Census 2027 : త్వరలో 16వ జనగణన..ఒక్కో మనిషిని లెక్కించడానికి ఎంత ఖర్చు అవుతుందో తెలుసా ?

Census 2027 : వచ్చే ఏడాది నుంచి దేశంలో జనగణన ప్రక్రియ మొదలవుతుంది. ఈ అతిపెద్ద పని కోసం కేంద్ర ప్రభుత్వం రూ.11,718.24 కోట్ల భారీ బడ్జెట్‌ను ఆమోదించింది. ప్రస్తుతం దేశ జనాభా సుమారు 147 కోట్ల వరకు ఉంటుందని అంచనా. ఈ బడ్జెట్‌ను లెక్కలోకి తీసుకుంటే, ఒక్కో మనిషిని లెక్కించడానికి ప్రభుత్వం సుమారు రూ.80 ఖర్చు చేయబోతోందని తేలింది. ఈ ప్రక్రియ మొదలయ్యే సమయానికి జనాభా పెరిగే అవకాశం ఉన్నందున, ఇది ఒక అంచనా మాత్రమే.

జనగణన 2027 అనేది మన దేశంలో 16వ జనగణన, స్వాతంత్ర్యం వచ్చిన తర్వాత 8వది. ఇది రెండు దశల్లో జరుగుతుంది. మొదటగా ఏప్రిల్ నుంచి సెప్టెంబర్ 2026 మధ్య ఇళ్ల జాబితా తీస్తారు. ఆ తర్వాత ఫిబ్రవరి 2027 లో జనాభా లెక్కింపు జరుగుతుంది. చలి ఎక్కువగా ఉండే ప్రాంతాల్లో మాత్రం ఈ లెక్కింపును సెప్టెంబర్ 2026 లోనే పూర్తి చేస్తారు.

ఈసారి జనగణన ప్రత్యేకత ఏమిటంటే.. ఇది భారతదేశంలో మొట్టమొదటి డిజిటల్ జనగణన. సుమారు 30 లక్షల మంది సిబ్బంది (ఎక్కువగా ప్రభుత్వ ఉపాధ్యాయులు) మొబైల్ యాప్‌ల ద్వారా డేటాను సేకరిస్తారు. అలాగే సేకరించిన సమాచారాన్ని వెంటనే చూసేందుకు, పర్యవేక్షించడానికి ఒక ప్రత్యేకమైన సెంట్రల్ సెన్సస్ మేనేజ్‌మెంట్ అండ్ మానిటరింగ్ సిస్టమ్ పోర్టల్‌ను కూడా ఏర్పాటు చేశారు.

ముఖ్యంగా, ఈ జనగణనలో కులం గణన కూడా ఉంటుంది. జనాభా లెక్కింపు సమయంలో కులానికి సంబంధించిన వివరాలను ఎలక్ట్రానిక్‌గా సేకరిస్తారు. ఈ మొత్తం ప్రక్రియ కోసం 30 లక్షల మంది ఉద్యోగులను నియమించి, వారికి వారి సాధారణ విధులతో పాటు ఈ పనికి కూడా గౌరవ వేతనం ఇస్తారు.