River Indie : ఓలా, ఏథర్ల గుండెల్లో రైళ్లు.. రివర్ ఇండీపై రూ.22,500 భారీ డిస్కౌంట్..ఇక సేల్స్ లో తగ్గేదే లే.

River Indie : కొత్త ఏడాది రాబోతున్న తరుణంలో ఎలక్ట్రిక్ స్కూటర్ కొనాలనుకునే వారికి ఒక అదిరిపోయే వార్త. బెంగళూరుకు చెందిన స్టార్టప్ కంపెనీ రివర్ మొబిలిటీ, తన పాపులర్ స్కూటర్ రివర్ ఇండీ మీద భారీ ఇయర్ ఎండ్ ఆఫర్లను ప్రకటించింది. డిసెంబర్ 31, 2025 వరకు ఈ స్కూటర్ కొనుగోలుపై మొత్తం రూ.22,500 వరకు ప్రయోజనాలను పొందవచ్చు. మార్కెట్లో ఓలా S1 ప్రో, ఏథర్ 450X, టీవీఎస్ ఐక్యూబ్ వంటి దిగ్గజాలకు గట్టి పోటీ ఇస్తున్న ఈ స్కూటర్, ఇప్పుడు ఈ డిస్కౌంట్లతో మరింత హాట్ కేకులా మారుతోంది.

ఈ ఆఫర్లలో భాగంగా హెచ్‌డీఎఫ్‌సీ, ఐసీఐసీఐ, యాక్సిస్ వంటి ప్రముఖ బ్యాంక్ క్రెడిట్ కార్డుల ద్వారా కొనుగోలు చేస్తే రూ.7,500 వరకు నేరుగా క్యాష్‌బ్యాక్ లభిస్తుంది. కేవలం క్యాష్‌బ్యాక్ మాత్రమే కాదు, డబ్బులు ఒకేసారి కట్టలేని వారి కోసం రూ.14,999 అతి తక్కువ డౌన్ పేమెంట్ ఆప్షన్‌ను కూడా కంపెనీ అందిస్తోంది. అంటే కేవలం 15 వేలు కట్టి స్కూటర్ ఇంటికి తీసుకెళ్లవచ్చు. దీనికి తోడు స్కూటర్ యాక్సెసరీస్ మీద కూడా ఈఎంఐ సౌకర్యం ఉండటం విశేషం. ప్రస్తుతం ఈ స్కూటర్ ఆన్ రోడ్ ధర సుమారు రూ.1.55 లక్షల నుండి ప్రారంభమవుతోంది.

రివర్ ఇండీ ఫీచర్లు చూస్తే ఎవరైనా ఫిదా అవ్వాల్సిందే. దీనిని ఎస్‌యూవీ ఆఫ్ స్కూటర్స్ అని పిలుస్తారు. ఎందుకంటే ఇందులో స్టోరేజ్ స్పేస్ చాలా ఎక్కువ. సీటు కింద 43 లీటర్ల ఖాళీ ఉండటమే కాకుండా, ముందు వైపు కూడా 12 లీటర్ల గ్లోవ్ బాక్స్ ఉంటుంది. 4kWh బ్యాటరీ సామర్థ్యంతో వచ్చే ఈ స్కూటర్ ఒక్కసారి ఛార్జ్ చేస్తే 120 కిలోమీటర్ల రేంజ్ ఇస్తుంది. అలాగే కేవలం 5 గంటల్లోనే 80 శాతం ఛార్జింగ్ పూర్తవుతుంది. గరిష్టంగా గంటకు 90 కిలోమీటర్ల వేగంతో ఇది దూసుకుపోతుంది.

డిజైన్ పరంగా కూడా ఇది చాలా వెరైటీగా ఉంటుంది. వెరైటీగా ఉండే స్క్వేర్ షేప్ డ్యూయల్ ఎల్‌ఈడీ హెడ్ లైట్లు, బాక్సీ డిజైన్ దీనికి ప్రత్యేక గుర్తింపునిస్తాయి. ఫుల్లీ డిజిటల్ కలర్ డిస్‌ప్లే, రెండు యూఎస్‌బీ ఛార్జింగ్ పోర్టులు, రివర్స్ పార్కింగ్ అసిస్ట్ వంటి స్మార్ట్ ఫీచర్లు ఇందులో ఉన్నాయి. రెండు చక్రాలకు డిస్క్ బ్రేకులు ఉండటంతో ప్రయాణం చాలా సురక్షితంగా ఉంటుంది. స్టైల్ తో పాటు మైలేజ్, తక్కువ ధరలో స్కూటర్ కావాలనుకునే వారికి ఈ డిసెంబర్ ఆఫర్ ఒక మంచి అవకాశం.