Health Insurance : బీమా తీసుకుంటే భద్రత కాదు, కొత్త టెన్షన్.. ఆరేళ్లలో రెట్టింపైన ఫిర్యాదులు.

Health Insurance : కోవిడ్ మహమ్మారి తర్వాత దేశంలో ఆరోగ్య బీమా గురించి అవగాహన బాగా పెరిగింది. ప్రజలు అనూహ్యమైన వైద్య ఖర్చుల భారం నుంచి తప్పించుకోవడానికి పాలసీలు తీసుకుంటున్నారు. అయితే పాలసీల సంఖ్యతో పాటు వాటిపై వచ్చే ఫిర్యాదుల సంఖ్య కూడా భారీగా పెరిగింది. ముంబైలోని ఇన్సూరెన్స్ అంబుడ్స్‌మన్ ఆఫీసు గణాంకాలు పరిశీలిస్తే.. గత ఆరు సంవత్సరాలలో ఆరోగ్య బీమాకు సంబంధించిన ఫిర్యాదులు దాదాపు రెట్టింపు అయ్యాయి. 2020-21లో సుమారు 3,700 ఫిర్యాదులు నమోదు కాగా, 2023-24 నాటికి ఈ సంఖ్య 7,700 దాటింది. మొత్తం బీమా ఫిర్యాదులలో ఆరోగ్య బీమా ఫిర్యాదుల వాటా దాదాపు 80 శాతం వరకు ఉండటం ఈ సమస్య తీవ్రతను తెలియజేస్తుంది.

ఫిర్యాదులు పెరగడానికి ప్రధాన కారణం క్లెయిమ్ రిజెక్షన్, క్లెయిమ్ చేసిన మొత్తంలో కోతలు. అనవసరమైన చికిత్స, హాస్పిటల్‌లో చేరడం అవసరం లేదు, చికిత్స OPD లో తీసుకోవచ్చు వంటి కారణాలు చెప్పి కంపెనీలు తరచుగా క్లెయిమ్‌లను తిరస్కరిస్తున్నాయి. అలాగే, పాలసీ పోర్టబిలిటీ (ఒక కంపెనీ నుంచి మరో కంపెనీకి పాలసీ మార్చడం) సదుపాయం ఉన్నప్పటికీ, కొత్త పాలసీలోని కొత్త నిబంధనలు లేదా పాత వెయిటింగ్ పీరియడ్ గురించి వినియోగదారులకు స్పష్టత లేకపోవడం వల్ల క్లెయిమ్ సమయంలో సమస్యలు వస్తున్నాయి. హాస్పిటల్, బీమా కంపెనీల మధ్య సెటిల్‌మెంట్ ప్రక్రియలో ఉండే గందరగోళం వల్ల, ముఖ్యంగా క్యాష్‌లెస్ నుంచి రీయింబర్స్‌మెంట్ మోడ్‌లోకి మారితే, క్లెయిమ్ సెటిల్‌మెంట్ ఆలస్యం అవుతోంది. జీవిత బీమాలో మిస్-సెల్లింగ్ (తప్పుడు సమాచారంతో పాలసీ అమ్మడం) కూడా ప్రధాన వివాదాలకు దారితీస్తోంది.

ఈ పెరుగుతున్న ఫిర్యాదులకు అడ్డుకట్ట వేయాలంటే, బీమా రంగంలో పారదర్శకత చాలా అవసరం. నిపుణుల అభిప్రాయం ప్రకారం.. ఆరోగ్య సంరక్షణ రంగానికి ఒక ప్రత్యేక రెగ్యులేటర్ (నియంత్రణ సంస్థ) అవసరం. బీమా కంపెనీలు తమ పాలసీ నిబంధనలను, షరతులను మరింత సరళంగా, సులభంగా అర్థమయ్యే భాషలో రూపొందించాలి. పాలసీ తీసుకునేటప్పుడు వినియోగదారులు కూడా తమ వైద్య చరిత్రను పూర్తి నిజాయితీగా, స్పష్టంగా తెలియజేయాలి. వినియోగదారులు చైతన్యవంతులై, పాలసీ వివరాలు పూర్తిగా తెలుసుకుని తీసుకున్నప్పుడు, బీమా సంస్థలు పారదర్శక వ్యవస్థను అనుసరించినప్పుడే ఈ పెరుగుతున్న ఫిర్యాదుల సంఖ్యను నియంత్రించగలం.