Komaki MX16 Pro :పెట్రోల్ కు గుడ్ బై.. కేవలం రూ.15 తో 200 కి.మీ మైలేజ్ ఇచ్చే ఎలక్ట్రిక్ క్రూజర్ వచ్చేసింది.

Komaki MX16 Pro : ఈ రోజుల్లో కొత్త ఎలక్ట్రిక్ వాహనాలు చాలా వస్తున్నాయి. వాటిలో తాజాగా కోమాకి ఎలక్ట్రిక్ కంపెనీ ఒక కొత్త ఎలక్ట్రిక్ క్రూజర్ బైక్‌ను విడుదల చేసింది. దీని పేరు కోమాకి ఎమ్‌ఎక్స్‌16 ప్రో. ఈ బైక్ చూడటానికి బాగుండటమే కాదు తక్కువ ఖర్చుతో చాలా దూరం వెళ్తుంది. ఎక్కువ కాలం మన్నికగా ఉంటూ, తక్కువ మెయింటెనెన్స్ ఖర్చు కోరుకునే వారికి ఈ బైక్ చాలా నచ్చుతుంది.

ఈ బైక్ ఎంత మైలేజ్ ఇస్తుందో తెలిస్తే మీరు ఆశ్చర్యపోతారు. ఇందులో 5kW BLDC మోటార్, 4.5kWh బ్యాటరీ ఉన్నాయి. ఒక్కసారి పూర్తిగా ఛార్జ్ చేస్తే ఇది 160 నుంచి 220 కిలోమీటర్ల దూరం వెళ్తుంది. కోమాకి కంపెనీ చెప్పిన దాని ప్రకారం.. కేవలం రూ.15 నుంచి రూ.20 ఖర్చుతో దాదాపు 200 కిలోమీటర్లు ప్రయాణించవచ్చు. అదే దూరం పెట్రోల్ బైక్‌లో వెళ్లాలంటే సుమారు రూ.700 ఖర్చు అవుతుంది. ఈ బైక్ గంటకు 80 కిలోమీటర్ల వేగంతో వెళ్తుంది.

కోమాకి ఎమ్‌ఎక్స్‌16 ప్రో బైక్ రెండు రంగుల్లో దొరుకుతుంది. డ్యుయల్ టోన్ (రెండు రంగుల కలయిక), జెట్ బ్లాక్. దీని ఎక్స్-షోరూమ్ ధర రూ.1,69,999గా ఉంది. బైక్‌ను సురక్షితంగా ఆపడానికి ఇందులో మూడు డిస్క్ బ్రేక్‌లు ఉన్నాయి (ముందు ఒకటి, వెనుక ఒకటి, ఇంకో అదనపు డిస్క్). అంతేకాదు ఇందులో చాలా మోడ్రన్ ఫీచర్లు కూడా ఉన్నాయి. దీనిలో కంప్లీట్ కలర్ టీఎఫ్టీ డిస్ ప్లే, బ్లూటూత్ కనెక్టవిటీ, క్రూయిజ్ కంట్రోల్, రివర్స్ అలర్ట్, రీజెనరేటివ్ బ్రేకింగ్, ఆటో-రిపేర్ స్విచ్, పార్క్ అసిస్ట్ వంటివి కూడా ఉన్నాయి.

ఈ బైక్‌కు పోటీగా రూ.2 లక్షల లోపు ధరలో దొరికే ఇతర ఎలక్ట్రిక్ బైక్‌లలో ఓలా రోస్టర్ ఎక్స్ ప్లస్ ఉంది. దీని ధర రూ.1,29,999 నుంచి మొదలవుతుంది. అలాగే రివోల్ట్ ఆర్‌వీ400 ధర రూ.1,49,950, ఓబెన్ రోర్ ఈజీ 4.4kWh బ్యాటరీతో దీని ధర రూ.1,29,999లు ఉన్నాయి. ఈ ధరలు కేవలం ఎక్స్-షోరూమ్ ధరలు మాత్రమే. బైక్ కొనేటప్పుడు ఇన్సూరెన్స్, రిజిస్ట్రేషన్ వంటి అదనపు ఖర్చులు కూడా ఉంటాయి.