Tata Curvv EV vs Hyundai Creta EV : టాటా కర్వ్ ఈవీ vs హ్యుందాయ్ క్రెటా.. ఈవీ ఏ కారు ఎక్కువ రేంజ్ ఇస్తుంది? సేఫ్టీలో ఏది ముందుంది?

Tata Curvv EV vs Hyundai Creta EV : భారతదేశంలో ఎలక్ట్రిక్ వాహనాల డిమాండ్ వేగంగా పెరుగుతున్న నేపథ్యంలో, ఆటోమొబైల్ కంపెనీలు ఎక్కువ రేంజ్, స్మార్ట్ ఫీచర్లు, స్పోర్టీ లుక్‌తో కొత్త ఈవీ మోడళ్లను విడుదల చేస్తున్నాయి. ఈ సెగ్మెంట్‌లో దేశంలోని రెండు అతిపెద్ద ఆటో దిగ్గజాలు – టాటా మోటార్స్ తమ కర్వ్ ఈవీతో, హ్యుందాయ్ తమ క్రెటా ఈవీతో నేరుగా పోటీ పడుతున్నాయి. మిడ్-సైజ్ ఎస్‌యూవీ సెగ్మెంట్‌లో ఈ రెండు కార్లు ధర, ఫీచర్లు, రేంజ్, భద్రత విషయంలో ఒకదానికొకటి గట్టి పోటీని ఇస్తున్నాయి. మరి ఈ రెండింటిలో ఏది ఎక్కువ రేంజ్ ఇస్తుంది, భద్రతలో ఏది ముందుందో వివరంగా తెలుసుకుందాం.

బ్యాటరీ ఆప్షన్లు, రేంజ్:

హ్యుందాయ్ క్రెటా ఎలక్ట్రిక్ రెండు బ్యాటరీ ఆప్షన్లతో వస్తుంది.

42 kWh బ్యాటరీ: ఇది 133.1 HP పవర్, 200 Nm టార్క్‌ను అందిస్తుంది. దీనితో దాదాపు 390 కి.మీ. రేంజ్ లభిస్తుంది.

51.4 kWh బ్యాటరీ: ఇది 168.6 HP పవర్, 200 Nm టార్క్‌ను అందిస్తుంది. దీనితో దాదాపు 473 కి.మీ. రేంజ్ లభిస్తుంది.

అదేవిధంగా, టాటా కర్వ్ EVలో కూడా రెండు బ్యాటరీ ప్యాక్ ఆప్షన్లు ఉన్నాయి:

45 kWh బ్యాటరీ: ఇది 147.9 HP పవర్, 215 Nm టార్క్‌ను అందిస్తుంది. దీనితో దాదాపు 430 కి.మీ. రేంజ్ లభిస్తుంది.

55 kWh బ్యాటరీ: ఇది 164.7 HP పవర్, 215 Nm టార్క్‌ను జనరేట్ చేస్తుంది. దీనితో దాదాపు 502 కి.మీ. రేంజ్ లభిస్తుంది.

ఛార్జింగ్ సమయం

హ్యుందాయ్ క్రెటా ఎలక్ట్రిక్: 11 kW AC ఫాస్ట్ ఛార్జర్‎తో కారును పూర్తిగా ఛార్జ్ చేయడానికి సుమారు 4 గంటల 50 నిమిషాలు పడుతుంది. DC ఫాస్ట్ ఛార్జింగ్తో ఇది 10% నుండి 80% వరకు 58 నిమిషాల్లో ఛార్జ్ అవుతుంది.

టాటా కర్వ్ ఈవీ : 7.2 kW AC వాల్ బాక్స్ ఛార్జర్‎తో ఈ కారును దాదాపు 7.9 గంటల్లో ఛార్జ్ చేయవచ్చు (45 kWh వేరియంట్‌కు 6.5 గంటలు). 70 kW DC ఫాస్ట్ ఛార్జర్‌తో దీనిని 10% నుంచి 80% వరకు ఛార్జ్ చేయడానికి కేవలం 40 నిమిషాలు పడుతుంది. 45 kWh వేరియంట్‌కు 60 kW ఛార్జర్‌తో కూడా ఇంతే సమయం పడుతుంది.

ధర (ఎక్స్-షోరూమ్)

హ్యుందాయ్ క్రెటా ఎలక్ట్రిక్: ధరలు రూ.18.02 లక్షల నుంచి రూ.24.55 లక్షల మధ్య ఉన్నాయి.

