Sedan Sales : లగ్జరీ సెడాన్ దూకుడు.. హ్యుందాయ్ వెర్నా, హోండా సిటీలను దాటి ఆధిపత్యం చూపిన కారు ఇదే.
Sedan Sales : భారతదేశంలో ఎస్యూవీ కార్లకు ఎంత ప్రజాదరణ ఉన్నప్పటికీ, సెడాన్ కార్లకు ఉన్న డిమాండ్ ఏమాత్రం తగ్గలేదు. నవంబర్ 2025లో సెడాన్ కార్ల అమ్మకాలు వార్షిక ప్రాతిపదికన బాగా పెరిగినా, అక్టోబర్ 2025తో పోలిస్తే నెలవారీ అమ్మకాలలో స్వల్ప తగ్గుదల కనిపించింది. నవంబర్ 2025లో మొత్తం సెడాన్ అమ్మకాలు 35,039 యూనిట్లుగా నమోదయ్యాయి. ఇది నవంబర్ 2024 (24,154 యూనిట్లు) కంటే 45.06 శాతం ఎక్కువ. అయితే, అక్టోబర్ 2025తో పోలిస్తే అమ్మకాలు 5.84 శాతం తగ్గాయి. పండుగల తర్వాత మార్కెట్లో డిమాండ్ కొంత తగ్గడం ఈ తగ్గుదలకు కారణంగా చెప్పవచ్చు.
సెడాన్ సెగ్మెంట్లో మారుతి సుజుకి డిజైర్ తన నెంబర్ 1 స్థానాన్ని నిలబెట్టుకుంది. నవంబర్ 2025లో డిజైర్ 21,082 యూనిట్లు అమ్ముడై, మొత్తం సెడాన్ అమ్మకాలలో ప్రధాన వాటాను దక్కించుకుంది. ఇది నవంబర్ 2024తో పోలిస్తే ఏకంగా 78.98 శాతం ఎక్కువ. అంతేకాకుండా, అక్టోబర్ 2025తో పోలిస్తే కూడా 1.4 శాతం స్వల్ప వృద్ధిని చూపింది. ఈ బలమైన అమ్మకాలు, చవకైన, ఎంట్రీ-లెవల్ సెడాన్ కార్లకు భారతీయ వినియోగదారులలో ఇప్పటికీ మంచి డిమాండ్ ఉందని స్పష్టం చేస్తున్నాయి.
మారుతి డిజైర్ తర్వాత హ్యుందాయ్ ఆరా రెండో స్థానంలో నిలిచింది. దీని 5,731 యూనిట్లు అమ్ముడవ్వగా, వార్షికంగా 34.91 శాతం వృద్ధిని నమోదు చేసింది. అయితే, నెలవారీ అమ్మకాల్లో స్వల్పంగా 1.44 శాతం తగ్గింది. హోండా అమేజ్ 2,763 యూనిట్ల అమ్మకాలతో మూడవ స్థానాన్ని దక్కించుకుంది. ఇది వార్షికంగా 5.14 శాతం స్వల్ప వృద్ధిని చూపినా, అక్టోబర్ నెలతో పోలిస్తే 23.88 శాతం భారీగా పడిపోయింది. అక్టోబర్లో పండుగల కారణంగా అధిక డెలివరీలు జరిగాక, నవంబర్లో డిమాండ్ సాధారణ స్థాయికి చేరుకున్నట్లు తెలుస్తోంది.
మిడ్-సైజ్ సెడాన్ సెగ్మెంట్లో ఫోక్స్వ్యాగన్ వర్టస్ అద్భుతమైన పనితీరు కనబరిచింది. దీని 2,225 యూనిట్ల అమ్మకాలు వార్షికంగా 52.71 శాతం పెరిగాయి. మరోవైపు, స్కోడా స్లావియా 1,120 యూనిట్లు అమ్ముడవగా, నెలవారీ అమ్మకాల్లో 32.04 శాతం భారీ తగ్గుదల కనిపించింది. ముఖ్యంగా, మార్కెట్లో ఎక్కువ ప్రచారం ఉన్న హ్యుందాయ్ వెర్నా,హోండా సిటీ అమ్మకాలపై ఒత్తిడి కొనసాగింది. నవంబర్ 2025లో వెర్నా 709 యూనిట్లు మాత్రమే అమ్ముడవగా (వార్షికంగా 41.55% తక్కువ), హోండా సిటీ 605 యూనిట్ల అమ్మకాలతో (వార్షికంగా 14.67% తక్కువ) అమ్మకాలు బలహీనంగా ఉన్నట్లు స్పష్టమైంది.