Crude Oil : ఇరాన్ యుద్ధంతో భగ్గుమంటున్న చమురు మార్కెట్. 15 నెలల గరిష్టానికి క్రూడ్ ఆయిల్ ధరలు.

Crude Oil : పశ్చిమ ఆసియాలో యుద్ధ మేఘాలు కమ్ముకోవడంతో అంతర్జాతీయ మార్కెట్‌లో ముడిచమురు ధరలు భగ్గుమంటున్నాయి. ఇరాన్‌పై అమెరికా-ఇజ్రాయెల్ దాడులు, అగ్రనేత అలీ ఖమేనీ మరణంతో పరిస్థితులు ఒక్కసారిగా మారిపోయాయి. సోమవారం ట్రేడింగ్‌లో చమురు ధరలు ఏకంగా 7 శాతం పెరిగి, గత 15 నెలల గరిష్ట స్థాయికి చేరుకున్నాయి. యుద్ధం కారణంగా సముద్ర మార్గాల్లో ఆయిల్ ట్యాంకర్లపై దాడులు జరగడం, షిప్‌మెంట్లు నిలిచిపోవడంతో సరఫరాకు తీవ్ర అంతరాయం ఏర్పడింది. దీంతో గల్ఫ్ దేశాల ముడిచమురు ధర బ్యారెల్‌కు 82 డాలర్లు దాటగా, అమెరికన్ క్రూడ్ ఆయిల్ 75 డాలర్ల మార్కును తాకింది. ఈ ఉద్రిక్తతలు ఇలాగే కొనసాగితే త్వరలోనే చమురు ధరలు బ్యారెల్‌కు 100 డాలర్లకు చేరుకోవచ్చని మార్కెట్ విశ్లేషకులు హెచ్చరిస్తున్నారు.

అంతర్జాతీయ మార్కెట్ గణాంకాల ప్రకారం.. బ్రెంట్ క్రూడ్ ఫ్యూచర్స్ ధర 82.37 డాలర్లకు చేరింది, ఇది జనవరి 2025 తర్వాత అత్యధికం. శనివారం ఇరాన్‌పై జరిగిన దాడుల ప్రభావం నేరుగా సోమవారం నాటి ట్రేడింగ్‌పై పడింది. భారత కాలమానం ప్రకారం సోమవారం ఉదయం నుంచే మార్కెట్‌లో కొనుగోళ్ల ఒత్తిడి పెరిగింది. అమెరికాకు చెందిన వెస్ట్ టెక్సాస్ ఇంటర్మీడియట్ క్రూడ్ కూడా దాదాపు 7 శాతం పెరిగి 71.68 డాలర్ల వద్ద ట్రేడవుతోంది. ఒక దశలో ఇది 75.33 డాలర్ల వరకు వెళ్లడం గమనార్హం. కేవలం 24 గంటల వ్యవధిలో ప్రపంచ ఆర్థిక వ్యవస్థను కుదిపేసేలా చమురు ధరలు పెరగడం ఆందోళన కలిగిస్తోంది.

యుద్ధం కేవలం సరిహద్దులకే పరిమితం కాకుండా, సముద్ర మార్గాలపై కూడా ప్రభావం చూపుతోంది. ఇజ్రాయెల్ క్షిపణి దాడులకు ప్రతిగా ఇరాన్ కూడా ఎదురుదాడులు ప్రారంభించింది. ఈ క్రమంలో గల్ఫ్ తీరంలోని కనీసం మూడు ఆయిల్ ట్యాంకర్లపై మిసైల్ దాడులు జరిగాయి, ఇందులో ఒక నావికుడు ప్రాణాలు కోల్పోయాడు. ప్రపంచ చమురు రవాణాలో అత్యంత కీలకమైన హార్ముజ్ జలసంధి గుండా ప్రయాణాలను నిలిపివేస్తున్నట్లు ఇరాన్ ప్రకటించడంతో ఆసియా దేశాల్లో ఆందోళన మొదలైంది. ప్రస్తుతం ఆ జలసంధి సమీపంలో సుమారు 200 ఆయిల్ మరియు గ్యాస్ ట్యాంకర్లు లంగరు వేసి వేచి చూస్తున్నాయి. సరఫరా గొలుసు దెబ్బతింటే ప్రపంచవ్యాప్తంగా ఇంధన కొరత ఏర్పడే ప్రమాదం ఉంది.

భారతదేశంపై దీని ప్రభావం ఎలా ఉంటుందనే ప్రశ్న ఇప్పుడు అందరిలోనూ తలెత్తుతోంది. మన దేశం తన అవసరాలకు కావాల్సిన చమురులో 80 శాతానికి పైగా దిగుమతులపైనే ఆధారపడుతుంది. అయితే, ప్రస్తుతానికి పెట్రోల్, డీజిల్ ధరలు పెరిగే అవకాశం లేదని నిపుణులు చెబుతున్నారు. భారత్ వద్ద సరిపడా చమురు నిల్వలు ఉండటం, రష్యా నుంచి తక్కువ ధరకు చమురు దిగుమతి చేసుకునే అవకాశం ఉండటమే దీనికి కారణం. కానీ ఒకవేళ అంతర్జాతీయ మార్కెట్‌లో బ్యారెల్ ధర 100 డాలర్లు దాటితే మాత్రం, దేశీయంగా లీటరు పెట్రోల్, డీజిల్ ధరలు రూ.3 నుంచి రూ.5 వరకు పెరిగే అవకాశం ఉంది. ప్రభుత్వం పరిస్థితిని ఎప్పటికప్పుడు సమీక్షిస్తోంది.