RBI Governor : డిసెంబర్‌లో తగ్గనున్న ఈఎంఐ భారం..ఆర్బీఐ గవర్నర్ కీలక వ్యాఖ్యలు.
RBI Governor : అమెరికా ఫెడ్ రిజర్వ్ ఛైర్మన్ జెరోమ్ పావెల్ ఇటీవల వడ్డీ రేట్ల తగ్గింపుపై సంకేతాలు ఇవ్వగా, ఇప్పుడు రిజర్వ్ బ్యాంక్ ఆఫ్ ఇండియా గవర్నర్ కూడా దాదాపు అలాంటి సంకేతాలనే ఇచ్చారు. దీని అర్థం ఏమిటంటే.. డిసెంబర్ నెలలో జరగబోయే మానిటరీ పాలసీ మీటింగ్‌లో సామాన్య ప్రజల లోన్ ఈఎంఐలు తగ్గుముఖం పట్టే అవకాశం ఉంది. అక్టోబర్ సమావేశంలో వడ్డీ రేట్లను వరుసగా రెండోసారి స్థిరంగా ఉంచిన తర్వాత, ఆర్బీఐ గవర్నర్ ద్రవ్యోల్బణం తగ్గుతుందని అంచనా వేయడం, వృద్ధి రేటు అంచనాలను పెంచడం వంటి అంశాలు రాబోయే కోతలకు దారి తీస్తున్నాయి.
రిజర్వ్ బ్యాంక్ ఆఫ్ ఇండియా మానిటరీ పాలసీ కమిటీ ఇటీవల ముగిసిన సమావేశ వివరాలను బుధవారం విడుదల చేసింది. ఈ సమావేశంలో గవర్నర్ సంజయ్ మల్హోత్రా వడ్డీ రేట్లలో ఇంకా కోతకు అవకాశం ఉందని స్పష్టం చేశారు. అయితే, ఆశించిన ప్రభావం కోసం సరైన సమయంలో దానిని అమలు చేస్తామని ఆయన సంకేతం ఇచ్చారు. అక్టోబర్ 1న జరిగిన ఎంపీసీ సమావేశంలో గవర్నర్ మిగిలిన ఐదుగురు సభ్యులతో కలిసి రెపో రేటును 5.50 శాతం వద్ద స్థిరంగా ఉంచేందుకు ఓటు వేశారు. ద్రవ్యోల్బణం అంచనాలలో మార్పుల కారణంగా వృద్ధికి మరింత మద్దతు ఇచ్చేందుకు పాలసీలో అవకాశం ఏర్పడిందని ఆయన అక్టోబర్ సమావేశంలో పేర్కొన్నారు.
"వడ్డీ రేట్లలో మరింత కోతకు అవకాశం ఉన్నప్పటికీ, అది అమలు చేయడానికి ఇదే సరైన సమయం కాదని నేను భావిస్తున్నాను. ఎందుకంటే అప్పుడు ఆశించిన ఫలితం ఉండదు" అని సంజయ్ మల్హోత్రా అక్టోబర్ సమావేశంలో స్పష్టం చేశారు. అందుకే, రెపో రేటును 5.50 శాతం వద్ద స్థిరంగా ఉంచడానికి ఓటు వేస్తున్నట్లు ఆయన తెలిపారు. అయినప్పటికీ, వృద్ధిని పెంచే పరిస్థితులను సులభతరం చేయడమే తమ లక్ష్యమని ఆయన పేర్కొన్నారు. ఆర్బీఐ డిప్యూటీ గవర్నర్ పూనమ్ గుప్తా కూడా ద్రవ్యోల్బణం, వృద్ధి కలయిక కారణంగా వడ్డీ రేట్లను మరింత తగ్గించే అవకాశం ఏర్పడిందని అభిప్రాయపడ్డారు.
ప్రస్తుత ఆర్థిక సంవత్సరంలో ఆర్బీఐ ఫిబ్రవరి నుంచి జూన్ మధ్య జరిగిన మూడు సమావేశాల్లో రెపో రేటును మొత్తం 1 శాతం తగ్గించింది. అయితే, ఆగస్టు, అక్టోబర్ సమావేశాల్లో వడ్డీ రేట్లను 5.50 శాతం వద్ద స్థిరంగా ఉంచింది. ఇప్పుడు వరుసగా రెండుసార్లు వడ్డీ రేట్లను స్థిరంగా ఉంచిన తర్వాత, డిసెంబర్ 3 నుంచి 5, 2025 మధ్య జరగబోయే ఎంపీసీ సమావేశంలో వడ్డీ రేటు కోత తప్పదని మార్కెట్ నిపుణులు భావిస్తున్నారు. ఈసారి ఆర్బీఐ 25 బేసిస్ పాయింట్ల కోతను ప్రకటించి, తద్వారా ఫిబ్రవరిలో మరో కోతకు అవకాశం ఉంచుతుందని అంచనా వేస్తున్నారు. అంటే, ఈ ఆర్థిక సంవత్సరంలో మొత్తం 50 బేసిస్ పాయింట్ల తగ్గింపును ఆశించవచ్చు.