Stock Market : జోరు మీదున్న స్టాక్ మార్కెట్..26000 మార్క్ దాటిన నిఫ్టీ, సెన్సెక్స్ 376 పాయింట్స్ జంప్.

Stock Market : భారతీయ స్టాక్ మార్కెట్ ఈ వారం చివరి ట్రేడింగ్ రోజు అయిన డిసెంబర్ 12, శుక్రవారం నాడు సానుకూలతతో ప్రారంభమైంది. ప్రధాన బెంచ్‌మార్క్ సూచీలైన బీఎస్‌ఈ సెన్సెక్స్, ఎన్‌ఎస్‌ఈ నిఫ్టీ 50 రెండూ లాభాలతో ఓపెన్ అయ్యాయి. గురువారం నాటి బలమైన ర్యాలీని కొనసాగించాయి.

ఈరోజు ఉదయం ట్రేడింగ్ ప్రారంభంలో సెన్సెక్స్ 232.90 పాయింట్లు (0.27%) పెరిగి 85,051.03 వద్ద, నిఫ్టీ 50 72.65 పాయింట్లు (0.28%) పెరిగి 25,971.20 వద్ద ప్రారంభమైంది. ఉదయం 9:20 గంటల సమయానికి మార్కెట్ మరింత పుంజుకుంది. సెన్సెక్స్ 396 పాయింట్ల లాభంతో 85,214 వద్ద, నిఫ్టీ 107 పాయింట్ల పెరుగుదలతో 26,006 మార్కును దాటి ట్రేడ్ అవుతోంది.

లాభాలు, నష్టాల్లో ఉన్న ప్రధాన షేర్లు

బీఎస్‌ఈలో టాటా స్టీల్, అదానీ పోర్ట్, బజాజ్ ఫైనాన్స్, యాక్సిస్ బ్యాంక్ షేర్లు లాభాల జాబితాలో ముందున్నాయి. అదే సమయంలో సన్ ఫార్మా, ఇటర్నల్, ఐటీసీ, టెక్ మహీంద్రా, టైటన్ షేర్లు నష్టాలతో ట్రేడ్ అవుతున్నాయి.

గత ట్రేడింగ్ రోజు, గురువారం నాడు భారతీయ స్టాక్ మార్కెట్ బలమైన వృద్ధిని నమోదు చేసింది. ఆ రోజు సెన్సెక్స్ 426.86 పాయింట్లు (0.51%) పెరిగి 84,818.13 వద్ద, నిఫ్టీ 50 140.55 పాయింట్లు (0.55%) పెరిగి 25,898.55 వద్ద ముగిశాయి. నిఫ్టీ ఐటీ, నిఫ్టీ ఆటో, నిఫ్టీ ఎఫ్‌ఎంసీజీ, నిఫ్టీ బ్యాంక్ సహా పలు రంగాల షేర్లలో గురువారం పెరుగుదల నమోదైంది. బీఎస్‌ఈలో 22 షేర్లు లాభాలతో, 8 షేర్లు నష్టాలతో ముగిశాయి.