RD vs SIP : ఆర్‌డీ vs ఎస్‌ఐపీ.. పెట్టుబడికి ఏది బెస్ట్? భారీ రిటర్న్స్ కోసం ఎందులో డబ్బులు పెట్టాలి?

RD vs SIP : ప్రతి ఒక్కరూ తమ సంపాదనలో కొంత భాగాన్ని పొదుపు చేయాలని, పెట్టుబడి పెట్టాలని ఆలోచిస్తారు. ఎందుకంటే పెట్టుబడి అనేది కష్టకాలంలో, ఆర్థిక అవసరాలు పెరిగినప్పుడు సాయం చేస్తుంది. పెట్టుబడి పెట్టడానికి మార్కెట్‌లో చాలా మార్గాలు ఉన్నప్పటికీ, స్థిరమైన పొదుపు కోసం రికరింగ్ డిపాజిట్, మంచి రాబడి కోసం మ్యూచువల్ ఫండ్స్ ద్వారా ఎస్‌ఐపీ పద్ధతులు బాగా ప్రాచుర్యం పొందాయి. అయితే, ఈ రెండింటిలో ఏది బెస్ట్.. దేనిలో డబ్బులు పెడితే ఎక్కువ లాభం వస్తుందో, ఏది సురక్షితమో తెలుసుకుందాం.

రికరింగ్ డిపాజిట్ అంటే ఏమిటి?

రికరింగ్ డిపాజిట్ అనేది చాలా సురక్షితమైన పెట్టుబడి మార్గం. ఇందులో మీరు ప్రతి నెలా ఒక నిర్ణీత మొత్తాన్ని (ఉదాహరణకు రూ.1000) బ్యాంక్ లేదా పోస్టాఫీసులో ఒక నిర్ణీత కాలానికి జమ చేస్తారు. ఈ పథకంలో మీరు జమ చేసే డబ్బుపై వడ్డీ రేటు ముందే నిర్ణయించబడి ఉంటుంది. కాబట్టి మీ డబ్బుకు ఉన్న రిస్క్ దాదాపు సున్నా అని చెప్పవచ్చు. ఈ పథకం 6 నెలల నుంచి 10 సంవత్సరాల వరకు ఉంటుంది. గడువు పూర్తయిన తర్వాత, మీరు జమ చేసిన మొత్తం డబ్బు, దానిపై వచ్చిన వడ్డీ మీకు తిరిగి వస్తుంది. అయితే, ఆర్‌డీలో రాబడి రేటు సంవత్సరానికి 6% నుంచి 7.5% మధ్య స్థిరంగా ఉంటుంది.

సిస్టమ్యాటిక్ ఇన్వెస్ట్‌మెంట్ ప్లాన్ (SIP) అంటే ఏమిటి?

సిస్టమ్యాటిక్ ఇన్వెస్ట్‌మెంట్ ప్లాన్ (SIP) అనేది మ్యూచువల్ ఫండ్స్‌లో క్రమంగా పెట్టుబడి పెట్టే పద్ధతి. ఇందులో కూడా మీరు ప్రతి నెలా ఒక నిర్ణీత మొత్తాన్ని ఎంచుకున్న మ్యూచువల్ ఫండ్ పథకంలో ఇన్వెస్ట్ చేస్తారు. అయితే, ఈ పెట్టుబడి నేరుగా షేర్ మార్కెట్‌తో ముడిపడి ఉంటుంది కాబట్టి, ఇందులో కొంత రిస్క్ ఉంటుంది. దీర్ఘకాలం (5 సంవత్సరాలు లేదా అంతకంటే ఎక్కువ) పాటు ఈ రిస్క్‌ను భరించేవారికి, ఆర్‌డీ కంటే ఎక్కువ రాబడి (సగటున 10% నుంచి 15% వార్షికంగా) లభించే అవకాశం ఉంది. ఇందులో కఠినమైన లాక్-ఇన్ పీరియడ్ ఉండదు, కాబట్టి మార్కెట్‌ను బట్టి పెట్టుబడిని విత్‌డ్రా చేసుకునే సౌలభ్యం ఉంటుంది.

ముఖ్యమైన తేడాలు

ఈ రెండు పథకాలు రెగ్యులర్ పొదుపుకు ఉపయోగపడినప్పటికీ, వీటి మధ్య కొన్ని ప్రధాన తేడాలు ఉన్నాయి. ఆర్‌డీలో రాబడి స్థిరంగా ఉంటుంది. మీ పెట్టుబడికి పూర్తి హామీ ఉంటుంది. కానీ ఎస్‌ఐపీలో రాబడి మార్కెట్‌పై ఆధారపడి ఉంటుంది. కాబట్టి మార్కెట్ పెరిగితే ఎక్కువ లాభం, తగ్గితే కొంత నష్టం ఉండవచ్చు. ఆర్‌డీలో డబ్బును గడువుకు ముందు తీస్తే జరిమానా పడుతుంది. కానీ ఎస్‌ఐపీలో సులభంగా డబ్బు తీసుకోవచ్చు. పన్ను పరంగా కూడా రెండింటికి వేర్వేరు నిబంధనలు ఉన్నాయి.

ఈ రెండు పథకాలకు వాటి సొంత లాభాలు ఉన్నాయి. మీ ఆర్థిక లక్ష్యాలు, రిస్క్ సామర్థ్యం ఆధారంగా మీరు సరైన ఎంపిక చేసుకోవాలి. మీరు రిస్క్ తీసుకోదలచుకోకపోతే రికరింగ్ డిపాజిట్ మంచిది.. కొద్దిపాటి రిస్క్ తీసుకోవడానికి సిద్ధంగా ఉండి, ద్రవ్యోల్బణాన్ని అధిగమించేలా ఎక్కువ రాబడిని ఆశిస్తే మ్యూచువల్ ఫండ్స్ బెస్ట్ ఛాయిస్.