Home Loan vs. Investment: హోమ్ లోన్ త్వరగా తీర్చాలా లేక డబ్బు పెట్టుబడి పెట్టాలా? నిపుణులు ఏమంటున్నారంటే ?

Home Loan vs. Investment: హోమ్ లోన్ తీసుకుని ఇంటిని కొనుగోలు చేసిన ప్రతి యజమాని ఎప్పుడో ఒకప్పుడు ఇదే ఆలోచిస్తుంటారు. "హోమ్ లోన్ క్లియర్ చేయాలా లేదా ఆ డబ్బును పెట్టుబడి పెట్టి పెరిగేలా చేయాలా?" దీనికి ఒక ఖచ్చితమైన సమాధానం లేదు. సరైన నిర్ణయం మీ లోన్‌పై వడ్డీ రేటు ఎంత ఉంది, మీ రిస్క్ తీసుకునే సామర్థ్యం ఎంత, దీర్ఘకాలంలో మీ డబ్బుతో మీరు ఏమి సాధించాలనుకుంటున్నారు అనే దానిపై ఆధారపడి ఉంటుంది.

మీ హోమ్ లోన్‌పై వడ్డీ రేటు ఎక్కువగా, అంటే 9% కంటే ఎక్కువగా ఉంటే, దానిని త్వరగా తీర్చడం మంచిదే కావచ్చు. ఇలా చేయడం వల్ల మీరు వడ్డీ రూపంలో చెల్లించే డబ్బును ఆదా చేసుకోవచ్చు. సాధారణ ఫిక్స్‌డ్ డిపాజిట్లు లేదా తక్కువ రిస్క్ ఉన్న పెట్టుబడుల నుండి వచ్చే లాభం కంటే వడ్డీ ఆదా ఎక్కువ ఉంటుంది. దీనితో పాటు లోన్ లేకుండా ఉండటం వల్ల మానసిక ప్రశాంతత లభిస్తుంది. ఇల్లు పూర్తిగా మీ సొంతం కావడం అంటే తక్కువ నెలవారీ చెల్లింపులు, ఆర్థిక స్వేచ్ఛ లభించినట్లే. ముఖ్యంగా మీరు పదవీ విరమణకు దగ్గరగా ఉన్నప్పుడు లేదా అప్పులు పెట్టుకోవడానికి ఇష్టపడని వారికి ఈ నిర్ణయం చాలా ముఖ్యం.

మీ హోమ్ లోన్‌పై వడ్డీ రేటు తక్కువగా, అంటే 7% లేదా అంతకంటే తక్కువగా ఉండి, మీరు కొద్దిగా రిస్క్ తీసుకోవడానికి సిద్ధంగా ఉంటే, ఆ డబ్బును పెట్టుబడి పెట్టడం దీర్ఘకాలంలో ఎక్కువ లాభాన్ని ఇవ్వగలదు. ఉదాహరణకు, ఈక్విటీ మ్యూచువల్ ఫండ్‌లు దీర్ఘకాలంలో సగటున 10-12% వార్షిక రాబడిని ఇవ్వగలవు, ఇది లోన్ ముందే తీర్చడం వల్ల కలిగే ఆదా కంటే ఎక్కువ. క్రమం తప్పకుండా ఆదాయం ఉన్నవారు, ఎమర్జెన్సీ ఫండ్ ఉన్నవారు, రిస్క్ నుండి రక్షణ కోసం తగినంత ఇన్సూరెన్స్ ఉన్నవారికి ఈ ప్రణాళిక సరైనది.

నిర్ణయం కేవలం అంకెలపైనే ఆధారపడదు, మానసిక సంతృప్తి కూడా చాలా అవసరం. కొంతమంది తక్కువ రాబడి వచ్చినా, అప్పులు లేకుండా ప్రశాంతంగా నిద్రపోతారు. మరికొంతమంది తమ డబ్బును పెట్టుబడిలో ఉంచుకోవడం సురక్షితంగా భావిస్తారు. ముఖ్యమైన విషయం ఏమిటంటే.. మీకు సేఫ్టీని అందించేది.. ఆందోళనలను దూరం చేసే ఆప్షన్ ఎంచుకోవాలి.

మీరు మొత్తం డబ్బును ఒకే ఆప్షన్లో పెట్టుబడి పెట్టాల్సిన అవసరం లేదు. కొన్నిసార్లు, మీరు చిన్న మొత్తాలలో లోన్‌ను ముందే చెల్లించవచ్చు. అదే సమయంలో క్రమం తప్పకుండా పెట్టుబడిని కూడా కొనసాగించవచ్చు. దీనివల్ల లోన్ వ్యవధి తగ్గుతుంది. దీర్ఘకాలిక కాంపౌండింగ్ ప్రయోజనం కూడా లభిస్తుంది. ఇది లోన్ భారాన్ని తగ్గించడంతో పాటు మీ సంపదను పెంచుకోవడానికి కూడా సహాయపడుతుంది.