Gold Prices : బంగారం, వెండి ధరల్లో భారీ పతనం.. రెండు రోజుల్లో వెండి ధర రూ.7,366 తగ్గుదల.

Gold Prices : భారత మార్కెట్‌లో బంగారం, వెండి ధరలు వరుసగా రెండో ట్రేడింగ్ రోజు కూడా భారీగా పడిపోతున్నాయి. మార్కెట్ ప్రారంభమైన నిమిషాల వ్యవధిలోనే బంగారం ధర రూ.450 కంటే ఎక్కువ తగ్గగా, వెండి ధర రూ.900 కంటే ఎక్కువ పతనమైంది. ముఖ్యంగా, బంగారం ఫ్యూచర్స్ మార్కెట్‌లో తన గరిష్ట స్థాయి నుంచి రూ. 9,000 కంటే ఎక్కువ తగ్గిపోయింది. దీంతో పెట్టుబడిదారులు ఇప్పుడు బంగారం, వెండిలో పెట్టుబడి పెట్టడానికి ఇది సరైన సమయమా అని ఆలోచిస్తున్నారు.

మల్టీ కమోడిటీ ఎక్స్ఛేంజ్లో బంగారం, వెండి ధరలు ఈరోజు గణనీయంగా తగ్గాయి. ఉదయం 10:10 గంటల సమయానికి బంగారం ధర రూ. 242 తగ్గి రూ.1,23,319 వద్ద ట్రేడ్ అవుతోంది. ట్రేడింగ్ సెషన్ ప్రారంభంలోనే ఇది రూ.461 తగ్గి రూ.1,23,100 వద్ద కనిష్ట స్థాయికి చేరుకుంది. గత శుక్రవారం నుంచి చూస్తే బంగారం ధరలో రూ.3,651 వరకు భారీ పతనం కనిపించింది.

వెండి ధర కూడా భారీగా తగ్గింది. ఉదయం 10:15 గంటల సమయానికి రూ.800 కంటే ఎక్కువ తగ్గి రూ.1,55,209 వద్ద ట్రేడ్ అవుతోంది. ఈ ట్రేడింగ్ సెషన్‌లో వెండి ధర రూ.914 తగ్గి రూ. 1,55,104 వద్ద కనిష్ట స్థాయికి చేరుకుంది. గత రెండు ట్రేడింగ్ రోజుల్లో వెండి ధరలో ఏకంగా రూ. 7,366 క్షీణత నమోదైంది.

బంగారం, వెండి ధరలు పడిపోవడానికి అంతర్జాతీయంగా, ఆర్థికంగా పలు కారణాలు ఉన్నాయి. డిసెంబర్‌లో జరగబోయే ఫెడరల్ రిజర్వ్ పాలసీ మీటింగ్‌లో వడ్డీ రేట్లను తగ్గించే అవకాశం లేకపోవడం ఒక ప్రధాన కారణంగా నిపుణులు చెబుతున్నారు. వడ్డీ రేట్లు పెరిగితే, డాలర్‌కు డిమాండ్ పెరుగుతుంది, దీంతో బంగారంపై ఒత్తిడి పెరుగుతుంది. డాలర్ ఇండెక్స్ బలపడటం వల్ల బంగారం ధరలు ఒత్తిడికి గురవుతున్నాయి. ప్రపంచవ్యాప్తంగా భౌగోళిక రాజకీయ ఉద్రిక్తతలు, వాణిజ్య ఉద్రిక్తతలు తగ్గడం వల్ల, సురక్షిత పెట్టుబడిగా భావించే బంగారం డిమాండ్ తగ్గింది. ప్రభుత్వ షట్‌డౌన్ ముగియడం వంటి గ్లోబల్ పరిణామాలు కూడా ధరల క్షీణతకు దోహదపడ్డాయి.

వెల్త్ రీసెర్చ్ మేనేజ్‌మెంట్ డైరెక్టర్ అనుజ్ గుప్తా వంటి ఆర్థిక నిపుణుల అభిప్రాయం ప్రకారం.. డాలర్ పెరుగుదల కారణంగా బంగారంపై ఒత్తిడి ఉన్నప్పటికీ ధరల్లో ఈ తగ్గుదల పెట్టుబడిదారులకు ఒక మంచి అవకాశంగా మారే అవకాశం ఉంది. ఫెడ్ వడ్డీ రేట్లను తగ్గించదనే సంకేతాలు ఉన్నప్పటికీ రాబోయే రోజుల్లో బంగారం, వెండిలో పెట్టుబడి పెట్టడానికి మంచి అవకాశం లభిస్తుందని వారు అంచనా వేస్తున్నారు. కాబట్టి, దీర్ఘకాలిక పెట్టుబడి కోసం చూస్తున్నవారు ఈ తగ్గిన ధరలను ఉపయోగించుకోవచ్చని సూచిస్తున్నారు.