Tax Collections : ప్రభుత్వ ఖజానాకు భారీ గుడ్‌న్యూస్..రూ.12.92 లక్షల కోట్లకు చేరిన ట్యాక్స్ వసూళ్లు.

Tax Collections : బీహార్ అసెంబ్లీ ఎన్నికల ఎగ్జిట్ పోల్ ఫలితాలు పొలిటికల్ హీట్ పెంచుతున్న వేళ, దేశ ఆర్థిక వ్యవస్థ నుంచి ప్రభుత్వానికి ఒక గుడ్ న్యూస్ వచ్చింది. ఆర్థిక కార్యకలాపాలు ఊపందుకోవడంతో దేశ నికర ప్రత్యక్ష పన్ను వసూళ్లు ఈ ఆర్థిక సంవత్సరంలో నవంబర్ 10వ తేదీ వరకు 7% వృద్ధిని నమోదు చేశాయి. ఈ కాలంలో ప్రభుత్వ ఖజానాకు రూ.12.92 లక్షల కోట్లు చేరాయి. కార్పొరేట్, వ్యక్తిగత ఆదాయ పన్ను వసూళ్లలో వచ్చిన ఈ బలమైన పెరుగుదల, దేశంలో ఆర్థిక కార్యకలాపాలు సాధారణ స్థితికి వస్తున్నాయని, ఆదాయ స్థాయిలు మెరుగుపడుతున్నాయని సూచిస్తోంది.

ఈ ఆర్థిక సంవత్సరంలో (నవంబర్ 10 వరకు) దేశ నికర ప్రత్యక్ష పన్ను వసూళ్లు అంచనాలకు మించి బలమైన వృద్ధిని కనబరిచాయి. ఈ కాలంలో ప్రభుత్వ మొత్తం నికర ఆదాయం రూ.12.92 లక్షల కోట్లుగా నమోదైంది. ఇది గత ఏడాదితో పోలిస్తే 7% వృద్ధిని సూచిస్తుంది. ఈ గణాంకాలు దేశీయ ఆర్థిక కార్యకలాపాలు తిరిగి పుంజుకుంటున్నాయని, పౌరులు, కంపెనీల ఆదాయాలు మెరుగుపడుతున్నాయని స్పష్టం చేస్తున్నాయి.

ఈ వృద్ధికి ప్రధానంగా రెండు రకాల పన్నుల వసూళ్లు బలాన్ని ఇచ్చాయి. కంపెనీల ద్వారా వచ్చే కార్పొరేట్ పన్ను వసూళ్లు గత సంవత్సరం రూ.5.08 లక్షల కోట్ల నుంచి ఈసారి రూ.5.37 లక్షల కోట్లకు పెరిగాయి. కంపెనీలు లాభాలు ఆర్జించడం దీనికి ప్రధాన కారణం. వ్యక్తిగత ఆదాయ పన్ను, హిందూ అవిభాజ్య కుటుంబాల పన్ను కలిగిన నాన్-కార్పొరేట్ పన్ను వసూళ్లు కూడా రూ.6.62 లక్షల కోట్ల నుంచి రూ.7.19 లక్షల కోట్లకు చేరి, బలమైన వృద్ధిని కనబరిచాయి. గత ఏడాది పన్ను రేట్లు తగ్గించినప్పటికీ వ్యక్తిగత పన్ను వసూళ్లు బలంగా ఉండడం ఆదాయ స్థాయిల మెరుగుదలను సూచిస్తోంది.

నికర వసూళ్లు పెరగడానికి రిఫండ్‌ల వేగంలో వచ్చిన మార్పు కూడా ఒక కారణం. ఈసారి ప్రభుత్వం పన్ను రిఫండ్‌లను విడుదల చేసే వేగాన్ని తగ్గించింది. నవంబర్ 10 వరకు రూ.2.42 లక్షల కోట్లు మాత్రమే రిఫండ్ చేశారు. ఇది గత ఏడాదితో పోలిస్తే 18% తక్కువ. గత ఏడాదితో పోలిస్తే రీఫండ్ తగ్గింపు కారణంగానే ప్రభుత్వ నికర వసూళ్లు భారీగా పెరిగినట్లు కనిపిస్తోంది. రీఫండ్‌లు తీసివేయగా ప్రభుత్వ మొత్తం స్థూల వసూళ్లు రూ.15.35 లక్షల కోట్లుగా ఉన్నాయి. ఇది గత ఏడాదితో పోలిస్తే 2.15% మాత్రమే ఎక్కువ. సెక్యూరిటీస్ ట్రాన్సాక్షన్ ట్యాక్స్ వసూళ్లు రూ.35,923 కోట్ల నుంచి రూ.35,682 కోట్లకు స్వల్పంగా తగ్గి మార్కెట్ స్థిరంగా ఉందని సూచించింది.