Maruti Dzire : ఒకే నెలలో 20,791 యూనిట్ల అమ్మకాలు.. SUVలను పక్కన పెట్టి దీనినే ఎందుకు కొంటున్నారు.

Maruti Dzire : భారతీయ మార్కెట్లో అత్యధికంగా అమ్ముడయ్యే కార్లలో మారుతి సుజుకి డిజైర్ ఒకటి. అక్టోబర్ 2025 లో ఈ కారు ఎస్‌యూవీ మోడళ్ల ఆధిపత్యాన్ని బద్దలు కొట్టి, అమ్మకాల చార్ట్‌లో సంచలనం సృష్టించింది. అక్టోబర్ 2025లో అత్యధికంగా అమ్ముడైన మారుతి సుజుకి మోడల్‌గా 20,791 యూనిట్ల విక్రయాలతో డిజైర్ అగ్రస్థానంలో నిలిచింది. ఈ సబ్-కాంపాక్ట్ సెడాన్, మారుతి సుజుకి అత్యధికంగా అమ్ముడైన మోడల్‌గా నిలవడమే కాక, మొత్తం దేశంలోనే టాటా నెక్సాన్ తర్వాత రెండో అత్యధికంగా అమ్ముడైన ప్యాసింజర్ కారుగా రికార్డు సృష్టించింది. గత ఏడాది (అక్టోబర్ 2024)లో అమ్ముడైన 12,698 యూనిట్లతో పోలిస్తే ఇది ఏకంగా 64% వృద్ధిని నమోదు చేసింది.

మారుతికి కీలకమైన అక్టోబర్ నెల

అక్టోబర్ 2025 నెల మారుతి సుజుకి చరిత్రలో ఒక ముఖ్యమైన నెలగా నిలిచింది. ఈ నెలలోనే కంపెనీ మొత్తం మూడు కోట్ల కార్ల విక్రయాల మైలురాయిని కూడా అధిగమించింది. ముఖ్యంగా చిన్న కార్ల విక్రయాల్లో మెరుగుదల కారణంగా మొత్తం అమ్మకాల ప్రదర్శన మరింత మెరుగైంది. అక్టోబర్‌లో డిజైర్ తన బ్రెజా, గ్రాండ్ విటారా వంటి ప్రముఖ ఎస్‌యూవీ మోడళ్లను కూడా వెనక్కి నెట్టి నంబర్ 1 మోడల్‌గా నిలవడం మార్కెట్ ట్రెండ్‌కు ఒక సవాల్‌గా మారింది. వినియోగదారులు సాధారణంగా ఎస్‌యూవీలు, ఎంపీవీల వైపు మొగ్గు చూపుతున్నప్పటికీ, డిజైర్ అమ్మకాలు పెరగడానికి కొన్ని బలమైన కారణాలు ఉన్నాయి.

అమ్మకాలు పెరగడానికి ప్రధాన కారణాలు

మారుతి సుజుకి డిజైర్ అమ్మకాలు అద్భుతంగా పెరగడానికి నిపుణులు మూడు ప్రధాన కారణాలు చెబుతున్నారు. సెప్టెంబర్ 2025లో అమలైన కొత్త పన్నుల విధానం కింద, ప్యాసింజర్ వాహనాలపై జీఎస్టీ రేటును 28% నుంచి 18%కి తగ్గించారు. చిన్న కార్లపై సెస్‌ను కూడా తొలగించారు. ఈ పన్ను తగ్గింపు వల్ల డిజైర్ ధర గణనీయంగా తగ్గింది. ఇది వినియోగదారులకు బాగా కలిసొచ్చింది.

అక్టోబర్ 2025 భారతదేశంలో పండుగల సీజన్ కావడంతో, మారుతి సుజుకి తమ అన్ని మోడళ్లపై భారీ తగ్గింపులు, ఆఫర్లను ప్రకటించింది. జీఎస్టీ రేటు తగ్గింపు మరియు ఈ పండుగ ఆఫర్ల కారణంగా, డిజైర్ ధర వేరియంట్‌ను బట్టి రూ.72,000 నుంచి రూ.88,000 వరకు తగ్గింది. ఈ భారీ తగ్గింపు డిజైర్ ప్రజాదరణను మరింత పెంచింది. కొత్త తరం మారుతి సుజుకి డిజైర్ మోడల్ మునుపటి మోడల్ కంటే అనేక ముఖ్యమైన మార్పులతో వచ్చింది. డిజైన్ మరింత ఆధునికంగా, స్టైలిష్‌గా మారింది. ఇంటీరియర్‌లో అత్యాధునిక ఫీచర్లు జోడించారు. పవర్‌ట్రైన్ (ఇంజిన్) కూడా అప్‌గ్రేడ్ అయ్యింది. ఈ మార్పులు, ఫీచర్లు, మెరుగైన ఇంజిన్ కలయికతో కొత్త డిజైర్ వినియోగదారులకు మరింత ఆకర్షణీయమైన ఎంపికగా మారింది. ప్రస్తుతం మారుతి సుజుకి డిజైర్ ఎక్స్-షోరూమ్ ధర రూ.6.26 లక్షల నుంచి రూ.9.32 లక్షల వరకు ఉంది.