Maruti Suzuki Wagon R : కేవలం రూ.50 వేల డౌన్ పేమెంట్‌తో మీ ఇంటికి వ్యాగన్ ఆర్.. నెలకు ఎంత కట్టాలంటే ?

Maruti Suzuki Wagon R : భారతీయ మధ్యతరగతి కుటుంబాలకు కారు అంటే మొదట గుర్తొచ్చే పేరు మారుతి సుజుకి వ్యాగన్ ఆర్. దశాబ్దాలుగా గల్లీ నుంచి హైవే వరకు తిరుగులేని రారాజుగా వెలుగుతున్న ఈ హ్యాచ్‌బ్యాక్, ఇప్పుడు సరికొత్త హంగులతో మన ముందుకు వచ్చింది. కేవలం మైలేజీ మాత్రమే కాదు, ఈసారి సేఫ్టీ విషయంలోనూ మారుతి ఒక అడుగు ముందుకు వేసింది. కొత్త వ్యాగన్ ఆర్‌లో ఏకంగా 6 ఎయిర్‌బ్యాగ్‌లను స్టాండర్డ్ ఫీచర్‌గా అప్‌డేట్ చేయడంతో, ఇది ఇప్పుడు మరింత సురక్షితమైన ఫ్యామిలీ కారుగా మారింది. ఆఫీస్ వెళ్లేవారికి, చిన్న కుటుంబాలకు ఇది ఒక పర్ఫెక్ట్ ఛాయిస్.

ధర విషయానికి వస్తే.. ఢిల్లీలో వ్యాగన్ ఆర్ బేస్ వేరియంట్ (LXI పెట్రోల్) ఎక్స్-షోరూమ్ ధర కేవలం రూ.4.98 లక్షల నుంచే ప్రారంభమవుతుంది. ఆర్‌టీఓ, ఇన్సూరెన్స్ వంటి అన్ని ఖర్చులు కలిపితే ఆన్-రోడ్ ధర సుమారు రూ.5.63 లక్షల వరకు ఉండవచ్చు. అయితే, కారు కొనాలనుకునే వారికి మారుతి ఒక అదిరిపోయే వెసులుబాటు కల్పిస్తోంది. మీ క్రెడిట్ స్కోర్ బాగుంటే, కేవలం 50,000 రూపాయల డౌన్ పేమెంట్ కట్టి ఈ కారును ఇంటికి తీసుకెళ్లవచ్చు. మిగిలిన మొత్తాన్ని సులభ వాయిదాల పద్ధతిలో చెల్లించే అవకాశం ఉంది.

ఒకవేళ మీరు రూ.50 వేల డౌన్ పేమెంట్ కడితే, మిగిలిన రూ.5.13 లక్షల మొత్తానికి కారు లోన్ తీసుకోవాల్సి ఉంటుంది. ఉదాహరణకు మీరు 9 శాతం వడ్డీ రేటుతో 5 ఏళ్ల కాలపరిమితికి లోన్ తీసుకున్నారనుకుంటే, నెలకు సుమారు రూ.10,664 ఈఎంఐ పడుతుంది. మొదటిసారి కారు కొనేవారికి మరియు నెలవారీ బడ్జెట్ ప్లాన్ చేసుకునే వారికి ఇది చాలా తక్కువ మొత్తం అనే చెప్పాలి. ఇక మైలేజీ విషయానికి వస్తే వ్యాగన్ ఆర్ ఎప్పుడూ టాపే. పెట్రోల్ వెర్షన్ లీటరుకు 25.19 కి.మీ. మైలేజీ ఇస్తుండగా, సీఎన్‌జీ వెర్షన్ ఏకంగా కేజీకి 34.05 కి.మీ. వరకు మైలేజీ ఇస్తోంది.

మారుతి వ్యాగన్ ఆర్ ఫీచర్ల పరంగా కూడా ఎక్కడా తగ్గలేదు. ఇందులో 7-ఇంచుల టచ్‌స్క్రీన్ సిస్టమ్ ఉంది, ఇది ఆండ్రాయిడ్ ఆటో, ఆపిల్ కార్ ప్లేను సపోర్ట్ చేస్తుంది. కీ లెస్ ఎంట్రీ, పవర్ విండోస్, లగేజీ పెట్టుకోవడానికి 341 లీటర్ల భారీ బూట్ స్పేస్ ఇందులో ఉన్నాయి. సేఫ్టీ కోసం 6 ఎయిర్‌బ్యాగ్‌లతో పాటు ఏబీఎస్, ఈబీడీ, ఈఎస్‌పీ, రియర్ పార్కింగ్ సెన్సార్స్, రియర్ కెమెరా వంటి మోడ్రన్ ఫీచర్లు కస్టమర్లకు లభిస్తున్నాయి. మొత్తానికి తక్కువ బడ్జెట్‌లో ఎక్కువ భద్రత, అదిరిపోయే మైలేజీ కావాలనుకునే వారికి వ్యాగన్ ఆర్ ఒక అద్భుతమైన వరం.