Hero Glamour 125cc: ఒక్కసారి ఫుల్ ట్యాంక్ కొట్టిస్తే 650 కి.మీ..ఈ బైక్ ఉంటే బంక్ వైపు చూడక్కర్లేదు.

Hero Glamour 125cc: ప్రస్తుతం ఉన్న పెట్రోల్ ధరల సెగ నుంచి తప్పించుకోవాలంటే మైలేజ్ ఇచ్చే బైక్ ఉండాల్సిందే. ముఖ్యంగా మధ్యతరగతి కుటుంబాలకు, ఆఫీసులకు వెళ్లేవారికి తక్కువ ఖర్చుతో ఎక్కువ దూరం ప్రయాణించే బైక్ కావాలి. అలాంటి వారి కోసం హీరో గ్లామర్ 125cc ఒక అద్భుతమైన ఆప్షన్‌గా నిలుస్తోంది. ఒక్కసారి ఫుల్ ట్యాంక్ పెట్రోల్ కొట్టిస్తే, మీరు ఏకంగా 650 కిలోమీటర్ల వరకు నిశ్చింతగా ప్రయాణించవచ్చు.

టూ వీలర్ మార్కెట్లో హీరో మోటోకార్ప్ నమ్మకానికి మరో పేరు. ఆ నమ్మకాన్ని నిలబెడుతూ వచ్చిన మోడల్ హీరో గ్లామర్ 125. ఈ బైక్ ధర రూ. 82,967 (ఎక్స్-షోరూమ్) నుంచి ప్రారంభమవుతుంది. గ్లామర్ ఎక్స్ డ్రమ్ బ్రేక్ వేరియంట్ ఈ ధరకు లభిస్తుండగా, డిస్క్ బ్రేక్ కావాలనుకునే వారు రూ.92,186 వరకు ఖర్చు చేయాల్సి ఉంటుంది. మార్కెట్లో ఉన్న హోండా SP 125, బజాజ్ పల్సర్ 125, టీవీఎస్ రైడర్ 125 వంటి మోడళ్లకు ఇది గట్టి పోటీనిస్తోంది.

ఈ బైక్ అతిపెద్ద ప్లస్ పాయింట్ దాని మైలేజ్. కంపెనీ అధికారిక గణాంకాల ప్రకారం, హీరో గ్లామర్ లీటరు పెట్రోల్‌కు 65 కిలోమీటర్ల మైలేజ్ ఇస్తుంది. ఈ బైక్‌లో 10 లీటర్ల సామర్థ్యం గల ఫ్యూయల్ ట్యాంక్ ఉంది. అంటే మీరు ఒక్కసారి ట్యాంక్ ఫుల్ చేయిస్తే సుమారు 650 కిలోమీటర్ల దూరం ప్రయాణించవచ్చు. ఇది హైదరాబాద్ నుండి విశాఖపట్నం వరకు దాదాపుగా ఒక్క ట్యాంక్‌తో వెళ్లగలిగే సామర్థ్యం అన్నమాట.

ఇంజిన్ విషయానికి వస్తే.. ఇందులో 124.7 సీసీ ఎయిర్-కూల్డ్, సింగిల్-సిలిండర్ ఇంజిన్‌ను అమర్చారు. ఇది 10.39 bhp పవర్, 10.4 Nm టార్క్‌ను ఉత్పత్తి చేస్తుంది. 5-స్పీడ్ గేర్‌బాక్స్ వల్ల ప్రయాణం సాఫీగా ఉండటమే కాకుండా ఇంధన సామర్థ్యం కూడా పెరుగుతుంది. స్టైలిష్ డిజైన్‌తో పాటు ఇందులో ఎల్ఈడీ హెడ్ ల్యాంప్స్, డిజిటల్ ఇన్‌స్ట్రుమెంట్ క్లస్టర్ వంటి ఆధునిక ఫీచర్లు ఉన్నాయి.

టెక్నాలజీ పరంగా కూడా హీరో గ్లామర్ వెనుకబడలేదు. ఇందులో మొబైల్ ఛార్జింగ్ కోసం ప్రత్యేకంగా యూఎస్‌బీ పోర్ట్ ఇచ్చారు. అలాగే సెక్యూరిటీ కోసం కంబైన్డ్ బ్రేకింగ్ సిస్టమ్ ఉంటుంది, ఇది బైక్ అకస్మాత్తుగా ఆపినప్పుడు స్కిడ్ అవ్వకుండా కాపాడుతుంది. గ్లామర్ లుక్, ఐ3ఎస్ (i3S) టెక్నాలజీ (ట్రాఫిక్‌లో ఇంజిన్ ఆటోమేటిక్ ఆఫ్ అయ్యే ఫీచర్) దీన్ని సిటీ రైడింగ్‌కు నంబర్ వన్ బైక్‌గా మార్చేశాయి.