టాటా కర్వ్ ఈవీ : ధరలు రూ.17.49 లక్షల నుంచి రూ.21.99 లక్షల మధ్య ఉన్నాయి. బేస్ మోడల్ ధర రూ.17.49 లక్షల నుంచి ప్రారంభమై, టాప్ మోడల్ ధర రూ.22.24 లక్షల (సగటు ఎక్స్-షోరూమ్) వరకు వెళ్తుంది.

సేఫ్టీలో పోటీ

హ్యుందాయ్ క్రెటా EV: సేఫ్టీ ఫీచర్లలో 6 ఎయిర్‌బ్యాగ్‌లు, ABS (యాంటీ-లాక్ బ్రేకింగ్ సిస్టమ్) తో పాటు EBD (ఎలక్ట్రానిక్ బ్రేక్‌ఫోర్స్ డిస్ట్రిబ్యూషన్), ఎలక్ట్రానిక్ స్టెబిలిటీ కంట్రోల్, టైర్ ప్రెషర్ మానిటరింగ్ సిస్టమ్ వంటివి స్టాండర్డ్ సెట్‌గా ఉన్నాయి. అడ్వాన్సుడ్ సేఫ్టీ ఫీచర్లలో హ్యుందాయ్ స్మార్ట్ సెన్స్ లెవెల్ 2 ADAS సూట్ ఉంది, ఇందులో ఫార్వర్డ్ కొలిజన్ అవాయిడెన్స్ అసిస్ట్, బ్లైండ్-స్పాట్ కొలిజన్ అవాయిడెన్స్ అసిస్ట్, లేన్ కీప్ అసిస్ట్ వంటి ఫీచర్లు ఉన్నాయి. ఈ కారులో 360-డిగ్రీ కెమెరా, ముందు, వెనుక డిస్క్ బ్రేక్‌లు, హిల్-స్టార్ట్ అసిస్ట్, ఆటో హోల్డ్‌తో కూడిన ఎలక్ట్రానిక్ పార్కింగ్ బ్రేక్ కూడా ఉన్నాయి.

టాటా కర్వ్ EV: సేఫ్టీ కోసం 6 ఎయిర్‌బ్యాగ్‌లు, ఎలక్ట్రానిక్ పార్కింగ్ బ్రేక్ , ఎలక్ట్రానిక్ స్టెబిలిటీ కంట్రోల్ అందించబడ్డాయి. ఇందులో కూడా లెవెల్ 2 ADAS, బ్లైండ్ స్పాట్ మానిటరింగ్‌తో కూడిన 360-డిగ్రీ కెమెరా, పార్కింగ్ సెన్సార్లు ఉన్నాయి. అదనంగా, ఇందులో టైర్ ప్రెషర్ మానిటరింగ్ సిస్టమ్, ఆల్-డిస్క్ బ్రేక్‌లు, హిల్-స్టార్ట్ అసిస్ట్ మరియు ISOFIX చైల్డ్ సీట్ యాంకర్లు ఇచ్చారు.

రెండు కార్లు కూడా సేఫ్టీ పరంగా అద్భుతమైన ఫీచర్లను అందిస్తున్నాయి. అయితే, హ్యుందాయ్ క్రెటా EV ADAS సూట్‌లో మరికొన్ని అడ్వాన్సుడ్ ఫీచర్లను అందిస్తుంది. రేంజ్ విషయంలో టాటా కర్వ్ ఈవీ కొంచెం మెరుగ్గా ఉంది. ధరల విషయానికి వస్తే, టాటా కర్వ్ ఈవీ బేస్ వేరియంట్లలో కొంత సరసమైన ఎంపికగా నిలుస్తుంది. డిజైన్ పరంగా, కర్వ్ ఈవీ కూపే-SUV స్టైలింగ్‌తో మరింత ఆధునికంగా కనిపిస్తుంది, క్రెటా EV ఇప్పటికే ప్రజాదరణ పొందిన SUV డిజైన్‌ను కలిగి ఉంది. మీ ప్రాధాన్యతలు (రేంజ్, ధర, డిజైన్ లేదా ADAS ఫీచర్లు) ఆధారంగా ఏది ఉత్తమమో మీరు నిర్ణయించుకోవచ్చు.