Upcoming Cars : క్రెటా కోటను బద్దలు కొట్టేందుకు వస్తున్న 4 సూపర్ ఎస్‌యూవీలు..మార్చి నుంచే బుకింగ్స్ షురూ.

Upcoming Cars : భారతదేశ ఆటోమొబైల్ మార్కెట్‌లో మిడ్-సైజ్ ఎస్‌యూవీ సెగ్మెంట్ ప్రస్తుతం హాట్ కేకుల్లా అమ్ముడవుతోంది. ముఖ్యంగా హ్యుందాయ్ క్రెటా ఈ విభాగంలో రారాజుగా వెలుగొందుతోంది. అయితే క్రెటా ఆధిపత్యానికి గట్టి పోటీ ఇచ్చేందుకు రెనాల్ట్, నిస్సాన్, స్కోడా, ఫోక్స్‌వ్యాగన్ వంటి దిగ్గజ సంస్థలు నడుం బిగించాయి. రాబోయే నెలల్లో సరికొత్త ఫీచర్లు, పవర్‌ఫుల్ ఇంజన్లతో కొత్త మోడళ్లు మార్కెట్లోకి అడుగుపెట్టబోతున్నాయి. మీరు కూడా కొత్త ఎస్‌యూవీ కొనాలనుకుంటున్నారా? అయితే క్రెటా కంటే మెరుగైన ఆప్షన్లుగా నిలవబోతున్న ఈ కార్లపై ఒక కన్నేయండి.

మొదటగా చెప్పుకోవాల్సింది రెనాల్ట్ డస్టర్ గురించి. ఒకప్పుడు ఇండియాలో ఎస్‌యూవీ ట్రెండ్‌ను సెట్ చేసిన డస్టర్, ఇప్పుడు సరికొత్త అవతారంలో తిరిగి వస్తోంది. ఇది 2026 మార్చి 17 నుంచి మార్కెట్‌లో అందుబాటులోకి రానుంది, ఏప్రిల్ నుంచి డెలివరీలు ప్రారంభం కానున్నాయి. పాత మోడల్ కంటే ఇది చాలా స్టైలిష్‌గా, ప్రీమియం ఇంటీరియర్‌తో వస్తోంది. ఇందులో 1.0 లీటర్, 1.3 లీటర్ టర్బో పెట్రోల్ ఇంజన్లు ఉన్నాయి, ఇవి 100 నుంచి 163 పీఎస్ పవర్‌ను ఉత్పత్తి చేస్తాయి. అయితే ఇందులో ఆల్-వీల్ డ్రైవ్ లేకపోవడం కాస్త నిరాశ కలిగించే విషయమే అయినా, దీని లుక్స్ మాత్రం అదిరిపోతాయి.

స్కోడా అభిమానులకు కూడా ఒక తీపి కబురు ఉంది. స్కోడా కుషాక్ ఫేస్‌లిఫ్ట్ మార్చిలో లాంచ్ కానుంది. ఈ కొత్త మోడల్‌లో మునుపటి కంటే మెరుగైన స్టైలింగ్, లగ్జరీ ఇంటీరియర్స్ ఉండబోతున్నాయి. ముఖ్యంగా 1.0 లీటర్ టర్బో పెట్రోల్ ఇంజన్‌తో పాటు కొత్తగా 8-స్పీడ్ టార్క్ కన్వర్టర్ ఆటోమేటిక్ గేర్‌బాక్స్‌ను ప్రవేశపెడుతున్నారు. ఇక పవర్‌ఫుల్ డ్రైవింగ్ కోరుకునే వారి కోసం 150bhp ఇచ్చే 1.5 లీటర్ టర్బో పెట్రోల్ ఇంజన్ ఆప్షన్ ఎలాగూ ఉంటుంది. అదేవిధంగా ఫోక్స్‌వ్యాగన్ కూడా తమ టైగూన్ ఫేస్‌లిఫ్ట్ ను సిద్ధం చేస్తోంది. ఇది చూడటానికి ఫోక్స్‌వ్యాగన్ ఐడీ 4 ఎలక్ట్రిక్ కారును పోలి ఉండి, పనోరమిక్ సన్‌రూఫ్, మసాజ్ ఫంక్షన్ సీట్ల వంటి హై-ఎండ్ ఫీచర్లతో రానుంది.

చివరగా నిస్సాన్ నుంచి టెక్టాన్ అనే సరికొత్త ఎస్‌యూవీ రాబోతోంది. ఇది నిజానికి కొత్త రెనాల్ట్ డస్టర్ ప్లాట్‌ఫామ్ పైనే తయారవుతున్నప్పటికీ, దీని డిజైన్ పూర్తిగా వేరుగా ఉంటుంది. జూన్ 2026 కల్లా ఇది షోరూమ్‌లలో దర్శనమిచ్చే అవకాశం ఉంది. కనెక్టెడ్ ఎల్‌ఈడీ డీఆర్ఎల్స్, సరికొత్త బ్రాండింగ్‌తో ఈ కారు చాలా మోడ్రన్‌గా కనిపిస్తుంది. క్రెటాకు ప్రత్యామ్నాయంగా ఈ కార్లు మార్కెట్లోకి వస్తే ప్రయాణికులకు ఎంపికలు పెరగడమే కాకుండా, పోటీ కారణంగా కార్ల ధరలు కూడా తగ్గే అవకాశం ఉంది.