Ola : చైనా గుత్తాధిపత్యానికి చెక్.. అద్భుతమైన ఘనత సాధించిన ఓలా.
Ola : ఓలా ఎలక్ట్రిక్ సంస్థ దేశీయంగా ఒక గొప్ప విజయాన్ని సాధించింది. పూర్తిగా భారత్‌లోనే తయారు చేసిన ఫెర్రైట్ మోటార్ కోసం ప్రభుత్వ సర్టిఫికెట్ పొందిన దేశంలోనే మొదటి ఎలక్ట్రిక్ టూ-వీలర్ కంపెనీగా ఇది రికార్డు సృష్టించింది. ఈ ఫెర్రైట్ మోటార్ అనేది రేర్-ఎర్త్ మ్యాగ్నెట్‌లు లేకుండా తయారు చేయబడిన మోటార్, దీనిని ఎలక్ట్రిక్ వాహనాల్లో ఉపయోగిస్తారు. బెంగుళూరు కేంద్రంగా పనిచేస్తున్న ఈ కంపెనీ దీనిని చాలా పెద్ద విషయంగా అభివర్ణించింది. ఈ మోటారును ఉపయోగించడం వల్ల, ఇతర దేశాల నుంచి దిగుమతి చేసుకునే ఖరీదైన, రేర్ ఎర్త్ మెటల్స్ ఆధారిత మ్యాగ్నెట్‌లపై మన ఆధారపడటం పూర్తిగా తగ్గిపోతుంది.
ఓలా ఎలక్ట్రిక్ తయారు చేసిన ఈ ఫెర్రైట్ మోటార్‌ను ప్రభుత్వ పరీక్షా సంస్థ అయిన గ్లోబల్ ఆటోమోటివ్ రీసెర్చ్ సెంటర్(తమిళనాడు) ధృవీకరించింది. ఈ సర్టిఫికేషన్ ఇచ్చే ముందు ఈ మోటారు AIS 041 (రోడ్డు రవాణా మంత్రిత్వ శాఖ నిర్ణయించిన కఠిన ప్రమాణం) ప్రకారం అనేక కఠినమైన పనితీరు పరీక్షలు, పవర్ తనిఖీలలో ఉత్తీర్ణత సాధించింది.
సర్టిఫికేషన్ లభించడంతో, ఓలా ఎలక్ట్రిక్ త్వరలో తమ రాబోయే వాహనాల్లో ఈ ఫెర్రైట్ మోటార్‌ను ఉపయోగించడం ప్రారంభిస్తుంది. దీనివల్ల దేశంలోని లక్షలాది మంది కస్టమర్లకు ప్రయోజనం చేకూరుతుందని కంపెనీ తెలిపింది. ఈ ఫెర్రైట్ మోటార్ కూడా రేర్ ఎర్త్ మెటల్స్ తయారు చేయబడిన మోటార్ల వలెనే చాలా పవర్ఫుల్. అంతేకాకుండా, దీని వినియోగం వల్ల తయారీ ఖర్చు తగ్గుతుంది. సప్లై చైన్ లో వచ్చే సమస్యలు కూడా తొలగిపోతాయి.
రేర్ ఎర్త్ మ్యాగ్నెట్‌లు భూమిలో లభించే అరుదైన పదార్థాల నుంచి తయారు చేస్తారు. వీటిని భూమి నుంచి తవ్వడం, ప్రాసెస్ చేయడం చాలా కష్టం, ఖర్చుతో కూడుకున్నది. ఈ విషయంలో చైనా ప్రపంచవ్యాప్తంగా ఆధిపత్యం చెలాయిస్తోంది. ప్రపంచవ్యాప్తంగా సరఫరా అయ్యే మొత్తం రేర్ ఎర్త్‌లో చైనా వాటా దాదాపు 90% వరకు ఉంది. కొద్ది నెలల క్రితం చైనా రేర్ ఎర్త్ ఎగుమతులపై కఠినమైన ఆంక్షలు విధించింది.