Honda CR-V : భారత్‌లోకి గట్టిగా తిరిగి వస్తున్న హోండా CR-V.. కొత్త హైబ్రిడ్ ఇంజన్‎తో సరికొత్త అవతార్.

Honda CR-V : ప్రముఖ జపనీస్ కార్ల తయారీ సంస్థ హోండా తన అత్యంత ప్రజాదరణ పొందిన CR-V ఎస్‌యూవీని తిరిగి భారత మార్కెట్‌లోకి తీసుకురావడానికి సిద్ధమవుతోంది. ఇది వరకు ఐదవ జనరేషన్ వరకు భారత్‌లో విక్రయించబడిన ఈ కారు, ప్లాంట్ మూసివేత కారణంగా నిలిపివేసింది. ఇప్పుడు, హోండా తన ఏడవ జనరేషన్ CR-V ని సరికొత్త అవతార్‌లో, అడ్వాన్సుడ్ టెక్నాలజీతో హైబ్రిడ్ ఇంజన్ తో తీసుకురావాలని ప్రణాళిక వేస్తోంది. హోండా ఎలివేట్, రాబోయే 0 ఆల్ఫా మధ్య ఈ కారు స్థానం పొందనుంది.

హోండా తన ఆరవ జనరేషన్ CR-V ని భారత మార్కెట్‌లోకి తీసుకురాలేదు, కానీ ఇప్పుడు నేరుగా ఏడవ జనరేషన్ CR-V ని విడుదల చేయడానికి సన్నాహాలు చేస్తోంది. ఈ కారు జపాన్‌లో అభివృద్ధి అవుతున్న కొత్త మిడ్-సైజ్ ప్లాట్‌ఫారమ్ టెక్నాలజీపై ఆధారపడి ఉంటుంది. కొత్త ప్లాట్‌ఫారమ్ ప్రస్తుతం ఉన్న మోడల్ కంటే చాలా తేలికగా ఉండనుంది. ఈ ఎస్‌యూవీ కొత్త హోండా సివిక్, హోండా అకార్డ్ లతో 60% కంటే ఎక్కువ భాగాలను పంచుకుంటుంది, దీనివల్ల తయారీ ఖర్చులు తగ్గే అవకాశం ఉంది.

భారత్‌లో విడుదల కానున్న నెక్స్ట్-జెన్ CR-V లో కొత్త హైబ్రిడ్ సిస్టమ్ ను అందిస్తారు. ఇది అడ్వాన్సుడ్ డ్రైవింగ్ అనుభవాన్ని ఇవ్వనుంది. ఇందులో 2.0-లీటర్ డైరెక్ట్ ఇంజెక్షన్ పెట్రోల్ ఇంజన్ ఉంటుంది. ఇది ట్రాక్షన్ మోటార్, కొత్త జనరేటర్ మోటార్‌తో కలిసి పనిచేస్తుంది. ఇందులో కొత్త హై-వోల్టేజ్ బ్యాటరీ ప్యాక్ కూడా ఉంటుంది. ప్రస్తుత CR-V లో మెకానికల్ ఆల్-వీల్ డ్రైవ్ (AWD) ఉంది. అయితే, రాబోయే జనరేషన్‌లో ఎలక్ట్రిక్ ఆల్-వీల్ డ్రైవ్ సిస్టమ్‌ను ఇవ్వనున్నారు. ఈ సిస్టమ్‌లో వెనుక చక్రాలను నడపడానికి అదనపు ట్రాక్షన్ మోటార్ ఉంటుంది.

కొత్త ప్లాట్‌ఫారమ్, పవర్‌ట్రైన్ కారణంగా తదుపరి CR-V హైబ్రిడ్ సుమారు 90 కిలోల బరువు తగ్గే అవకాశం ఉంది. కొత్త CR-V క్యాబిన్‌లో విశాలమైన, సాంకేతికంగా మెరుగైన మార్పులు ఉండనున్నాయి. హోండా ప్రస్తుతం ఉన్న 9-అంగుళాల యూనిట్‌కు బదులుగా సుమారు 15-అంగుళాల పెద్ద టచ్‌స్క్రీన్ ఇన్ఫోటైన్‌మెంట్ సిస్టమ్‌ను తయారు చేస్తోంది. కొత్త సెటప్ వల్ల సెంటర్ టన్నెల్ పరిమాణం తగ్గి, వెనుక సీట్లలో కూర్చునే వారికి ఎక్కువ స్థలం, సౌకర్యం లభిస్తుంది. కొత్తగా స్టీరింగ్ కాలమ్-మౌంటెడ్ గేర్ షిఫ్టర్‌ను అందించే అవకాశం ఉంది, ఇది సెంటర్ కన్సోల్‌లో అదనపు స్థలాన్ని ఇస్తుంది.

ఐదవ జనరేషన్ CR-V, పదవ జనరేషన్ సివిక్ అధిక ధరల కారణంగా భారతీయ మార్కెట్‌లో అనుకున్నంత విజయం సాధించలేకపోయాయి. అందుకే ఈసారి హోండా జాగ్రత్త పడుతోంది. ఏడవ జనరేషన్ హోండా CR-V 2027 లో ప్రపంచవ్యాప్తంగా, అదే సంవత్సరంలో భారతదేశంలో కూడా విడుదల అయ్యే అవకాశం ఉంది. ఇది VW టైరాన్, స్కోడా కొడియాక్ వంటి కార్లతో పోటీ పడుతుంది. ఈసారి హోండా బ్యాలెన్స్‌డ్ ధరను నిర్ణయిస్తుందని మార్కెట్ నిపుణులు అంచనా వేస్తున్నారు. గతంలో గ్రేటర్ నోయిడా ప్లాంట్ మూసివేత కారణంగా CR-V ఉత్పత్తి ఆగిపోయింది. ఈసారి హోండా స్థానిక ఉత్పత్తి ద్వారా ఈ కారును తీసుకువస్తుందా లేదా అనేది చూడాలి.