Gold Price : పసిడి ప్రియులకు గుడ్ న్యూస్..ఒక్కరోజే రూ.24,000 తగ్గిన వెండి..అదే దారిలో బంగారం.

Gold Price : బులియన్ మార్కెట్‌లో గత కొన్ని రోజులుగా సాగుతున్న ధరల సునామీకి ఒక్కసారిగా బ్రేక్ పడింది. ఆకాశమే హద్దుగా దూసుకుపోతున్న పసిడి, వెండి ధరలు శుక్రవారం నాడు కుప్పకూలాయి. కొనుగోలుదారులకు షాక్ ఇస్తూ రికార్డులు సృష్టించిన బంగారం, వెండి ధరలు నేడు ఒక్కసారిగా ధారాపాతంగా పడిపోయాయి. వెండి ధర ఏకంగా రూ.24,000 తగ్గడం విశేషం.

గత కొన్ని రోజులుగా చుక్కలను చూపిస్తున్న బంగారం, వెండి ధరలు శుక్రవారం నాడు ఒక్కసారిగా కుప్పకూలాయి. జనవరి 29న ఆల్ టైమ్ హై రికార్డులను తాకిన ధరలు, 30వ తేదీ ఉదయం కల్లా భారీగా తగ్గాయి. మల్టీ కమోడిటీ ఎక్స్ఛేంజ్‎లో పసిడి, వెండి ధరలు భారీగా నష్టపోయాయి. ముఖ్యంగా ఇన్వెస్టర్లు ఒక్కసారిగా ప్రాఫిట్ బుకింగ్‌కు మొగ్గు చూపడంతో మార్కెట్‌లో ఈ అమ్మకాల ఒత్తిడి కనిపించింది. నిన్నటి వరకు ఆకాశంలో ఉన్న ధరలు నేడు నేలకు దిగిరావడంతో సామాన్య కొనుగోలుదారులకు కొంత ఉపశమనం లభించింది.

MCX మార్కెట్‌లో బంగారం ధర సుమారు 5.55 శాతం మేర క్షీణించింది. బంగారం ధర నేడు రూ.9,402 తగ్గి రూ.1,60,001 వద్ద ట్రేడ్ అవుతోంది. అంటే కేవలం 24 గంటల వ్యవధిలో పది గ్రాముల బంగారంపై దాదాపు 9 వేల రూపాయల పైగా తగ్గడం ఒక రికార్డు అని చెప్పవచ్చు. అంతర్జాతీయ మార్కెట్‌లో కూడా స్పాట్ గోల్డ్ ధరలు తగ్గడం దీనికి ప్రధాన కారణంగా కనిపిస్తోంది.

వెండి విషయంలో పరిస్థితి ఇంకా దారుణంగా ఉంది. నిన్న కిలో వెండి ధర రూ.4,20,048 వద్ద రికార్డు సృష్టించగా, నేడు 4.18 శాతం తగ్గి రూ. 3,83,177కు చేరుకుంది. ఇక రిటైల్ మార్కెట్‌లో అయితే వెండి ధర ఏకంగా రూ.23,360 తగ్గి రూ.3,79,130 వద్ద ఉంది. ఒకే రోజులో పాతిక వేల రూపాయల వరకు తగ్గడం అంటే అది మామూలు విషయం కాదు. ఇన్నాళ్లూ పెరిగిన ధరలను చూసి బెంబేలెత్తిన సామాన్యులు, ఇప్పుడు ధరలు తగ్గడంతో షాపుల బాట పడుతున్నారు.

అంతర్జాతీయ మార్కెట్‌లో గ్లోబల్ ఇన్వెస్టర్లు బంగారం నుంచి తమ పెట్టుబడులను వెనక్కి తీసుకోవడం మరియు డాలర్ విలువలో మార్పులు రావడం వల్ల భారతీయ మార్కెట్ పై ఈ ప్రభావం పడింది. గ్లోబల్ మార్కెట్‌లో స్పాట్ గోల్డ్ 1.65 శాతం తగ్గి 5,217 డాలర్లకు పడిపోయింది. పసిడి ప్రేమికులు ఈ తగ్గుదలని ఒక అవకాశంగా భావిస్తున్నారు. అయితే, ధరలు ఇంకా తగ్గుతాయా లేదా మళ్ళీ పెరుగుతాయా అనేది బడ్జెట్ 2026 తర్వాత తేలనుంది.