MG Majestor : రోడ్డు మీద ఇది వెళ్తుంటే ఏనుగు వెళ్తున్నట్టే ఉంటుంది భయ్యా..ఫార్చ్యూనర్ కి ఇక రిటైర్మెంటే.
MG Majestor : భారతదేశంలో ఎస్యూవీలంటే అందరికీ గుర్తొచ్చే పేరు టయోటా ఫార్చ్యూనర్. అయితే ఇప్పుడు ఫార్చ్యూనర్ ఏకచ్ఛత్రాధిపత్యానికి చెక్ పెట్టేందుకు ఎంజీ మోటార్స్ సిద్ధమైంది. మిడిల్ ఈస్ట్ దేశాల్లో రాకన్ పేరుతో విడుదలైన సరికొత్త ఎంజీ ఎస్యూవీ, త్వరలోనే భారత మార్కెట్లోకి ఎంజీ మజేస్టర్ పేరుతో ఎంట్రీ ఇవ్వబోతోంది. ఇప్పటికే ఉన్న ఎంజీ గ్లోస్టర్ కంటే ఇది మరింత శక్తివంతమైనదిగా, విలాసవంతమైనదిగా ఉండబోతోంది. భారతదేశంలో ఎంజీ మోటార్స్ తన ఫ్లాగ్షిప్ ఎస్యూవీ గ్లోస్టర్ కంటే పై స్థాయిలో మజేస్టర్ ను నిలబెట్టాలని ప్లాన్ చేస్తోంది. తాజాగా మిడిల్ ఈస్ట్లో రాకన్ పేరుతో విడుదలైన ఈ కారు డిజైన్ పరంగా చాలా అగ్రెసివ్గా ఉంది. ముందు భాగంలో సన్నని ఎల్ఈడీ డే-టైమ్ రన్నింగ్ లైట్లు, భారీ గ్లోస్ బ్లాక్ గ్రిల్, సిల్వర్ స్కిడ్ ప్లేట్లు కారుకు ఒక గంభీరమైన రూపాన్ని ఇచ్చాయి. సైడ్ ప్రొఫైల్లో కొత్త డ్యూయల్-టోన్ అలాయ్ వీల్స్, వెనుక భాగంలో కనెక్టెడ్ ఎల్ఈడీ టెయిల్ ల్యాంప్స్ దీనిని ఒక ఆధునిక ఎస్యూవీగా మార్చాయి.
లోపలి భాగంలో విలాసానికి లోటు లేదు. బ్రౌన్, వైట్ డ్యూయల్-టోన్ ఇంటీరియర్స్తో పాటు 12.3-అంగుళాల భారీ టచ్స్క్రీన్, డిజిటల్ ఇన్స్ట్రుమెంట్ క్లస్టర్ ఉన్నాయి. దీని ప్రత్యేకత ఏమిటంటే, ముందు సీట్లలో మసాజ్ ఫంక్షన్ ఉండటం. అంతేకాకుండా 12-స్పీకర్ల JBL సౌండ్ సిస్టమ్, మల్టీ-జోన్ క్లైమేట్ కంట్రోల్ వంటి ఫీచర్లు ప్రయాణాన్ని ఎంజాయ్ చేసేలా చేస్తాయి. ఇక లగేజీ విషయానికి వస్తే, వెనుక సీట్లను మడిచినప్పుడు ఏకంగా 2,400 లీటర్ల బూట్ స్పేస్ లభిస్తుంది.
ఇంజిన్ సామర్థ్యం పరంగా.. విదేశీ మార్కెట్లో ఇది 247 bhp పవర్, 500 Nm టార్క్ను ఇచ్చే 2.0-లీటర్ టర్బో-డీజిల్ ఇంజిన్తో వచ్చింది. అయితే ఇండియాలో గ్లోస్టర్లో వాడుతున్న 2.0-లీటర్ ట్విన్-టర్బో డీజిల్ ఇంజిన్ను (212 bhp, 478 Nm) మజేస్టర్లో కూడా కొనసాగించే అవకాశం ఉంది. దీనికి 8-స్పీడ్ ZF ఆటోమేటిక్ గేర్బాక్స్ మరియు ఆల్-వీల్ డ్రైవ్ (AWD) వ్యవస్థ అదనపు బలాన్ని ఇస్తాయి. టెర్రైన్ మోడ్స్ మరియు డిఫరెన్షియల్ లాక్ ఉండటం వల్ల ఇది ఎలాంటి రోడ్లపైనైనా సునాయాసంగా దూసుకుపోతుంది.
ధర విషయానికొస్తే, ఎంజీ గ్లోస్టర్ ప్రస్తుతం రూ.38.3 లక్షల నుంచి రూ.42.5 లక్షల మధ్యలో ఉంది. కొత్తగా వచ్చే మజేస్టర్ ధర రూ.45 లక్షల నుంచి ప్రారంభమయ్యే అవకాశం ఉంది. ఇది మార్కెట్లోకి వస్తే టయోటా ఫార్చ్యూనర్, స్కోడా కోడియాక్, జీప్ మెరిడియన్, వోక్స్వ్యాగన్ టైరాన్ వంటి కార్లకు గట్టి పోటీ ఇవ్వడం ఖాయం. ముఖ్యంగా ఫార్చ్యూనర్ ధరలు ఆకాశాన్ని తాకుతున్న ఈ సమయంలో అదే బడ్జెట్లో మరిన్ని ఫీచర్లతో వచ్చే మజేస్టర్ వైపు కస్టమర్లు మొగ్గు చూపే ఛాన్స్ ఉంది.