Credit Card : క్రెడిట్ కార్డు వాడుతున్నారా..అయితే చేయకూడని 3 పెద్ద తప్పులు ఇవే.

Credit Card : ఈ రోజుల్లో క్రెడిట్ కార్డులు అవసరంగా మారాయి. ముఖ్యంగా ఉద్యోగాలు చేసే యువత షాపింగ్ నుంచి వివిధ బిల్లుల చెల్లింపుల వరకు క్రెడిట్ కార్డులను విరివిగా ఉపయోగిస్తున్నారు. క్రెడిట్ కార్డును సరిగ్గా ఉపయోగించినట్లయితే డిస్కౌంట్లు, రివార్డ్ పాయింట్లు, రకరకాల ఆఫర్లతో ప్రయోజనం పొందవచ్చు. అయితే క్రెడిట్ కార్డు అనేది ఒక రకమైన అప్పు లాంటిది కాబట్టి, దాన్ని వాడేటప్పుడు కొన్ని విషయాలు తెలియకపోతే, ఇది తీవ్రమైన ఆర్థిక కష్టాల్లోకి నెట్టేస్తుంది. కాబట్టి క్రెడిట్ కార్డు వాడుతున్నట్లయితే, ఎటువంటి ఆర్థిక నష్టం జరగకుండా ఉండాలంటే ఏ తప్పులు చేయకూడదో తెలుసుకుందాం.

1. క్రెడిట్ కార్డుతో నగదు తీయవద్దు

క్రెడిట్ కార్డు వినియోగంలో చేయకూడని అత్యంత పెద్ద తప్పులలో ఒకటి- క్యాష్ తీసుకోవడం. మీరు క్రెడిట్ కార్డుతో ఏటీఎం నుండి నగదు తీసినట్లయితే, మొదటి రోజు నుంచే దానిపై భారీ వడ్డీ వసూలు చేయడం మొదలవుతుంది. అంతేకాకుండా నగదు విత్ డ్రా కోసం అదనపు ఛార్జీలు కూడా విధిస్తారు. దీనివల్ల వడ్డీ, ఛార్జీలు కలిపి మీకు తీవ్రమైన ఆర్థిక భారం అవుతుంది. అందుకే అత్యవసరం అయితే తప్ప క్రెడిట్ కార్డు ద్వారా క్యాష్ తీయకుండా ఉండటం మంచిది.

2. లిమిట్‌కు మించి ఖర్చు చేయవద్దు

ప్రతి క్రెడిట్ కార్డుకు ఒక ఖర్చు చేసే లిమిట్ ఉంటుంది. ఆ లిమిట్‌కు మించి ఖర్చు చేయకుండా ఉండటం చాలా ముఖ్యం. ఉదాహరణకు, మీ కార్డు లిమిట్ రూ. 30,000 అనుకుంటే, మీరు దానిలో 30% నుంచి 50% లోపే ఖర్చు చేయడానికి ప్రయత్నించాలి. మీరు క్రెడిట్ లిమిట్‌కు మించి ఖర్చు చేసినా లేదా లిమిట్‌కు చాలా దగ్గరగా ఖర్చు చేసినా, అది మీ క్రెడిట్ స్కోర్‌ను తీవ్రంగా దెబ్బతీస్తుంది. క్రెడిట్ స్కోరు తగ్గితే, భవిష్యత్తులో గృహ రుణాలు లేదా ఇతర రుణాలు తీసుకోవడానికి ప్రయత్నించినప్పుడు ఇబ్బందులు ఎదురవుతాయి.

3. మినిమం డ్యూ కట్టడం మానుకోండి

క్రెడిట్ కార్డు బిల్లు బకాయి ఉన్నప్పుడు మినిమం డ్యూ మాత్రమే చెల్లించడం చాలామంది చేసే మరో పెద్ద పొరపాటు. మీరు కనీస మొత్తాన్ని మాత్రమే చెల్లించినట్లయితే, మిగిలిన మొత్తంపై బ్యాంకులు చక్రవడ్డీ వేయడం ప్రారంభిస్తాయి. ఈ వడ్డీ రేటు సాధారణంగా సంవత్సరానికి 36% నుంచి 48% వరకు చాలా ఎక్కువగా ఉంటుంది. అందుకే ఎప్పుడూ కూడా క్రెడిట్ కార్డు బిల్లును పూర్తిగా చెల్లించడానికి ప్రయత్నించాలి. ఒకవేళ మొత్తం బిల్లు చెల్లించలేని పరిస్థితి ఉంటే, క్రెడిట్ కార్డు వాడకాన్ని పూర్తిగా తగ్గించి, వీలైనంత త్వరగా బిల్లు మొత్తాన్ని పూర్తిగా క్లియర్ చేయడానికి ప్రయత్నించాలి.