Kia Seltos Launch : డిసెంబర్ 10న కొత్త కియా సెల్టోస్ లాంచ్.. లుక్ మార్చి వచ్చేస్తోంది.
Kia Seltos Launch : కియా మోటార్స్, భారతదేశంలో తమ అత్యంత ప్రజాదరణ పొందిన మోడల్ సెల్టోస్ నెక్స్ట్-జనరేషన్ వెర్షన్‌ను తీసుకురావడానికి సిద్ధమవుతోంది. కొత్త లుక్, అడ్వాన్సుడ్ ఫీచర్లతో రానున్న ఈ కారును కియా డిసెంబర్ 10, 2025న భారతదేశంలో ఆవిష్కరించనుంది. ఆన్‌లైన్‌లో లీక్ అయిన ఫోటోలను బట్టి చూస్తే, కొత్త సెల్టోస్ ముందు భాగం మరింత మస్కులర్‌గా, స్క్వేర్ ఆకారంలో ఉండనుంది. టైట్ మెష్ ప్యాటర్న్‌తో కూడిన కొత్త డిజైన్ గ్రిల్, పవర్ఫుల్ లుక్ దీని ప్రధాన ఆకర్షణ.
ఎక్స్‌టీరియర్ డిజైన్ మార్పులు
కొత్త జనరేషన్ కియా సెల్టోస్ డిజైన్‌లో మునుపటి మోడల్ కంటే అనేక ముఖ్యమైన మార్పులు చేసింది, ముఖ్యంగా కారు ముందు, వెనుక భాగాలలో. ముందు భాగం మునుపటి కంటే మరింత స్క్వేర్ గా కనిపిస్తుంది. కొత్తగా డిజైన్ చేసిన గ్రిల్, టైట్ మెష్ ప్యాటర్న్‌తో ఆకర్షణీయంగా ఉంది. బంపర్ మూలల వరకు విస్తరించిన వర్టికల్ LED హెడ్‌ల్యాంప్‌లు, C-ఆకారంలో ఉన్న డే-టైమ్ రన్నింగ్ లైట్లు దీనికి మరింత స్పోర్టీ లుక్‌ను ఇస్తున్నాయి. ఇక సైడ్ లుక్ విషయానికి వస్తే, వై-ప్యాటర్న్ డ్యూయల్-టోన్ అల్లాయ్ వీల్స్, షార్ప్ ట్రయాంగ్లర్ వెనుక సైడ్ గ్లాస్ సెక్షన్, మస్కులర్ వీల్ ఆర్చెస్ కారణంగా ఇది మరింత పవర్ఫుల్ సైడ్ సిల్హౌట్‌ను కలిగి ఉంది. వెనుక భాగంలో, వెనుక బంపర్, టెయిల్ గేట్ ప్యానెల్‌లు పూర్తిగా కొత్తగా కనిపిస్తున్నాయి. మిర్రర్డ్ C-ఆకారంలో ఉన్న కొత్త LED టెయిల్ ల్యాంప్‌లు సన్నని లైటింగ్ స్ట్రిప్‌తో టెయిల్‌గేట్‌పై కనెక్ట్ అయ్యి మోడ్రన్ లుక్ ఇస్తున్నాయి.
క్యాబిన్, టెక్నాలజీ అప్‌డేట్‌లు
కారు కేబిన్ కూడా కియా అనేక అప్‌డేట్‌లను అందించింది. డ్యాష్‌బోర్డ్ మునుపటి కంటే మరింత ఫ్లాట్‌గా, విశాలంగా కనిపిస్తోంది, దీనికి ప్రీమియం ఫినిషింగ్ జోడించారు. ఈ కొత్త డిజైన్‌లో ప్రధాన ఆకర్షణ ఏమిటంటే.. ఒకే గ్లాస్ ప్యానెల్‌లో పొందుపరిచిన పెద్ద ఇన్ఫోటైన్‌మెంట్ డిస్‌ప్లే, పూర్తి డిజిటల్ క్లస్టర్. కియా అదనపు ఫీచర్లతో పాటు, అప్‌డేటెడ్ ఇన్ఫోటైన్‌మెంట్ ఇంటర్‌ఫేస్‌ను కూడా తీసుకురానుంది. అలాగే, వెంటిలేటెడ్ సీట్లు, పవర్డ్ డ్రైవర్ సీటు, పనోరమిక్ సన్‌రూఫ్, క్లైమేట్ కంట్రోల్ వంటి ఉన్నత స్థాయి ఫీచర్లు పాత మోడల్ నుంచే కొనసాగుతాయి. సేఫ్టీ పరంగా, కియా ఎక్స్ ట్రా టెక్నాలజీని జోడిస్తూ ADAS (అడ్వాన్స్‌డ్ డ్రైవర్ అసిస్టెన్స్ సిస్టమ్స్) సూట్‌ను మరింత విస్తరించే అవకాశం ఉంది.
ఇంజిన్, పవర్‌ట్రెయిన్ ఆప్షన్లు
మెకానికల్ గా కొత్త సెల్టోస్‌లో పాత ఇంజిన్ ఆప్షన్లే కొనసాగే అవకాశం ఉంది. ఇందులో 1.5-లీటర్ నాచురల్లీ ఆస్పిరేటెడ్ పెట్రోల్ ఇంజిన్, 1.5-లీటర్ టర్బో పెట్రోల్ ఇంజిన్, 1.5-లీటర్ డీజిల్ ఇంజిన్ వంటి ఆప్షన్లు ఉంటాయి. అన్ని ఇంజిన్ ఆప్షన్లలో మాన్యువల్ , ఆటోమేటిక్ ట్రాన్స్‌మిషన్ ఆప్షన్లు అందుబాటులో ఉంటాయి. అంతేకాకుండా కొన్ని మార్కెట్‌ల కోసం ఒక స్ట్రాంగ్ హైబ్రిడ్ వేరియంట్ కూడా చర్చలో ఉంది. ఈ కొత్త సెల్టోస్ భారత మార్కెట్లో హ్యుందాయ్ క్రెటా, మారుతి సుజుకి గ్రాండ్ విటారా, టయోటా హైరైడర్, వోక్స్‌వ్యాగన్ టైగన్, స్కోడా కుషాక్, టాటా కర్వ్, సియెర్రా వంటి కార్లతో గట్టి పోటీని కొనసాగిస్తుంది.