SUV Sales War : మళ్లీ మొదలైన పోటీ..నెక్సాన్‌ను వెనక్కి నెట్టి నంబర్ 1 ఎస్యూవీగా క్రెటాదే అగ్రస్థానం.

SUV Sales War : భారతదేశపు నంబర్ 1 మిడ్‌సైజ్ ఎస్‌యూవీ అయిన హ్యుందాయ్ క్రెటా మరోసారి అమ్మకాల విషయంలో నంబర్ 1 కాంపాక్ట్ ఎస్‌యూవీ టాటా నెక్సాన్‎ను వెనక్కి నెట్టింది. 2025-26 ఆర్థిక సంవత్సరం తొలి 8 నెలల్లో (ఏప్రిల్ నుంచి నవంబర్ వరకు) హ్యుందాయ్ క్రెటా స్వల్ప తేడాతో అగ్రస్థానంలో నిలిచింది. ఇటీవల జీఎస్టీ 2.0లో ధర తగ్గించిన తర్వాత నెక్సాన్ వరుసగా మూడు నెలల పాటు బెస్ట్ సెల్లింగ్ కారుగా నిలిచింది. అయినప్పటికీ మొత్తం 8 నెలల అమ్మకాల్లో క్రెటా ఆధిక్యం చూపడం ఆసక్తికరం.

ఏప్రిల్ నుంచి నవంబర్ 2025 వరకు 1,35,070 యూనిట్ల అమ్మకాలతో, ఈ ఆర్థిక సంవత్సరంలో హ్యుందాయ్ మోటార్ ఇండియాలో అత్యధికంగా అమ్ముడైన కారుగా క్రెటా నిలిచింది. పెట్రోల్, డీజిల్ ఇంజిన్‌లలో అందుబాటులో ఉన్న క్రెటా, ఈ ఏడాది ఎలక్ట్రిక్ వెర్షన్ లాంచ్ కావడం ద్వారా మరింత బలాన్ని పుంజుకుంది. చాలా కంపెనీలు డీజిల్ ఇంజిన్ల నుంచి దూరంగా ఉన్నప్పటికీ, హ్యుందాయ్ డీజిల్‌పై నమ్మకం ఉంచడం లాభదాయకంగా మారింది. ఈ 8 నెలల కాలంలో హ్యుందాయ్ మొత్తం ప్యాసింజర్ కార్ల అమ్మకాలలో క్రెటా వాటా 36 శాతంగా ఉంది. ఈ కాలంలో అత్యధిక నెలవారీ అమ్మకాలు సెప్టెంబర్‌లో 18,861 యూనిట్లుగా నమోదయ్యాయి. కేవలం 996 యూనిట్ల స్వల్ప తేడాతో క్రెటా, నెక్సాన్ కంటే ముందు ఉంది.

టాటా నెక్సాన్ కూడా ఈ ఆర్థిక సంవత్సరంలో అద్భుతమైన వృద్ధిని కనబరిచింది. 1,34,074 యూనిట్ల అమ్మకాలతో, నెక్సాన్ వార్షికంగా 31% వృద్ధిని నమోదు చేసింది. గతేడాది ఏప్రిల్ నుంచి నవంబర్ వరకు దీని అమ్మకాలు 1,02,438 యూనిట్లుగా ఉండేవి. నెక్సాన్ మొత్తం అమ్మకాలలో దాదాపు 50% అమ్మకాలు కేవలం గత మూడు నెలల్లో (సెప్టెంబర్ నుంచి నవంబర్) జరిగాయి. ఈ మూడు నెలల్లో (సెప్టెంబర్ - 22,573 యూనిట్లు, అక్టోబర్ - 22,083 యూనిట్లు, నవంబర్ - 22,434 యూనిట్లు) నెక్సాన్ భారతదేశంలో అత్యధికంగా అమ్ముడైన యూవీ (UV)గా నిలిచింది. దీనికి ప్రధాన కారణం.. GST 2.0 కింద టాటా నెక్సాన్ ధరలను రూ. 1.55 లక్షల వరకు తగ్గించడం. పెట్రోల్, డీజిల్, ఎలక్ట్రిక్, CNG వంటి అనేక ఎంపికలలో లభిస్తున్నందున, నెక్సాన్ డిమాండ్ అక్టోబర్-నవంబర్‌లో నెలవారీ సగటున 22,363 యూనిట్లకు చేరింది.