Yellow Peas : పసుపు బఠానీల దిగుమతిపై కేంద్రం ఉక్కుపాదం.. నవంబర్ 1 నుంచి 30 శాతం ట్యాక్స్.

Yellow Peas : దేశీయంగా పప్పు ధాన్యాల ఉత్పత్తిని ప్రోత్సహించడానికి, రైతుల ఆదాయాన్ని పెంచడానికి కేంద్ర ప్రభుత్వం కీలక నిర్ణయం తీసుకుంది. శనగలకు చౌకైన ప్రత్యామ్నాయంగా ఆహార పరిశ్రమలలో విస్తృతంగా ఉపయోగించే పసుపు బఠానీ దిగుమతులపై ప్రభుత్వం 30 శాతం దిగుమతి సుంకం విధించింది. ఈ నిర్ణయం నవంబర్ 1 నుంచి అమల్లోకి రానుంది. ఈ సుంకం విధింపుతో, డిసెంబర్ 2023 నుండి అమలవుతున్న డ్యూటీ-ఫ్రీ దిగుమతి సౌలభ్యం రద్దు అవుతుంది. ఈ కొత్త సుంకం వల్ల దేశీయంగా పప్పు ధాన్యాల ధరలు పెరిగి, రైతులు రబీ సీజన్‌లో వీటి సాగుకు మొగ్గు చూపే అవకాశం ఉందని నిపుణులు భావిస్తున్నారు.

దేశీయంగా పప్పు ధాన్యాల ధరలు తగ్గుతుండటంతో, రైతులు నష్టపోకుండా ఉండేందుకు ఆర్థిక మంత్రిత్వ శాఖ ఈ కీలక నిర్ణయం తీసుకుంది. నవంబర్ 1 నుండి పసుపు బఠానీల దిగుమతిపై 30 శాతం దిగుమతి సుంకం విధిస్తున్నారు. ఇందులో 10 శాతం దిగుమతి సుంకం, 20 శాతం అగ్రి సెస్ ఉంటాయి. ఈ దిగుమతి సుంకం నవంబర్ 1 తర్వాత విదేశాల నుండి పంపబడిన సరుకులపై మాత్రమే వర్తిస్తుంది. డిసెంబర్ 2023 నుండి అమల్లో ఉన్న ట్యాక్స్ ఫ్రీ దిగుమతి పాలసీని రద్దు చేయడం ద్వారా ఈ నిర్ణయం తీసుకున్నారు.

పసుపు బఠానీలకు సుంకం విధించడం వెనుక ముఖ్య ఉద్దేశం, శనగలతో పాటు దేశీయంగా పండే అన్ని పప్పు ధాన్యాల ధరలను పెంచి, రైతులకు లాభం చేకూర్చడం. దిగుమతి చేసుకున్న పసుపు బఠానీలు మార్కెట్లో అన్ని రకాల పప్పు ధాన్యాల మార్కెట్ ధరల కంటే కనీసం 50 శాతం తక్కువగా ఉన్నాయి. దీని కారణంగా శనగల ధరలు పడిపోతూ, శనగ సాగు చేసే రైతులు నిరుత్సాహపడే పరిస్థితి ఏర్పడింది. శనగ దేశంలో మొత్తం పప్పు ధాన్యాల ఉత్పత్తిలో దాదాపు 50 శాతం వాటా కలిగి ఉంది. ప్రస్తుతం పసుపు బఠానీలను ప్రధానంగా రష్యా, కెనడా నుండి టన్నుకు $340-$360 (క్వింటాల్‌కు రూ.3,000-రూ.3,400) చొప్పున దిగుమతి చేస్తున్నారు.