 శాతం భారీ వృద్ధి. విశేషమేమిటంటే, ప్రస్తుతం అమ్ముడవుతున్న ప్రతి నాలుగు బిఎమ్డబ్ల్యూ కార్లలో ఒకటి ఖచ్చితంగా ఎలక్ట్రిక్ కారు కావడం గమనార్హం.
బిఎమ్డబ్ల్యూ సాధించిన ఈ అద్భుత విజయానికి ప్రధాన కారణం BMW iX1 మోడల్. కంపెనీ మొత్తం ఈవీ అమ్మకాల్లో ఈ ఒక్క మోడల్ వాటాయే 80 శాతం వరకు ఉంది. దీనికి ప్రధాన కారణం దీని ధర. రూ.51.40 లక్షల (ఎక్స్-షోరూమ్) ప్రారంభ ధరతో లభిస్తుండటంతో, లగ్జరీ కార్లను ఇష్టపడేవారు దీనికి మొదటి ప్రాధాన్యత ఇస్తున్నారు. అందుకే రోడ్ల మీద కూడా iX, i5, i7 వంటి ఇతర మోడళ్ల కంటే iX1 ఎక్కువగా కనిపిస్తోంది.
పెర్ఫార్మెన్స్ విషయంలోనూ iX1 ఎక్కడా తగ్గదు. ఇందులోని ఎలక్ట్రిక్ మోటార్ 204 BHP పవర్, 250 NM టార్క్ను ఉత్పత్తి చేస్తుంది. కేవలం 8.6 సెకన్లలోనే 0 నుంచి 100 కి.మీ వేగాన్ని అందుకోవడం దీని ప్రత్యేకత. ఒకసారి ఫుల్ ఛార్జ్ చేస్తే దాదాపు 531 కిలోమీటర్ల వరకు ప్రయాణించవచ్చు. ఇది సుదూర ప్రయాణాలకు కూడా ఎంతో అనుకూలం. దీని బ్యాటరీపై కంపెనీ 8 ఏళ్లు లేదా 1.6 లక్షల కిలోమీటర్ల వరకు వారంటీని కూడా అందిస్తోంది.
బిఎమ్డబ్ల్యూ అంటేనే లగ్జరీకి మారుపేరు. iX1 లో సిగ్నేచర్ కర్వ్డ్ డిస్ప్లే ఉంటుంది, ఇందులో 10.7 అంగుళాల టచ్స్క్రీన్, 10.25 అంగుళాల డిజిటల్ ఇన్స్ట్రుమెంట్ క్లస్టర్ ఉన్నాయి. కేబిన్కు విలాసవంతమైన లుక్ ఇచ్చేందుకు పెద్ద పనోరమిక్ గ్లాస్ రూఫ్ ఉంది. మ్యూజిక్ ప్రియుల కోసం 12 స్పీకర్ల హర్మాన్ కార్డాన్ సౌండ్ సిస్టమ్ అమర్చారు. సేఫ్టీ పరంగా 8 ఎయిర్బ్యాగ్లు, ఆధునిక సేఫ్టీ ఫీచర్లతో ఈ కారు సంపన్నుల మనసు గెలుచుకుంది.