Mahindra XUV 7XO : రూ.13.6 లక్షలకే రాజభోగం..మహీంద్రా XUV 7XO లో ఇన్ని ఫీచర్లా?

Mahindra XUV 7XO : ఎస్‍యూవీ ప్రేమికులకు మహీంద్రా అదిరిపోయే గుడ్ న్యూస్ అందించింది. మార్కెట్లో ఎంతో ఆసక్తిగా ఎదురుచూస్తున్న మహీంద్రా XUV 7XO డెలివరీలు అధికారికంగా ప్రారంభమయ్యాయి. ఈ సరికొత్త ఎస్‍యూవీ ప్రారంభ ధరను కంపెనీ రూ.13.6 లక్షలు (ఎక్స్-షోరూమ్)గా నిర్ణయించింది. ప్రస్తుతం కంపెనీ కేవలం హై-ఎండ్ వేరియంట్లు అయిన AX7, AX7T, AX7L డెలివరీలను మాత్రమే మొదలుపెట్టింది. ఇతర వేరియంట్ల డెలివరీలు కూడా త్వరలోనే అందుబాటులోకి రానున్నాయి.

మహీంద్రా XUV 7XO డిజైన్ విషయంలో పాత XUV700 కంటే ఎంతో భిన్నంగా, మరింత ధైర్యంగా కనిపిస్తోంది. దీని ఫ్రంట్ గ్రిల్ ఇప్పుడు మరింత బోల్డ్‌గా ఉంది. కొత్తగా డిజైన్ చేసిన బూమరాంగ్ ఆకారపు LED DRLలు, హెడ్‌లైట్లు కారుకు ఒక ప్రీమియం లుక్ ఇస్తున్నాయి. వెనుక భాగంలో హెక్సాగోనల్ డిజైన్‌తో కూడిన అప్‌డేటెడ్ టెయిల్ లైట్లు ఆకర్షణీయంగా ఉన్నాయి. ఇక సైడ్ ప్రొఫైల్ విషయానికి వస్తే, కొత్తగా వచ్చిన 19-అంగుళాల డ్యూయల్-టోన్ అల్లాయ్ వీల్స్ కారుకు ఒక స్పోర్టీ అప్పీల్‌ను ఇస్తున్నాయి.

పవర్‌ఫుల్ పర్ఫార్మెన్స్ కోరుకునే వారి కోసం మహీంద్రా ఇందులో రెండు ఇంజన్ ఆప్షన్లను ఇచ్చింది. 203 హార్స్‌పవర్‌ను ఉత్పత్తి చేసే 2.0 లీటర్ టర్బో-పెట్రోల్ ఇంజన్ ఒకటైతే, 185 హార్స్‌పవర్‌ను ఇచ్చే 2.2 లీటర్ డీజిల్ ఇంజన్ మరొకటి. ఈ రెండు ఇంజన్లు 6-స్పీడ్ మాన్యువల్ లేదా ఆటోమేటిక్ ట్రాన్స్‌మిషన్ ఆప్షన్లతో లభిస్తాయి. ఏ రకమైన రోడ్డు మీదనైనా ఈ కారు రాజసం ఉట్టిపడేలా దూసుకెళ్తుంది.

ఈ ఎస్‍యూవీ ఇంటీరియర్ చూస్తే మీరు విస్తుపోతారు. డాష్‌బోర్డ్‌లో ట్రిపుల్-స్క్రీన్ లేఅవుట్ ఉంది. ప్రతి డిస్‌ప్లే 12.3 అంగుళాల సైజులో ఉంటుంది, ఇది మీకు ఒక విమానం కాక్‌పిట్‌లో కూర్చున్న అనుభూతిని కలిగిస్తుంది. అన్నింటికంటే ముఖ్యంగా, ఇందులో మొదటిసారిగా ChatGPT, Alexa సపోర్ట్‌ను అందించారు. అంటే మీరు డ్రైవింగ్ చేస్తూనే మీ కారుతో ముచ్చట్లు పెట్టవచ్చు, అది మీ ప్రశ్నలకు సమాధానాలు కూడా ఇస్తుంది.

మహీంద్రా XUV 7XOలో లగ్జరీ ఫీచర్లకు కొదవ లేదు. 540 డిగ్రీల కెమెరా సిస్టమ్ ద్వారా కారు చుట్టూ ఏం జరుగుతుందో స్పష్టంగా చూడవచ్చు. డాల్బీ అట్మోస్ సపోర్ట్‌తో కూడిన 16-స్పీకర్ల హర్మాన్ కార్డాన్ ఆడియో సిస్టమ్ ప్రయాణాన్ని ఒక కచేరీలా మారుస్తుంది. సేఫ్టీ పరంగా లెవల్-2 ADAS సిస్టమ్‌ను ప్రత్యేకంగా భారతీయ రోడ్ల పరిస్థితులకు అనుగుణంగా తయారు చేశారు. వైర్‌లెస్ ఛార్జింగ్, వెంటేలేటెడ్ సీట్లు వంటి ఫీచర్లు దీనిని ఒక కంప్లీట్ లగ్జరీ ఎస్‍యూవీగా నిలబెడుతున్నాయి.