GST Impact: బజాజ్ సంచలనం..జీఎస్టీ దెబ్బకు పల్సర్ ధరలు భారీగా తగ్గనున్నాయ్.
GST Impact: జీఎస్టీ మార్పుల దెబ్బకు దేశీయ ఆటోమొబైల్ దిగ్గజం బజాజ్ ఆటో వ్యూహాత్మక నిర్ణయం తీసుకుంది. ప్రభుత్వం 350cc కంటే తక్కువ సామర్థ్యం ఉన్న బైకులపై పన్ను తగ్గించడంతో, బజాజ్ తన పాపులర్ మోడల్స్ అయిన పల్సర్, డోమినార్లలో సరికొత్త 350cc వెర్షన్లను ప్రవేశపెట్టేందుకు సిద్ధమవుతోంది. దీనివల్ల సామాన్యుడికి తక్కువ ధరకే పవర్ఫుల్ బైకులు అందుబాటులోకి రానున్నాయి. కేంద్ర ప్రభుత్వం ఇటీవల బైకులపై జీఎస్టీ రేట్లను సవరించింది. 350cc కంటే తక్కువ సామర్థ్యం ఉన్న బైకులకు పన్నును 28% నుంచి 18% కి తగ్గించగా, 350cc పైన ఉన్న వాటికి మాత్రం అది ఏకంగా 40% కి (28% GST + 12% సెస్) చేరింది. దీనివల్ల 400cc విభాగంలో ఉన్న డోమినార్ 400, పల్సర్ NS400Z ధరలు పెరిగే అవకాశం ఉంది. ప్రస్తుతం ఈ అదనపు భారాన్ని బజాజ్ భరిస్తున్నప్పటికీ, దీర్ఘకాలంలో ఇది సాధ్యం కాదు. అందుకే, ఈ పన్నుల ఊబి నుంచి బయటపడి వినియోగదారులకు తక్కువ ధరకే బైకులను అందించడానికి, బజాజ్ తన 400cc రేంజ్ను 350cc కి కుదించాలని నిర్ణయించుకుంది.
ప్రస్తుతానికి డోమినార్ 400, పల్సర్ NS400Z బైకులలో 373.3cc ఇంజిన్ను వాడుతున్నారు. అయితే, కొత్త 350cc వెర్షన్ కోసం అదే ఇంజిన్ను కొంచెం మార్చబోతున్నారు. ఇంజిన్ లోని బోర్ సైజును తగ్గించడం ద్వారా 350cc లోపు సామర్థ్యాన్ని సాధించవచ్చు. దీనివల్ల పవర్, టార్క్ స్వల్పంగా తగ్గినప్పటికీ, బైకు ధర దాదాపు రూ.20,000 నుంచి రూ.30,000 వరకు తగ్గే అవకాశం ఉంది. ప్రస్తుతం పల్సర్ NS400Z ధర రూ.1.94 లక్షలు ఉండగా, 350cc కి మారితే ఇది మరింత అందుబాటులోకి వస్తుంది.
కేవలం సొంత బ్రాండ్లే కాకుండా, బజాజ్ భాగస్వామ్యంతో నడుస్తున్న కేటీఎమ్ 390 సిరీస్, ట్రయంఫ్ 400 సిరీస్ బైకులను కూడా 350cc కి మార్చే ఆలోచనలో కంపెనీ ఉంది. ఈ సెగ్మెంట్లో బజాజ్ నెలకు దాదాపు 30,000 యూనిట్ల విక్రయాలతో దూసుకుపోతోంది. అందుకే, పెరిగిన పన్నుల భారం అమ్మకాలపై పడకుండా ఉండాలంటే 350cc ఇంజిన్ ఒకే ఒక పరిష్కారమని కంపెనీ భావిస్తోంది. ఒకవేళ ఈ ప్రాజెక్టు పట్టాలెక్కితే, తక్కువ ధరకే ప్రీమియం లగ్జరీ బైకులు యువతకు అందుబాటులోకి రానున్నాయి.
బజాజ్ ఆటో తీసుకున్న ఈ నిర్ణయం వల్ల వాహనదారులకు భారీ ఊరట లభిస్తుంది. 350cc లోపు బైకులను కొనుగోలు చేయడం వల్ల రిజిస్ట్రేషన్ మరియు ఇన్సూరెన్స్ ఖర్చులు కూడా తగ్గవచ్చు. 2026 మధ్య నాటికి ఈ కొత్త మోడల్స్ రోడ్లపైకి వచ్చే అవకాశం ఉందని మార్కెట్ వర్గాల సమాచారం. పర్ఫార్మెన్స్ లో రాజీ పడకుండా ధరను తగ్గించడమే బజాజ్ అసలు లక్ష్యం.