Hyundai Venue : హ్యుందాయ్ వెన్యూ ఊచకోత.. 4 నెలల్లోనే లక్ష బుకింగ్లు, కొత్త డీజిల్ ఆటోమేటిక్ లాంచ్.
Hyundai Venue : హ్యుందాయ్ మోటార్ ఇండియా తన పాపులర్ కాంపాక్ట్ ఎస్యూవీ వెన్యూ విషయంలో సరికొత్త రికార్డును సృష్టించింది. అప్డేటెడ్ వెన్యూ మార్కెట్లోకి వచ్చిన కేవలం నాలుగు నెలల్లోనే ఏకంగా లక్ష బుకింగ్ల మైలురాయిని దాటేసింది. ఈ ఘనతతో పాటు వినియోగదారులను మరింత ఆకట్టుకోవడానికి కంపెనీ కొత్తగా HX8 డీజిల్ ఆటోమేటిక్ వేరియంట్ను లాంచ్ చేసింది. ఈ కొత్త వేరియంట్ ధరను రూ. 13,69,900 (ఎక్స్-షోరూమ్)గా నిర్ణయించారు.
డీజిల్ పవర్తో కొత్త వేరియంట్
కొత్తగా వచ్చిన HX8 వేరియంట్లో శక్తివంతమైన U2 1.5 లీటర్, 4-సిలిండర్ CRDi డీజిల్ ఇంజన్ ఉంది. ఇది 6-స్పీడ్ ఆటోమేటిక్ ట్రాన్స్మిషన్తో వస్తుంది. పర్ఫార్మెన్స్లో రాజీ పడకుండా, హాయిగా డ్రైవింగ్ చేయాలనుకునే వారి కోసం ఈ వేరియంట్ను ప్రత్యేకంగా రూపొందించినట్లు కంపెనీ తెలిపింది. ఇప్పటికే వెన్యూలో 1.2 లీటర్ పెట్రోల్, 1.0 లీటర్ టర్బో పెట్రోల్ ఇంజన్లు అందుబాటులో ఉండగా, ఇప్పుడు డీజిల్ ఆటోమేటిక్ రాకతో ఈ లైన్ అప్ మరింత పటిష్టంగా మారింది.
నెక్స్ట్ లెవల్ ఫీచర్లు
HX8 డీజిల్ ఆటోమేటిక్ వేరియంట్లో లగ్జరీ, టెక్నాలజీకి పెద్దపీట వేశారు. ఇందులో ఫ్రంట్ వెంటిలేటెడ్ సీట్లు, 4-వే అడ్జస్టబుల్ డ్రైవర్ సీట్, డ్యూయల్-టోన్ లెదరెట్ అప్హోల్స్టరీ వంటి ప్రీమియం ఫీచర్లు ఉన్నాయి. అంతేకాకుండా, హ్యుందాయ్ బ్లూ లింక్ కనెక్టెడ్ టెక్నాలజీ ద్వారా రిమోట్ ఫంక్షన్లను నియంత్రించవచ్చు. సాఫ్ట్వేర్ అప్డేట్ల కోసం షోరూమ్కు వెళ్లాల్సిన అవసరం లేకుండా ఓవర్-ది-ఎయిర్ అప్డేట్ సదుపాయం కూడా ఉంది. లోపల యాంబియంట్ లైటింగ్ కారుకు మరింత అందాన్ని ఇస్తుంది.
డ్రైవింగ్ సేఫ్టీ, మోడ్స్
డ్రైవింగ్ అనుభవాన్ని మెరుగుపరచడానికి ఇందులో ఆటో హోల్డ్ ఫంక్షన్తో కూడిన ఎలక్ట్రిక్ పార్కింగ్ బ్రేక్, రియర్ డిస్క్ బ్రేక్లు మరియు ప్యాడల్ షిఫ్టర్లు ఇచ్చారు. ఎకో, నార్మల్ మరియు స్పోర్ట్ అనే మూడు డ్రైవింగ్ మోడ్స్తో పాటు.. ఇసుక, బురద, మంచు వంటి ప్రదేశాల్లో ప్రయాణించడానికి వీలుగా ట్రాక్షన్ కంట్రోల్ మోడ్లను కూడా చేర్చారు.
ధర, పోటీ
ప్రస్తుతం హ్యుందాయ్ వెన్యూ ప్రారంభ ధర రూ. 7.99 లక్షల నుంచి మొదలై టాప్ మోడల్ ధర రూ. 15.69 లక్షల వరకు (ఎక్స్-షోరూమ్) ఉంది. మార్కెట్లో ఈ కారు మారుతి సుజుకి బ్రెజ్జా, కియా సోనెట్, టాటా నెక్సాన్, స్కోడా కైలాక్, మహీంద్రా XUV 3XO వంటి దిగ్గజ కార్లతో పోటీ పడుతోంది. లక్ష బుకింగ్ల జోరు చూస్తుంటే, కాంపాక్ట్ ఎస్యూవీ సెగ్మెంట్లో హ్యుందాయ్ వెన్యూ తన పట్టును మరింత బిగించినట్లు కనిపిస్తోంది.